Gum hrom jơnum bơkơtuai ƀơi 17 bôh anih anom gưl tơring glông, hăng tơlơi gum hrom mơng rơbêh kơ 400 čô khua pơ ala lĕ mơnuih amăng khul. Hăng pran jua tơpă ară, mơ-ak phăk, pơ ala kơ hơdôm blok đang, anom mă bruă, mơnuih amăng khul mơnuih ngă đang hmua hmâo ba tơbiă laih lu tơlơi tơña hăng khua tơring čar Gialai hăng hơdôm gơnong bruă, anom bruă bơdjơ̆ nao.

Amăng anun đing nao 5 ƀut tơlơi, anun lĕ: Pơjeh pla, hlô rông; djru ngăn rơnoh čan mă kơmlai ƀiă; hơdră pơkă, hơdră bruă gum djru pơtlaih tơlơi tơnap kơ bruă ngă đang hmua; lŏn drŏn; djru pơdŏng anom mă yua ƀơi plơi pla, anih anom dô̆. Hơdôm tơlơi tơña amăng mông bơkơtuai phun ñu hmâo khua hơdôm ƀirô apăn bruă ƀơi anăp lăi glăi. Sa dua tơlơi rơkâo đĭ pel ĕp ngă rơđah, hơdôm bôh ƀirô apăn bruă čih djă pioh, kơsem min, pơsir./.