Amăng hrơi mông đơ đam dêh čar čơkă thun phrâo 2023 hăng bơyan bơnga Quý Mão ƀiă truh laih, Khua dêh čar ơi Phạm Minh Chính hok mơ-ak hăng ol kơdol nao lăng Jơlan hơdră “Tết tum jơngum-bơyan bơnga pơlir hơbit thun 2023” hăng ƀing kông nhơn, mơnuih mă bruă ƀơi tơring čar Phú Yên - kual lŏn hiam hơmâo gru grua ngă hơkrŭ. Khua dêh čar pơsit tong, anai lĕ bruă mă sit nik, yôm phăn hăng mơnuih mă bruă amăng bơyan bơyan yua khul mơnuih mă bruă mut phung djop gưl pơphun.

Khua dêh čar brơi thâo, kông nhơn ră anai hơmâo giăm 14% mrô mơnuih, 27% mrô mơnuih mă bruă, rĭm thun pơkra pơjing rai rơbêh 65% gơnam tam hăng 70% rơnoh pơhrui ngăn drăp kơnuk kơna, tơlơi thâo thăi amăng bruă mă, bruă ngă tui tơlơi phiăn jai kjăp tui hăng mut hrŏm jar kmar. Mrô kông nhơn thâo rơgơi, thâo amăng mă yua boh thâo măi mok jai lui tui. Sit biă ñu, Khua dêh čar ol kơdol biă mă lơ̆m hmư̆, lơ̆m klin Covid-19 hơđuh đĭ, abih bang kông nhơn lêng kơ gir run, thâo hluh hơdôm tơlơi tơnap tap mơng anom bơwih ƀong sĭ mơdrô, gir run hrŏm hăng đơ đam dêh čar pơgang klin. Lơ̆m hơdai nao hrơi blan hơdip phrâo, ƀing kông nhơn pơphun mă bruă mơtăm, gir run tơhrơi kah mlăm kiăng hơdôm gơnam pơkra mơng Việt Nam dưi ba hyu sĭ mơdrô amăng lŏn ia hăng pơ tač rơngiao.

“Kâo đăo gơnang, hrơi mông pơđao pran jua anai amra tui ƀing kông nhơn, mơnuih mă bruă glăi pơ sang anŏ, glăi pơ plơi pla kiăng pơphun ƀong tết tum jơngum hăng kyâo mơ-ak. Bơ ƀing mơnuih dŏ tơnap aka ƀu dưi glăi pơ plơi pla amra čơkă thun phrâo mơ-ak mơ-ai, hơmâo djop mơta, kiăng abih bang lêng kơ čơkă tết mơ-ak mơ̆ ƀu lui hlơi dŏ glăi gah tlôn”.

Khua dêh čar lăi pơtong, tết tui phiăn juăt djuai ania ta yôm phiăn biă mă amăng tơlơi hơdip mơda, anai lĕ bơyan kiăng rĭm čô mơnuih ƀơi dêh čar Việt Nam anăp nao plơi pla, ơi yă, kiăng dưi tum jơngum hrŏm sang anŏ, ba glăi hrơi mông mơ-ak, hơmâo lu tơlơi pơtrut pơsur kiăng kơ yak nao thun phrâo hăng lu tơlơi mơ-ak, čang rơmang, anăp nao hơdôm tơlơi hiam klă ƀiă dong. Bruă bơwih brơi tết ba glăi tơlơi hiam klă hloh, pơdah pran gum pơgôp, djru nao rai mơng djuai ania ta.

Khua dêh čar ăt thâo hluh rơđah, pap mơñai hăng hơdôm tơlơi tơnap tap, glêh glar mơng ƀing kông nhơn hăng mơnuih mă bruă amăng thun blan laih rơgao. Pơ anăp anai, Kơnuk kơna amra git gai khut khăt hơdôm ding jum, gong gai ƀong lan đing nao, pơhlôm brơi prăk kak kiăng pơsir hĭ hơdôm tơlơi tơnap mơng ƀing kông nhơn, mơnuih mă bruă. Amăng anun, đing nao pok pơhai khut khăt akŏ bruă pơjing 1 klăk boh sang dŏ brơi mơnuih mơnam; laih dong, ječ ameč hơmâo hơdră pơsir tong ten, sit nik pơđĭ kyar sang dŏ brơi kông nhơn. Hơnong pơkă lĕ kiăng ƀing kông nhơn, mơnuih mă bruă dưi tŭ mă hơdôm tơlơi dưi amăng pơđĭ kyar lŏn ia; kiăng rĭm bơyan bơnga truh lĕ hrơi mông tum jơngum, kyâo mơ-ak mơng adơi ayong kông nhơn, mơnuih mă bruă hrŏm hăng sang anŏ ƀing gơñu.

“Anai amra lĕ anŏ pơtrun pran jua kơtang hloh kiăng tơdơi kơ hrơi ƀong tết mơtăm, adơi ayong anong wa pơwŏt glăi mă bruă hăng pran jua hur har phrâo, gir run pơgiong hơdôm hơnong pơkă, bruă jao, pơgôp pơđĭ kyar anom bơwih ƀong sĭ mơdrô, pơđĭ kyar lŏn ia yua hơnong pơkă mơnuih ƀon sang pơdrông, lŏn ia kơtang, ngă pô, bơkơnar, hiam klă, kiăng abih bang mơnuih hơmâo tơlơi hơdip jai hrơi jai hiam klă. Kâo mơ-it tơlơi pơpŭ thun phrâo hăng pran jua hiam klă hloh tơl abih bang kông nhơn, mơnuih mă bruă amăng đơ đam dêh čar. Hơ-ưč hmưi rĭm boh sang anŏ kông nhơn, mơnuih mă bruă čơkă thun phrâo tum jơngum, kyâo mơ-ak hăng pran jua kiăng khăp.”

Pơ ala Khua mua Ping gah, Kơnuk kơna, Khua dêh čar mơ-it tơlơi tơña bla hăng pơpŭ thun phrâo hiam klă, bơwih ƀong sĭ đăi hăng abih pran jua pơpŭ, lăng yôm hơdôm tơlơi gum pơgôp mơ̆ khul mơnuih mă bruă mut phung, ƀing kông nhơn, mơnuih mă bruă đơ đam dêh čar lăi hrŏm, adơi ayong kông nhơn tơring čar Phú Yên hnun mơn yua hơdôm tơlơi dưi amăng hơdôm thun laih rơgao, pơgôp yôm phăn amăng tơlơi dưi hrŏm lŏn ia ta. Amăng jơlan hơdră Khua dêh čar ơi Phạm Minh Chính hăng khua mua Khul pơlir hơbit mơnuih mă bruă Việt Nam, tơring čar Phú Yên hăng Jơnum min djop djuai ania mơnuih mơnam Việt Nam hơmâo jao 220 anung gơnam brơi kơ ƀing ding kơna, kông nhơn, mơnuih mă bruă gir kơtir hăng sang anŏ tơnap tap, hăng abih tih nua ñu giăm 288 klăk prăk./.