Pơhiăp git gai jơnum, Khua dêh čar ơi Phạm Minh Chính brơi thâo, pok pơhai ngă tui hră pơtrun tal XIII mơ̆ng ping gah, hơdôm pok hră pơtrun mơ̆ng gơnong dlông, khua pơ ala mơnuih ƀôn sang dêh čar, kơnuk kơna pơtum lăi nao ngă 3 mơta bruă mă pơblih kơtang, amăng anun bruă ngă pơblih prong hăng kiăng giong lĕ hơdră kơnuk kơna.

Amăng thun 2022, Kơnuk kơna pơphun 9 wơ̆t jơnum hăng lu tơlơi jơnum khua mua amăng kơnuk kơna kơ bruă čih pơkra tơlơi phiăn dêh čar. Yak nao amăng thun 2023, anai lĕ jơnum lok 2 mơ̆ng kơnuk kơna čih pơkra tơlơi phiăn, pơsir tơlơi tơnap tap, pơjing tơlơi phiăn gêh găl kơ bruă pơđĭ kyar. Khua dêh čar rơkâo abih bang khua mua amăng kơnuk kơna hăng rĭm ding kơna kơnuk kơna khom gir run hloh, pơsit pran jua, ai hơtai mă bruă khut khăt, kiăng hơmâo boh tơhnal pơblih phrâo, čih pơkra tơlơi phiăn kiăng djơ̆ hnong pơkă, ăt khom ngă djơ̆ boh tŭ yua klă.