Pơ ala kơ ping gah hăng kơnuk kơna, Khua git gai pơ ala mơnuih ƀôn sang dêh čar ơi Vương Đình Huệ pơpŭ kơ mơnuih ƀôn sang mă akan hơdang să Bảo Ninh, Đồng Hới čơkă thun phrâo hơmâo lu tơlơi gêh găl hloh, sa thun angin rơnang phang mơak, mă akan hơdang jor laih anun tơlơi hơdip mơda đĭ hloh. Khua git gai pơ ala mơnuih ƀôn sang dêh čar čang rơmang ană plơi pla kơtưn gum pơgôp, hrom pran jua hrưn đĭ găn rơgao tơlơi tơnap tap. Ơi Vương Đình Huệ hơmâo jao 50 anung gơnam kơ mơnuih ƀôn sang mă akan hơdang.

Hrơi anun mơ̆n, Khua git gai pơ ala mơnuih ƀôn sang dêh čar, ơi Vương Đình Huệ hăng grup hyu mă bruă nao čuă, pơpŭ thun phrâo laih anun ƀơk gơnam  kơ sang anŏ hơmâo djru kơnuk kơna, sang anŏ ƀun rin, mơnuih mă bruă apah dŏ tơnap tap amăng tơring glông Quảng Ninh, tơring čar Quảng Bình. Khua git gai pơ ala mơnuih ƀôn sang dêh čar ơi Vương Đình Huệ, rơkâo tơring čar, tơring glông ăt đing nao kơ tơlơi hơdip mơda mơnuih ƀôn sang, mơnuih mă bruă apah, sang anŏ hơmâo djru kơnuk kơna dŏ lu tơlơi tơnap tap.