Kơ hơdôm boh yôm phun amăng bruă mă blan 2, Khua git gai pơ ala mơnuih ƀôn sang dêh čar rơkâo djop anom bruă, sang bruă prăp lui klă Jơnum mơ̆ng Jơnum min apăn bruă phun pơ ala mơnuih ƀôn sang dêh čar, him lăng či pơphun amăng pă hrơi; laih dơ̆ng lăng nao tong ten Hơdră mă bruă mơ̆ng Khul bruă ping gah amăng sang bruă khua pơ ala mơnuih ƀôn sang dêh čar, ngă tui Hră pơtrun jơnum ping gah dêh čar tal XIII. Sa boh yôm phun yôm hloh pơkŏn dơ̆ng lĕ, Jơnum abih bang đơ đam amăng dêh čar pơƀut bruă mă anom bruă pơ ala mơnuih ƀôn sang djop tơring čar, ƀôn prong him lăng pơphun ƀơi tơring čar Quảng Ninh.

Kơ boh yôm phun bruă mă 3 blan tal sa hăng abih ha thun anai, Khua git gai pơ ala mơnuih ƀôn sang dêh čar ơi Vương Đình Huệ rơkâo Jơnum min Tơlơi phiăn dăp hơdră, čih pơkra tơlơi phiăn, hră pơtrun kơ thun 2024, pơhrua nao Hơdră mă bruă čih pơkra tơlơi phiăn, hră pơtrun thun 2023, djop anom bruă pơkŏn prăp lui či ngă bruă, dăp bruă pioh lăi pơthâo hăng Jơnum min apăn bruă phun pơ ala mơnuih ƀôn sang dêh čar, ƀing khua mua pơ ala mơnuih ƀôn sang dêh čar tui hăng tơlơi dưi hơmâo jao.

Kơnong kơ Tơlơi phiăn Lŏn tơnah čih pơkra glăi, Khua git gai pơ ala mơnuih ƀôn sang dêh čar rơkâo djop sang bruă tui hluai tơlơi Hră pơtrun mơ̆ng Jơnum min apăn bruă phun pơ ala mơnuih ƀôn sang dêh čar mă hiăp mơnuih ƀôn sang djru pơgôp, tui hăng tơlơi gir run kơtang hloh, ngă giong bruă hăng pơdah thâo Jơnum min apăn bruă phun pơ ala mơnuih ƀôn sang dêh čar amăng blan 3. Pơdjơ̆ nao kơ bruă krăo lăng, Khua git gai pơ ala mơnuih ƀôn sang dêh čar ơi Vương Đình Huệ pok pơblang brơi tui anai:

“Pok pơhai lu hơdră krăo lăng amăng thun anai, 4 mơta bruă sa hnong krăo lăng yôm phun kah hăng: apui lơtrik, iâo jâo yua; hơdrôm hră pơtô hrăm, hơdrôm hră pơtô bruă; 3 hơdră tơhnal pơtrun mơ̆ng dêh čar; hơdôm bruă gah ia jrao, abih bang djop bruă anai lêng kơ tơnap hăng ječ ameč biă mă; khom ngă tui re se sem lăng tơlơi bơwih ƀong huă amăng dêh čar, djop anih anom sĭ mơdrô, yua prăk kăk, prăk dêh čar tač rơngiao, chứng khoán, anih anom sĭ mơdrô lŏn sang, anih sĭ mơdrô pơblih nua hră trái phiếu mơ̆ng sang bruă sĭ mơdrô. 

Sang bruă Khul wai lăng djuai ania ƀiă, djop jơnum min khom kơsem min ruah mă hơdôm bruă mă pơtum nao či ngă, lăi pơthâo tong ten, tơña lăng hơdôm tơlơi hơmâo ră anai, kah hăng pel ĕp pơsit hnong rơdêh prong sa tơlơi hang amăng tơngia. Hơdôm boh yôm anai, tơdah tơguan khua mua pơ ala mơnuih ƀôn sang dêh čar tơña lĕ kaih biă, anun khom ngă mơtam yơh. Yua kơ anun, Anom bruă wai lăng djuai ƀiă, djop sang bruă, anom bruă mơ̆ng Khua pơ ala mơnuih ƀôn sang dêh čar ruah mă hơdôm bruă mă kiăng ngă ječ, djơ̆ găl hăng tơlơi hơdip mơda bruă mă rĭm hrơi, anăm ôh ngă giong lui hnun, ƀu pioh glăi tơlơi pơhing pơpă ôh. Tơlơi hơmâo phrâo dơ̆ng ƀing ta khom hơmâo hơdră phrâo mơ̆n pơsir”.

