Mơng hrơi akŏ pơdong thun 1977 truh ră anai, hơmâo tơlơi đing nao gum djru mơng gưl Ping gah, gong gai djop gưl hăng mơnuih ƀôn sang amăng kual, sang hră gưl tlâo Phạm Hùng hơmâo găn rơgao lu tơlơi tơnap tap, gum pơgôp, gir run hrưn đĭ, pơplông pơtô hrăm klă hloh, ba glăi lu tơlơi dưi hơmâo tŭ yap. Ră anai hăng 40 anih hrăm, hăng abih tih 1.571 čô čơđai sang hră.

Pơ ala brơi khua mua Ping gah, Kơnuk kơna, Khua git gai pơ ala mơnuih ƀôn sang dêh čar ơi Trần Thanh Mẫn pơdah pran jua hok mơ-ak ƀơi anăp hơdôm boh than dưi ngă mơng sang hră amăng thun blan rơgao yua hơdôm tơlơi gir run mơng djop rơnuk nai pơtô hăng tơlơi gơgrong mơng sang hră; laih dong hok mơ-ak lơm gơnong bruă pơtô pơjuăt tơring čar Vĩnh Long lĕ anih bơngač amăng kual lŏn dăo ia krông Cửu Long lăi phara, kual dơnung hăng đơ đam dêh čar hnun mơn.

Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, Ping gah, Kơnuk kơna lăng yôm bruă pơtô pơjuăt lĕ bruă prong hloh, tuh pơ alin brơi pơtô pơjuăt lĕ tuh pơ alin brơi pơđĭ kyar, pioh hơdôm anŏ klă hloh kiăng bơwih brơi bruă pơtô hrăm, pơhlôm brơi ƀing čơđai amăng hnưr hrăm hră lêng kơ dưi nao sang hră, ƀing čơđai dưi hrăm amăng anih pơhlôm brơi klă hloh; đing nao pơtô hrăm brơi mơnuih mă bruă, sit biă ñu mơnuih mă bruă rơgơi, sa amăng hơdôm bruă akŏ phun kiăng hrưn đĭ tơlơi hơdip kơ ană mơnuih hăng pơđĭ kyar tañ, hơđong kjăp amăng lŏn ia, pơsit tong pran bơkơtưn hăng kơdrưh ang mơng lŏn ia ta amăng kual hăng jar kmar.

Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, sa thun hrăm phrâo pok rai lu tơlơi hok mơ-ak hăng tơlơi lông phrâo; 3 thun hrăm gưl tlâo yôm phăn biă mă, kơđŏm glăi thun blan bơbrô̆ prong djop mơta kơ ƀing čơđai. Yua anun, Khua git gai pơ ala mơnuih ƀôn sang dêh čar čang rơmang ƀing čơđai sang hră amra hơmâo lu tơlơi hok mơ-ak, pran gir kơtir hrăm hră; ƀu pơdơi gir run pơhrăm pô tui gru hơdip mơng wa Hô hing ang, tui gru wa Phạm Hùng mơng plơi pla Vĩnh Long; gum pơgôp, khăp pap, djru tơdruă hrưn đĭ; prap lui djop boh thâo, anăp nao pơjing bruă mă, hăng pran hur har kơtang hloh anăp nao ngă bruă kơñ pơgi; tla glăi pran tuh rơyuh mơng amĭ ama, hăng tơlơi pơtô mơng ƀing nai.

hua git gai pơ ala mơnuih ƀôn sang dêh čar ơi Trần Thanh Mẫn rơkâo rĭm čô nai pơtô amra jing sa čô mơnuih ba gru amăng tơlơi hơdip, bruă pơhrăm pô hăng pơčeh phrâo; lêng kơ gir run, gơgrong amăng bruă mă, thâo khăp pap, pơtô ba ƀing čơđai; “Nai pơtô kar hăng amĭ ama”; jing mơnuih pơtrut pơsur, čung ba kiăng ƀing čơđai gir run hrăm hră, thâo pel ĕp, kơsem min boh thâo phrâo.

“Kâo đăo gơnang ƀing apăn bruă, nai pơtô, ƀing čơđai sang hră amra ngă tui klă tơlơi pơtă pơtăn mơng Khua git gai Ping gah, Khua mir sir ơi Tô Lâm amăng hră mơ-it gơnong bruă pơtô pơjuăt ƀrô hrơi ngă lơphet mut sang hră; anăm pơdơi pơplih phrâo, hrưn đĭ klă dong amăng bruă pơtô hrăm, pơjing gru grua pơtô hrăm bă blai tui gru grua mơng kual lŏn hing ang Long Hồ, Vĩnh Long; pơgôp prong amăng bruă “hơmâo lu dong mơnuih rơgơi, thâo mơbruă”, djơ̆ hăng anăn sang hră lơm mă anăn Khua khul khua ding jum ơi Phạm Hùng. Thun hrăm 2024-2025, jơlan  hơdră pơtô hrăm phrâo 2018 amra tŏ tui pok pơhai, anai lĕ thun ngă tui tal pơplông abih anih 12 tui jơlan hơdră phrâo. Kâo rơkâo ding jum pơtô pơjuăt tŏ tui git gai, pơphun ngă tui klă jơlan hơdră pơtô pơjuăt phrâo, tañ hơmâo tơlơi črâo ba, pơphun pơtop hrăm kơ bruă pơplông, ngă gêh gal hloh brơi kơ ƀing čơđai hăng sang anŏ gơñu”.

Khua git gai pơ ala mơnuih ƀôn sang dêh čar ơi Trần Thanh Mẫn rơkâo djop gưl Ping gah, gong gai, jơnum min djop djuai ania mơnuih mơnam, djop khul grup, djop gưl, gơnong bruă amăng tơring čar Vĩnh Long hăng tơring glông Long Hồ tŏ tui đing nao, git gai kiăng pơhlôm brơi klă gơnam tam hăng prăk kak kơ bruă pơtô hrăm; bơwih brơi, pơđĭ kyar nai pơtô hăng ƀing apăn bruă gah pơtô hrăm brơi djop nai pơtô tui tơlơi pơkă; pơplih phrâo amăng jơlan hơdră pơtô hrăm; hrưn đĭ klă dong amăng pơtô hrăm djop mơta ƀơi djop gưl; pơtrut kơtang bruă pơjing gru grua hrăm hră; kơtưn gum hrŏm kơplah wah sang anŏ, sang hră hăng mơnuih mơnam amăng pơtô hrăm brơi ƀing čơđai./.