Pơhiăp amăng mông jơnum, Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn brơi thâo, tal jơnum lok 8 hmâo lu bôh yôm hloh amăng hơdôm tal jơnum akô̆ rơwang bruă Khua pơ ala mơnuih ƀôn sang tal 15 truh ră anai. Kiăo tui anun, Khua pơ ala mơnuih ƀôn sang amra pel ĕp 39 bôh yôm, amăng anun hmâo 29 bôh yôm gah bruă čih pơkra tơlơi phiăn, 10 ƀut bôh yôm gah bơwih ƀong – mơnuih mơnam, ngăn drăp kơnuk kơna, lăng tui, mơnuih apăn bruă hăng mă bruă, hơdôm tơlơi pơkon dong. Tal jơnum lok 8, amra pơphun amăng lơ 21/10. Pơkă hlâo hrơi mông mă bruă 29 hrơi. Tal jơnum dưi pơphun jing 2 tal.

Jơnum dưi ngă tui hlâo kơ hrơi pơphun Tal jơnum 1 blan pioh hơdôm bôh ƀirô čih dăp hơdră, pel ĕp hmâo mông ngă tui djơ̆ Tơlơi phiăn mă yua hră pơ-ar tơlơi phiăn; hrŏm hăng anun kiăng bơkơtuai, tŭ ư kơ bôh yôm jơlan hơdră tal jơnum lok 8, biă ñu lĕ hơdôm bôh ƀirô gum pơhiăp pel ĕp rơnoh bruă, hrơi mông, anô̆ kơjăp tui tơlơi pơkă, bruă prăp lui bôh yôm hơdôm rơwang bruă tơlơi phiăn, tơlơi pơtrun pơsit pioh pơhrua nao amăng jơlan hơdră tal jơnum lok 8 tui jơlan hơdră ngă rơguăt.

Tui hăng Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn, hơdôm hrơi rơgao, bruă gum hrŏm kơplah wah Gong gai dêh čar hăng hơdôm bôh ƀirô Khua pơ ala mơnuih ƀôn sang jai hrơi jai kơjăp, djơ̆ nao hrŏm, sit nik hăng ba glăi bôh tơhnal, hơdôm bôh ƀirô hmâo lăng yôm pran jua bruă gơgrong, prăp lui mơ̆ng tañ, mơ̆ng ataih, mă bruă hrơi mlăm, pioh prăp lui kơ hơdôm rơwang bruă tơlơi phiăn, tơlơi pơtrun pơsit lăi pơthâo kơ Khua pơ ala mơnuih ƀôn sang.

“Kơthel tal 3 phrâo rơgao hmâo ngă kơtang, răm rai lu. Truh kơ ră anai, akă dưi yap abih mơn hơdôm anô̆ răm rai. Abih bang Ping gah, abih bang mơnuih ƀôn sang, abih bang ling tơhan glăk hmâo dong tơlơi tơnap phrâo, tơlơi lông phrâo. Gong gai dêh čar khom dŏng ƀơi anăp tơnap, tơlơi bơngot phrâo amăng bruă pơhrui, mă yua ngăn drăp, ngă tui tơhnal pơkă pơđĭ kyar, pơhlôm hơđong prong bruă bơwih ƀong, ngă hơdư̆ đĭ nua gơnam hăng đĭ nua hơdôm mơta gơnam pioh pơhlôm tơlơi hơdip mơda kơ mơnuih ƀôn sang. Yua anun, Ping gah Khua pơ ala mơnuih ƀôn sang dêh čar, Grŭp mă bruă Ping gah Gong gai dêh čar amra gum hrŏm sit nik ba glăi bôh tơhnal, tơlơi pơkă hmao tlôn, djơ̆ tui tơlơi kiăng mơ̆ng bôh nik yua kơ tơlơi pơđĭ kyar bơwih ƀong – mơnuih mơnam, pơhlôm tơlơi hơdip mơnuih ƀôn sang hăng pơtrut đĭ kyar”.

