Amăng mông jơnum, ƀing ding kơna Jơnum min apăn bruă Khua pơ ala mơnuih ƀon sang dêh čar rơkâo pơsir hĭ bruă sa, dua čô mơnuih apăn bruă ƀu gưt glăm ba, bĕ hĭ, “Pơhlôm brơi ƀing gơñu pô hlao đơi”, ƀu gưl pơsir hĭ bruă mă, dŏ kaih, bơbeč nao bruă bơwih ƀong sĭ mơdrô mơng hơdôm anom bruă.

Khua apăn bruă Ping gah, Khua Jơnum min djop djuai ania mơnuih mơnam Việt Nam Đỗ Văn Chiến brơi thâo: Mơnuih ƀon sang đăo gơnang kơ boh tơhnal yôm phăn amăng bruă pơjing hăng pơplih pơkra amăng Ping gah, sit biă ñu lĕ amăng bruă pơgăn hưp ƀong kông ngăn, bruă ngă soh hơmâo git gai khut khăt, lăi nao hrŏm hăng ngă, ƀu hơmâo kŏm hlơi ôh. Hơdôm tơlơi pơgôp hiăp mơng mơnuih ƀon sang lĕ čang rơmang hơdôm hơdră lăp djơ̆, gêh gal, pơhlôm brơi hơđong kiăng pơđĭ kyar lŏn ia, rơkâo tŭ mă tơlơi pơgôp hiăp mơng mơnuih ƀon sang hăng črăn tơlơi phiăn lŏn mơnai (čih pơkra glăi), črăn tơlơi phiăn bơwih ƀong sĭ mơdrô lŏn mơnai (čih pơkra), črăn tơlơi phiăn sang anŏ (čih pơkra)…sit biă ñu lĕ bruă djru hơdôm jơlan hơdră pơđĭ kyar bơwih ƀong huă mơnuih mơnam:

“Hăng jơlan hơdră pơđĭ kyar bơwih ƀong huă, mơnuih mơnam kual mơnuih djuai ania ƀiă hăng čư̆ siăng. Hơdôm akŏ bruă djru djru mơtăm kơ mơnuih ƀon sang kơ lŏn sang, lŏn ngă đang hmua, ia yua lĕ rơnoh prăk djru mơnuih mơnam dưm dăp tuh pơ alin bruă čar. Yua anun kiăng ngă tui jơlan gah tuh pơ alin aka ƀu dưi jao trun ôh. Dua dong lĕ ră anai ƀon lan tơnap tap biă mă amăng bruă pơmut hrŏm prăk tuh pơ alin. Bruă pơmut hrŏm lăi tui anun đôč, samơ̆ aka ƀu hơmâo hră pơ-ar črâo ba amăng bruă pơmut hrŏm prăk tuh pơ alin brơi kơ tŭ yua hloh yua anun ƀon lan ăt dŏ sư̆ rơbư̆”.

Mơng tơlơi sit nik ƀơi ƀon lan, mơnuih ƀon sang rơkâo Ping gah hăng Kơnuk kơna git gai hơdôm anom bruă bơdjơ̆ nao kơsem min, ba tơbiă hră pơ-ar djơ̆ tơlơi phiăn kiăng pơgang, pơgăn, pơsir hĭ bruă sa, dua čô mơnuih apăn bruă pơtrut nao rai bruă, bĕ hĭ, ƀu gưt glăm ba, “pơgang brơi kơ pô hlao đơi”, ƀu khin pơsir hĭ bruă mă, ngă kaih, bơbeč nao tơlơi bơwih ƀong, sĭ mơdrô mơng anom bruă hăng tơlơi hơdip mơda kơ mơnuih ƀon sang. Pơgôp hiăp amăng boh tơhnal anai, Khua Jơnum min bơwih ƀong huă mơng Ƀirô Khua pơ ala mơnuih ƀon sang dêh čar Vũ Hồng Thanh lăi rơđah:

“Amăng hră lăi pơthâo mơng Jơnum min djop djuai ania ăt ƀuh dŏ hŭi glăm ba, pơtrut nao rai. Lơ̆m sa bruă hlâo adih lu mơnuih tŭ ư pơsir hĭ. Samơ̆ ră anai kiăng kơnong 1 gơnong bruă ƀu tŭ ư laih dong pot glăi rơkâo tơlơi pơgôp hăng hơdră ngă hră pơ-ar ngă rơngiă hrơi mông, prăk duh đĭ kơtang”.

