Ƀơi mông jak iâu, Khua Khul bruă ia jrao kyâo bơrơkal mriah Việt Nam, yă Bùi Thị Hòa lăi pơthâo hăng Ding jum kơđi čar yua hơmâo jao kơ ơi Võ Văn Thưởng, ding kơna ding jum kơđi čar, Khua mir sir ngă Khua hing ang Khul Bruă ia jrao kyâo bơrơkal mriah Việt Nam mơ̆ng thun 2022-2027. Khua mir sir brơi thâo, amra gir run djru hrom pơtrut bruă mă amăng Khul hăng bruă mă djru tơlơi khăp pap amăng dêh čar ta kơñ pơgi ni anăp.

Thun anai, gir run kiăng hơmâo boh ƀiă ñu 400 klai prăk djru 1 klăk čô mơnuih tơnap tap, amăng anun djru mơnuih ƀôn sang ƀun rin mă akan hơdang amăng ia rơsĭ, sang anŏ tơnap tap hăng čơđai muai ƀu klă drơi jăn dưi tŭ mă tơlơi djru mơ̆ng ƀing hơmâo pran jua čơmah amăng dêh čar hăng mơ̆ng tač rơngiao. Khua mir sir iâu pơthưr djop sang bruă, anom bruă mơnuih ƀôn sang ngă pô sĭ mơdrô, sang bruă sĭ mơdrô anet prong, djop khul mơ̆ng jar kmar, ƀing mơnuih pơdrong asah hơmâo pran jua čơmah laih anun abih bang mơnuih ƀôn sang ăt ngă hrom, djru ba, hrom sang bruă khul ia jrao kyâo bơrơkal mriah Việt Nam amăng bruă djru  tơlơi khăp pap jai hrơi tŭ yua  kơ mơnuih ƀun rin, mơnuih tơnap tap hloh.