Tơdơi kơ hmư̆ hơdôm tơlơi gum pơhiăp bơkơtuai, pơhiăp mơ̆ng ƀing Khua Ding jum, Khua gơnong bruă, Khua git gai Khul djuai ania, hơdôm Jơnum min mơ̆ng Khua pơ ala mơnuih ƀôn sang, Khua dêh čar ơi Phạm Minh Chính pơsit yôm tơlơi gum hrŏm mơ̆ng Ping gah Khua pơ ala mơnuih ƀôn sang hăng Grŭp mă bruă Ping gah Gong gah dêh čar jai hrơi jai klă hloh; brơi thâo, jơnum kiăng pel ĕp glăi bruă mă dô̆ gun, kiăng tŭ ư hrŏm, pioh pơtrut hăng pơđĭ tui anô̆ klă mơ̆ng tal jơnum. Yua anun, Khua dêh čar rơkâo dua bơnah khom hmâo tơlơi gum hrŏm klă mơ̆ng bruă čih pơkra hră pơ-ar, tơlơi pơtrun pơsit. Khua dêh čar ta ăt rơkâo mơn hơdôm Ding jum, hơdôm gơnong bruă gum hrŏm klă, gơgrong hlâo, gum hrŏm kơjăp hăng ba glăi bôh tơhnal hăng Khul djuai ania, hơdôm Jơnum min mơ̆ng Khua pơ ala mơnuih ƀôn sang dêh čar:

“Rơngiao kơ bruă khom pơplih pơkă, pơplih rơđah, jơlan gah, hơdră pơtrun mơ̆ng Ping gah pioh ƀing ta pơphun ngă tui. Ƀing ta pơplih phrâo dong tơlơi pơmin čih pơkra tơlơi phiăn, mơ̆ng kơnong kơ đing nao kơ bruă wai lăng, hơdai nao đing nao rah bruă wai lăng ba glăi bôh tơhnal, samơ̆ gum hơgôp tơlơi pơčeh phrâo pơđĭ kyar dong. Kâo ƀuh khom pơplih phrâo amăng hơdôm bôh ƀirô čih dăp hơdră, ăt kah hăng hơdôm bôh ƀirô hmâo tơlơi pơsit. Hluai tui anun, iâo pơhrui djop ngăn rơnoh. Ră anai, ngăn rơnoh mơ̆ng ƀing ta glăk gun hĭ. Ƀing ta kơnong kơ đing nao wai lăng bôh tơhnal lĕ klă biă. Khă hnun hai, hrŏm hăng anun, khom pok tơbiă jơlan gah phrâo, pơčeh phrâo kơ tơlơi pơđĭ kyar, kiăng iâo pơhrui djop ngăn rơnoh mơ̆ng mơnuih mơnam, mơnuih ƀôn sang”.

Khua dêh čar lăi lĕ, tui hluai kơ rơnoh mơ̆ng hơdôm rơwang bruă tơlơi phiăn pioh dưi ba tơbiă hơdôm tơlơi pơkă rơđah, samơ̆ hăng hơdôm tơlơi glăk pơplih, hmâo lu anô̆ bơdjơ̆ nao thơ tâ̆o hloh lăi pơthâo phun ñu. Bruă čih pơkra tơlơi phiăn khom dưi ngă tui pran jua, tơlơi hơget rơđah, truh rơnoh laih, dưi pơdah sit lĕ djơ̆, ngă tui ba glăi bôh tơhnal hăng hmâo lu mơnuih tŭ ư amra pơplih phrâo tơlơi phiăn. Bơ̆ hơdôm tơlơi akă truh rơnoh, akă rơđah, bôh nik dô̆ pơplih, dô̆ ngă tơnap, ƀu thâo him lăng thơ khin hơtai ngă pơphô hlâo, ngă rah, mă tŭ rah tơlơi găn rơgao, pok prong tui ƀơƀrư̆.

Klah čun bruă Jơnum, Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn rơkâo, hơdôm bôh ƀirô čih pơkra khom mơ-ĭt hră pơ-ar truh Khua pơ ala mơnuih ƀôn sang hlâo kơ lơ 1/10; amăng anun biă ñu đing nao 6 bôh yôm lăi glăi tal sa jơnum khom pơhlôm klă kơjăp./.