Lơ 19/7, Grŭp lăng tui mơ̆ng Khua pơ ala mơnuih ƀôn sang yua kơ Thượng tướng Trần Quang Phương, Kơ-iăng Khua git gai wai lăng  pơ ala mơnuih ƀôn sang dêh čar ngă Khua Grŭp hmâo mông mă bruă hăng khua git gai tơring čar Dak Lak kơ bôh tơhnal pok pơhai ngă tui hơdôm Tơlơi pơtrun pơsit mơ̆ng Khua pơ ala mơnuih ƀôn sang hmâo: Jơlan hơdră pơkă mơng lŏn ia kơ pơdŏng plơi pla phrâo; jơlan hơdră hrŏ trun ƀun rin kơjăp phik rơwang 2021-2025 hăng jơlan hơdră pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng rơwang mơng 2021-2030.

Tơlơi lăi pơthâo glăi hăng grŭp hyu mă bruă, tơdơi giăm 3 thun pok pơhai ngă tui 3 jơlan hơdră pơkă mơ̆ng lŏn ia, ƀô̆ mơta plơi pla Dak Lak hmâo yak pơplih phrâo. Tơlơi hơdip mơda mơnuih ƀôn sang kual neh wa djuai ania ƀiă amăng ƀrư̆ dưi pơplih phrâo, bôh thâo – mơnuih mơnam hmâo lu tơlơi pơplih, mrô sang anô̆ ƀun rin jai hrơi jai hrŏ trun. Tơlơi hơdip mơda pran jua mơng mơnuih ƀôn sang dưi đing nao dong wot mrô hăng anô̆ kơjăp. Glông bruă kơđi čar dưi hơkrŭ đĭ hăng ngă giong hĭ. Hơđong bruă kơđi čar, hơđong pơhlôm mơnuih mơnam phun ñu dưi djă pioh kơjăp.

Khă hnun hai, hrŏm hăng hơdôm bôh tơhnal dưi ngă, lơm ngă tui 3 jơlan hơdră pơkă mơng lŏn ia ƀơi Dak Lak ăt bưp lu tơlơi tơnap, akă dưi ngă. Sa dua tơhnal pơkă kơčăo bruă tơnap dưi ngă djơ̆ tơlơi ba tơbiă. Anô̆ kơjăp hrŏ trun ƀun rin akă sit nik kơjăp phik, amra hmâo dong bruă pơkon hăng ƀun rin glăi prong.

Črâo tơbiă sa dua bôh than tơnap tap amăng ngă tui 3 jơlan hơdră pơkă mơng lŏn ia, ƀing khua pơ ala lăi lĕ: Mơnuih mă bruă hăng bôh thâo mơng ƀing apăn bruă pioh ngă tui hơdôm jơlan hơdră ƀơi gưl plơi pla dô̆ kơƀah hăng tơdu. Prăk mă yua ngă tui hơdôm jơlan hơdră pơpha kaih bơbeč truh rơnoh ngă tui, bôh tơhnal ƀu prong. Hrŏm hăng anun, sa dua rơwang bruă, bôh yôm črăn bruă mơ̆ng 3 jơlan hơdră pơkă mơ̆ng lŏn ia akă dưi pok pơhai hăng pơsir prăk lĕ yua kơ akă hmâo hră pơ-ar pơtô ba djơ̆ hrŏm, djop tum mơ̆ng dêh čar hăng hơdôm ding jum, gơnong bruă. Ơi Đinh Xuân Hà, Khua Gơnong bruă wai lăng kơčăo bruă hăng tuh pơplai tơring čar Dak Lak brơi thâo:

 “Hmâo laih sa dua mơta hră pơ-ar dưi pơplih pơkra, pơhrua nao, khă hnun hai ăt dô̆ bơrơkua mơn. Biă ñu hră pơ-ar anai pơtô, pơdah thâo truh hră pơ-ar pơkon, pơđok hră pơ-ar pơkon glăi tui sa hră pơ-ar pơkon dong. Rim sa črăn tơlơi kiăng lăi pha ra dong, lơm ngă tui rim anih anom glăi hmâo ƀirô thâo hluh tui jơlan gah pơkon dong”.