Kơ-iăng Khua pơ ala mơnuih ƀon sang dêh čar ơi Trần Thanh Mẫn pơtă: hră lăi pơthâo pơdah boh pơhiăp mơng mơnuih ƀon sang, rơkâo pơhrua hơdôm boh tơhnal kơ bruă pơhrŏ rơnoh pơđĭ kyar, kaih tŭ yap dưm dăp, pơplih ngă hră pơ-ar, ngă gêh gal tuh pơ alin bơwih ƀong sĭ mơdrô kiăng pơgiong hră lăi pơthâo brơi klă hloh:

“Mơng mông bưp mơnuih ƀon sang kâo ƀuh lu bruă ngă soh mơng nao čih anăn jŭ yap glăi đơ đam dêh čar amăng hră pơ-ar klah čun hơmâo mă yua. Dua dong lĕ bruă blơi hăng sĭ mơdrô, pơdŭ pơgiăng ma túy ră anai ƀu djơ̆ kơnong amăng jơlan glông đôč ôh wŏt hăng glông rơdêh por dong, ngă tơnap biă mă. Kông ang ƀôn prong Hồ Chí Minh hơmâo ƀom kiơng hơdôm pluh čô mơnuih”.

Sem lăng kơ hră lăi pơthâo amăng bruă tui mơnuih ƀon sang rơkâo mơng Ƀirô Khua pơ ala mơnuih ƀon sang dêh čar blan 4/2023, Jơnum min apăn bruă Khua pơ ala mơnuih ƀon sang dêh čar ăt lăi rơđah mơng krăo lăng brơi ƀuh, amăng 18 thun mơng thun 2003 trun thun 2021, anom bruă hră pơhlôm nua mơnuih mơnam ƀon lan hơmâo pơhrui prăk soh glăi mơng hră pơhlôm nua mơnuih mơnam, hơmâo rơbêh 4 rơnâo boh anom bơwih ƀong sĭ mơdrô hajăn pơhrui prăk soh. Khua anom bruă ngă tui tơlơi rơkâo mơng mơnuih ƀon sang Dương Thanh Bình lăi rơđah:

“Yua ngă tui prăk nô̆p pơhlôm nua mơnuih mơnam djơ̆ tơlơi pơkă mơng tơlơi phiăn yua anun hơdôm boh sang anŏ bơwih ƀong sĭ mơdrô, ƀing mơnuih aka ƀu yap wŏt hrơi blan nô̆p tui tơlơi pơkă kiăng tŭ mă tơlơi gum djru, sit biă ñu hơmâo lu mơnuih nô̆p amăng hră pơhlôm nua mơnuih mơnam giăm 20 thun tơlơi anai ngă mơnuih ƀon sang hil añ. Sa, dua čô mơnuih ngă hră pơ-ar ƀom kiơng, đa kiăng kơsem min, pel ĕp, lăng glăi pơsir hĭ mơtăm tơlơi rơkâo mơng mơnuih ƀon sang”.

Khua git gai pơ ala mơnuih ƀon sang dêh čar Vương Đình Huệ ăt lăi nao hơdôm bruă aka ƀu klă, glêh tơnap kơ hơdră bruă prăk kak, lŏn mơnai hơmâo mơnuih ƀon sang rơkâo đĭ amăng hơdôm tal bưp, rơkâo Kơnuk kơna lăng glăi tong ten dong tơlơi amăng thun 2023, sem lăng tơlơi ba truh kiăng pơsir hĭ hmao tlôn. Amăng anun, git gai hơdră bruă prăk kak akŏ phun, đing nao pơplih ngă hră pơ-ar, ngă gêh gal amăng tuh pơ alin sĭ mơdrô, hruă kjăp. Laih dong kiăo tui lăng, hơmâo hơdră bong glăi, pơgang pơgăn kjăp klin Covid-19.