Tui hăng akŏ bruă, Jơnum min apăn bruă phun pơ ala mơnuih ƀôn sang dêh čar, khua mua pơ ala amra tơña kơ bruă krăo lăng hơdôm tơlơi phrâo hơmâo amăng tơlơi hơdip mơda rĭm hrơi, Khua git gai pơ ala mơnuih ƀôn sang dêh čar pơtă, ruah mă hơdôm tơlơi djơ̆, tơlơi tơpă, hơmâo biă mă ăt kah hăng ăt kơsem min pioh pơblih phrâo hơdră ngă hăng hơdră či tơña.

“Tơlơi tơña ƀu djơ̆ tơña pơkhuer ƀing khua ding jum, khua anom bruă gưl dêh čar ôh mơ̆, hrom hơbit ngă rơđah hơdôm tơlơi kiăng pơsir djơ̆ lăp amăng tơlơi hơdip mơda hơmâo pơdah thâo. Khom pơhaih rơđah, tơpă, ngă klă djop bruă, hơduah ĕp jơlan hơdră djru pơsir hĭ tơlơi tơnap tap. Kơ bruă mă prăp lui djop tơhnal bruă sa hnong krăo lăng kơ thun pơ anăp, tui hăng kâo lĕ, ƀing ta khom ĕp lăng bruă ngă tui hră pơtrun kơ djop hơdră brơi rŭ glăi tơlơi bơwih ƀong huă, djop kơčăo bruă phun dêh čar, abih bang hră pơtrun mơ̆ng gơnong dlông, hră pơtrun mơ̆ng anom bruă khua pơ ala mơnuih ƀôn sang dêh čar;

 Giong anun Kơnuk kơna hơmâo ngă hră pơtrun kơ bruă ngă tui, akŏ bruă kiăng ngă; jŭ yap glăi djop bruă mă, hơdră mă bruă, ngă tui tơlơi phiăn pơtrun mơ̆ng Anom bruă wai lăng gah djuai ƀiă, djop jơnum min gah anom bruă khua pơ ala mơnuih ƀôn sang dêh čar, kơ bruă pok pơhai krăo lăng tui hăng hră pơtrun hơmâo pơtô brơi mơ̆ng Jơnum min apăn bruă phun pơ ala mơnuih ƀôn sang dêh čar, brơi ĕp lăng bruă mă Djop anom bruă pơ ala mơnuih ƀôn sang ƀơi tơring čar hăng djop gưl, ƀudah hơdôm bruă tuh pơ alin kơ bruă čar thun blan pơ anăp kiăng jŭ yap glăi abih bang, pioh ĕp phun ñu ngă hơgĕt rơnang blang, kơđông hĭ tui anun”.

Thun anai, khua mua pơ ala mơnuih ƀôn sang dêh čar amra plĕ hră pơsit glăi bruă mă, ƀing ngă khua pơprong yua kơ khua mua pơ ala mơnuih ƀôn sang dêh čar ruah hăng pơsit, yua kơ anun, Khua git gai pơ ala mơnuih ƀôn sang dêh čar lăi pơtong, bruă mă prăp lui pioh ƀing pơ ala mơnuih ƀôn sang dêh čar pơtong glăi hnong đăo kơnang ƀing khua mua anun, jing bruă glăm ba prong mơ̆ng Anom bruă wai lăng djuai ƀiă, djop jơnum min, djop anom bruă mơ̆ng Jơnum min apăn bruă phun pơ ala mơnuih ƀôn sang dêh čar.

Khua git gai pơ ala mơnuih ƀôn sang dêh čar pơtrun hiăp brơi prăp lui klă hăng čih pơkra lui hlâo tong ten boh yôm phun jŭ yap prăk kăk, pơkă rơnoh prăk kơnuk kơna dêh čar; bruă mă pơtom hiăp gah anom bruă pơ ala mơnuih ƀôn sang, amăng anun tal nao čuă dêh čar tač rơngiao mơ̆ng khua, hơdôm kơ-iăng khua git gai pơ ala mơnuih ƀôn sang dêh čar, jơnum khua mua pơ ala mơnuih ƀôn sang djop dêh čar ƀơi rŏng lŏn tơnah yua dêh čar ta pơphun jơnum.