Tơdơi kơ lu wơ̆t čih pơhrua pơkra ming, truh ră anai sa tơlơi lăp đing nao amăng hơdrôm hră tơlơi phiăn lŏn mơnai pơhrua phrâo anai hơmâo pơkă tum teč hloh kơ jơlan hơdră yua lŏn mơnai pioh kơ mơnuih ƀôn sang djuai ƀiă. Tui hăng anun, tơlơi pơkă rơđah rơđong jao lŏn, apah yua lŏn dŏ, lŏn ngă hmua brơi kơ mơnuih ƀôn sang djuai ƀiă sang anŏ ƀun rin ƀơi kual tơnap tap, anih hơmâo tơlơi hơdip mơda tơnap tap hloh. Hăng jơlan hơdră jao lŏn dŏ, lŏn pioh ngă hmua, hơdrôm hră tơlơi phiăn anai pơkă rơđah, jao kơ sang anŏ mơnuih ƀôn sang djuai ƀiă yua lŏn, apah yua lŏn yua kơƀah lŏn ngă hmua, lŏn pơdong sang, rơnoh pơkă jao lŏn, apah yua lŏn.

Pơkă kơ tơlơi gêh găl jao dưi yua lŏn. Mơnuih ƀôn sang djuai ƀiă dưi sĭ, dưi brơi, dưi jao glăi kơ sang anŏ tŭ mă yua; dưi pioh glăi kơ mơnuih amăng sang anŏ ăt dŏ mă yua lŏn ngă hmua, lŏn apah tŭ mơ̆ng kơnuk kơna tơdang aka abih thun pơkă. Laih dơ̆ng pơhrua thim hơdôm tơlơi pơkă mă glăi lŏn pioh ba yua kơ bruă pơkŏn, ngă anih dŏ, lŏn ngă hmua kơ mơnuih ƀôn sang djuai ƀiă.