Đĭ pơhiăp amăng mông mă bruă, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, truh ră anai, Khua pơ ala mơnuih ƀôn sang dêh čar hơmâo pok pơhai lu bruă pơprong, anun lĕ pơphun 14 tal jơnum, amăng anun hơmâo wŏt jơnum tui tơđar hăng ƀu tui tơđar. Bruă ngă tui akŏ bruă mơng Ping gah Khua pơ ala mơnuih ƀôn sang, tơlơi pơtrun mơng Jơnum Ping gah đơ đam dêh čar tal 13, tơlơi klah čun mrô 19 mơng Ding jum kơđi čar kơ jơlan hơdră čih pơkra tơlơi phiăn rơwang mă bruă mơng Khua pơ ala mơnuih ƀôn sang tal 15 ba glăi tŭ yua prong. Sit biă ñu, amăng 156 bruă jao čih pơkra tơlơi phiăn hơmâo pơgiong 131. Hơdôm akŏ bruă mơng Ping gah Khua pơ ala mơnuih ƀôn sang hơmâo ngă tui rơbêh 81%. Boh than ba glăi mơng hơdôm tal tơdơi prong ƀiă jơnum hlâo anun, hơmâo Khua pơ ala mơnuih ƀôn sang hăng mơnuih ƀôn sang lăng yôm.

Tui Khua git gai pơ ala mơnuih ƀôn sang dêh čar ơi Trần Thanh Mẫn, jơnum anai kiăng lăng glăi hơdôm bruă dưi ngă; laih dong pel ĕp glăi aka dưi ngă, aka ƀu klă, pơhrăm tui kiăng kơ ngă klă ƀiă dong.

Hăng brơi thâo, amăng hrơi blan dŏ glăi, Khua pơ ala mơnuih ƀôn sang dêh čar amra pơphun 3 tal jơnum tui tơđar hăng 1 mông jơnum klah čun rơwang mă bruă Khua pơ ala mơnuih ƀôn sang dêh čar tal 15, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, anai lĕ bruă prong biă mă. Yua anun, Khua git gai pơ ala mơnuih ƀôn sang dêh čar rơkâo, Khul djuai ania, djop Jơnum min mơng Ƀirô Khua pơ ala mơnuih ƀôn sang dêh čar kiăng ngă tui khut khăt kiăng ba glăi boh tơhnal. Sit biă ñu, thun 2025, dêh čar ta hơmâo lu tơlơi gal anun lĕ: Hơdor glăi 80 thun ngă hơkrŭ blan 8 hăng hrơi akŏ pơjing kơnuk kơna lơ 2/9; 50 thun blah dưi ƀơi kual Dơnung, rơngai lŏn ia; bruă prap lui plĕ hră ruah Khua pơ ala mơnuih ƀôn sang dêh čar lok 16 hăng Khul pơ ala mơnuih ƀôn sang djop gưl rơwang thun 2026-2031. Thun 2026, Khua pơ ala mơnuih ƀôn sang hơdor glăi 80 hrơi pơphun plĕ hră Khua pơ ala mơnuih ƀôn sang dêh čar Việt Nam blung a.

Amăng mông mă bruă, Khua Jơnum min gru grua pơtô pơjuăt; Jơnum min mơnuih mơnam, Anom bruă djru bruă pơ ala mơnuih ƀôn sang hơmâo lăi pơthâo boh than ngă tui bruă jao mơng akŏ rơwang mă bruă mơng Khua pơ ala mơnuih ƀôn sang dêh čar tal XV truh ră anai hăng jơlan gah, bruă jao akŏ phun truh rơnuč rơwang mă bruă.

Tơdơi kơ hmư̆ tơlơi pơgôp hiăp, pơđut hĭ mông mă bruă, Khua git gai pơ ala mơnuih ƀôn sang dêh čar ơi Trần Thanh Mẫn lăng yôm boh than dưi ngă mơng djop jơnum min. Amăng anun, Jơnum min mơnuih mơnam hơmâo pơgiong 10 bruă jao; jơnum min gru grua, pơtô pơjuăt pơgiong 6 bruă jao; anom djru bruă khua pơ ala mơnuih ƀôn sang pơgiong 10 bruă jao. Kơ bruă jao čih pơkra tơlơi phiăn, Jơnum min mơnuih mơnam hơmâo pơgiong 25 bruă jao; Jơnum min gru grua, pơtô pơjuăt hơmâo pơgiong 14 bruă jao; anom djru bruă khua pơ ala mơnuih ƀôn sang hơmâo pơguing 4 bruă jao.

Khua git gai pơ ala mơnuih ƀôn sang dêh čar ăt brơi thâo, mah hơmâo lu tơlơi dưi sit nik, samơ̆ ăt dŏ lu bruă aka ƀu klă amăng gum hrŏm, pơjing akŏ bruă aka ƀu djơ̆ hăng tơlơi sit nik, pok pơhai aka ƀu hmao tlôn, lăp djơ̆.

Khua git gai pơ ala mơnuih ƀôn sang dêh čar ơi Trần Thanh Mẫn rơkâo, djop jơnum min, anom djru bruă khua pơ ala mơnuih ƀôn sang khut khăt pơsir hĭ bruă aka ƀu klă; pơhlôm gum pơgôp mut hrŏm amăng anih anom; kơtưn pơhlôm hơgŏm tơlơi pơhing; tơlơi glăm ba amăng boh pơhiăp.

“Kâo rơkâo đing nao pơplih pơkra pran mă bruă mơng Khul djuai ania, djop jơnum min mơng Ƀirô Khua pơ ala mơnuih ƀôn sang dêh čar; prap lui bruă mă brơi lăp djơ̆, bruă hơget yôm hloh kiăng đing nao ngă pơgiong; prap lui boh tơhnal pơjing him lăng hlâo jơnum lok 8, gum hrŏm pơphun Jơnum Khua pơ ala mơnuih ƀôn sang tui bruă jao lok 6; tŏ tui kơsem min, lăi pơthâo, tŭ mă, pơplih pơkra hơdôm čră tơlơi phiăn, črăn tơlơi pơtrun hơmâo Ƀirô Khua pơ ala mơnuih ƀôn sang dêh čar pơgôp hiăp amăng jơnum lok 7 kiăng mơ-it nao tŭ yap amăng jơnum lok 8”.

Hrŏm hăng anun, Khua git gai pơ ala mơnuih ƀôn sang dêh čar rơkâo djop Jơnum min mơng Ƀirô Khua pơ ala mơnuih ƀôn sang gum hrŏm tui tơlơi krăo lăng mơng Kơnuk kơna amăng pok pơhai hơdôm črăn tơlơi phiăn, tơlơi pơtrun hơmâo Ƀirô Khua pơ ala mơnuih ƀôn sang dêh čar tŭ yap amăng hơdôm tal jơnum; bruă krăo lăng kiăng hơmâo akŏ bruă tañ hloh kiăng huăi bơdjơ̆ hrŏm hăng djop ƀon lan; tŏ ngă tui bruă jao tui akŏ bruă pơphun hơdor glăi 80 thun hrơi pơphun plĕ hră ruah Khua pơ ala mơnuih ƀôn sang dêh čar Việt Nam blung a, jao pri čih tơlơi pơhing Diên Hồng tal 3, pel ĕp pơplih phrâo hơdôm jơlan gah, bruă ngă hră pơ-ar brơi klă tui dong, sit nik, kjăp bruă, tŭ yua; sit biă ñu pok pơhai klă hơdră apah prăk phrâo dong mơng blan 7/2024; kơtưn amăng bruă wai pơgang bruă mă amăng hơdôm anih anom./.