Bơkơtuai rơwang bruă Tơlơi phiăn Bơwih ƀong sĭ mơdrô lŏn sang (pơplih pơkra), Jơnum min apăn bruă Khua pơ ala mơnuih ƀôn sang črâo rơđah hmâo tơlơi “lăi pơthâo” ruă akô̆ biă ƀơi plơi pla, yua anun rơkâo pơkă kơ kah pha kơplah wah bruă mơnuih hyu lăi pơthâo sĭ blơi lŏn hăng mơnuih kiăng lŏn juă nua lŏn sit nik.

Khua Jơnum min bơwih ƀong Vũ Hồng Thanh lăi lĕ, bruă khom kiăng hmâo jơlan bơwih ƀong sĭ mơdrô lŏn sang hmâo tơhnal mă tŭ tui tơlơi pơkă mơng tơlơi phiăn pioh ngă mă jăn ƀudah blơi sĭ lŏn sang tô nao rai hăng sa amăng hơdôm bơnah gum hrom bơwih hră pơ-ar, bơdjơ̆ nao tơlơi rơđah mơng tơlơi sĭ mơdrô hăng tơlơi dưi yua hơdôm bơnah amăng bơwih ƀong sĭ mơdrô lŏn sang. Yua kơ bôh nik, hmâo tơlơi hơdôm anih blơi sĭ lŏn tô nao rai tơdruă yua kơ bôh than kơmlai ngă prung nua sĭ blơi, ƀu lăi djơ̆ tơlơi sĭ hăng blơi, nua pơkă.

Ƀing Khua pơ ala rơkâo lăi glăi tŏng tơlơi kiăng pơkă abih bang bruă blơi sĭ khom găn rơgao bruă pơsit blơi sĭ lŏn sang. Khua čih pioh, Khua Anom bruă Khua pơ ala mơnuih ƀôn sang Bùi Văn Cường gum pơhiăp:

 “Tơhnal pơkă phun kiăng pơsit bơwih ƀong sĭ mơdrô lŏn sang hăng bruă man pơdŏng, blơi sĭ lŏn lĕ pioh sĭ glăi, ƀu kiăng mă yua. Khă hnun hai, gru nam kiăng thâo ƀu djơ̆ pioh mă yua mơ̆ pioh sĭ, sĭ glăi akă hmâo pơkă rơđah. Yua anun mơ̆ tơnap pơsit pô blơi sang pioh dô̆, čơkă sĭ glăi, mă yua lŏn anun pioh sĭ mơn. Yua anun, khom kơsem min dong”.

Khua Grŭp hyu mă bruă mơng khua pơ ala Nguyễn Thị Thanh lăi bôh nik ƀơi hơdôm plơi pla, bruă mă mơng hơdôm anih blơi sĭ lŏn ƀu lu mơ̆ biă ñu juă nua pô mă yua lŏn. Tơdah bôh nik tơlơi “pô lăi pơthâo” ruă akô̆ biă ƀơi plơi pla, yă Nguyễn Thị Thanh rơkâo khom pơkă pioh kah pha kơplah wah bruă ngă mơnuih lăi pơthâo juă nua lŏn hăng mơnuih kiăng blơi lŏn juă nua sit nik. Hrom hăng anun rơkâo khom hmâo tơlơi djơ̆ hrom amăng hră pơkôl gah bruă sĭ, sĭ glăi, brơi apah lŏn sang:

 “Lăi pơthâo juă nua lŏn anun lĕ ngă tui bruă pơdŏng sang dô̆ sĭ mơdrô. Tơdơi kơ pơkra giong bruă ngă tui rơwang bruă sang dô̆ pioh sĭ. Lom mơnuih dưi juă nua lŏn anun, arăng ƀu ngă tui ôh hơdră pơkă bruă ngă tui sang dô̆ pioh sĭ mơdrô mơ̆ arăng pung kơ kiăo tui sa tơlơi pơkă mơng Tơlơi phiăn lŏn dron, arăng pung kơ pơpha glông añrông lŏn, sĭ hĭ. Ƀing gơmơi iâu leč tơlơi phiăn hăng “akô̆ pha ra drơi pha ra”. Anai lĕ sa tơlơi bơdjơ̆ nao tơlơi lĕ tơhnal djơ̆ hrom hăng tơhnal ha amăng plĕ kơplah wah hơdôm tơlơi phiăn bơdjơ̆ nao truh tơlơi lŏn sang”.

Khua git gai wai lăng pơ ala mơnuih ƀôn sang Vương Đình Huệ lăi rơđah: bơwih ƀong sĭ mơdrô lŏn lĕ sa amăng hơdôm bruă pơhlôm brơi rơnoh đĭ kyar mơng bruă bơwih ƀong. Bruă pơplih pơkra tơlơi phiăn bơwih ƀong sĭ mơdrô lŏn lĕ kiăng biă samơ̆ tơnap ƀu pha ra mơn, khom thâo rơđah kiăng djơ̆ hăng tơlơi kiăng, bĕ pơkra giong samơ̆ ƀu dưi pơsir tơlơi gun ƀudah glăi pơjing rai hơdôm tơlơi gun pơkon:

 “Prong hloh amăng bruă pơđĭ kyar bruă sĭ mơdrô lŏn hă pơkă kual hăng kơčăo bruă. Bơdjơ̆ nao kơčăo bruă mă yua lŏn, pơđĭ kyar hơdôm rơwang bruă, dăp glăi hơdôm djuai sĭ mơdrô. Anô̆ hrom ƀing ta kơƀah phun kual pơkă tui hrơi blan. Ƀing ta pơkă tui kual lŏn. Tơdah amăng sa hrơi mông pơkă hmâo lu rơwang bruă lĕ mrô hmâo lu hloh tơlơi kiăng, lu lŏn sang ƀu dưi sĭ. Bruă dăp hơdră khom ngă tui wot nua sĭ, anom bơwih ƀong, lŏn hăng anih pok phun ăt jing tơlơi pơkă kual, kơčăo bruă lĕ kâo ƀuh pơdah ƀu kơjăp ôh bôh yôm anai”./.