Khua git gai Ping gah tơring čar Dak Lak ơi Nguyễn Đình Trung ăt lăi hơdôm tơlơi tơnap, akă dưi ngă kah hăng: bruă jao lŏn kơ neh wa djuai ania ƀiă dô̆ bưp lu tơlơi gun, kiăng hmâo hơdră lăp djơ̆ hăng bôh nik; tơlơi mơnuih apăn bruă gơgrong bruă ƀơi plơi pla ăt kiăng lu hơdră bruă lăp djơ̆ hăng pha ra kơ Dap Kơdư; bôh yôm, pô hơdôm jơlan hơdră amăng rơwang 2021-2025 hmâo lu mơta tơlơi phrâo anun bruă pel ĕp glăi, pơsit tơhnal pơkă yap anih pơpha, pơsit anăn păn rơwang bruă tuh pơplai dô̆ luk puk...

Pơhiăp amăng mông mă bruă, Thượng tướng Trần Quang Phương, Kơ-iăng Khua git gai wai lăng pơ ala mơnuih ƀôn sang dêh čar ta djă pioh hăng pơsit yôm bôh tơhnal pok pơhai hơdôm jơlan hơdră pơkă mơng lŏn ia mơ̆ Dak Lak dưi ngă. Hrŏm hăng anun, hăng pran jua lăng tui lĕ pơčeh phrâo kiăng gum hrŏm pơtlaih tơnap, hluai tui jơlan hơdră mă bruă ƀơi tơring čar, Kơ-iăng Khua git gai wai lăng pơ ala mơnuih ƀôn sang rơkâo:

 “Ƀing khua mua git gai tơring čar kiăng hmâo tơlơi črâo ba tŭ mă, hmâo tơlơi lăi pơthâo glăi pơhrua tum djop hơdôm tơlơi gum pơhiăp mơ̆ng grŭp hyu mă bruă hăng ding kơna, pơjing hơdôm anăn păn bôh yôm dô̆ gun rơkâo đĭ dong. Dua lĕ, đing nao črâo ba dơlăm hloh dong, kơtưn bruă mă mơng grŭp črâo ba hăng gum hrŏm kơjăp hmao tlôn kơplah wah ƀirô anom bruă, iâo pơhrui pran kơtang pơƀut glăi pioh amăng ƀrư̆ pơplih tơlơi phiăn juăt ngă đang hmua pioh pơđĭ kyar bơwih ƀong mơnuih mơnam”.

Hơdôm hrơi rơgao, Khua pơ ala mơnuih ƀôn sang hmâo pok pơhai ngă tui Kơčăo bruă pel ĕp, lăng tui tơlơi ngă tui hơdôm jơlan hơdră pơkă mơ̆ng lŏn ia thun 2023 ƀơi 3 kual. Rơđah biă ñu lĕ: Pel ĕp, hơduah ĕp lăng bôh nik hăng mă bruă ƀơi anăp pơkĕ hrŏm lăng nao rai mơ̆ng ataih hăng 14 bôh tơring čar kual Tŏng krah dêh čar hăng Kual čư̆ siăng Kơdư dêh čar ƀơi tơring čar Yên Bái; Pel ĕp, hyu hơduah lăng bôh nik hăng mă bruă ƀơi anăp pơkĕ hăng lăng nao rai mơ̆ng ataih hăng 19 bôh tơring čar kual Kơdư Tŏng Krah hăng Kual Kơtuai hang ia rơsĭ Tŏng krah hăng kual Čư̆ Siăng ƀơi tơring čar Bình Định; Pel ĕp, hyu hơduah lăng bôh nik hăng mă bruă ƀơi anăp pơkĕ hrŏm lăng mơ̆ng ataih hăng 13 bôh tơring čar kual Lŏn dăo ia krông Cửu Long ƀơi tơring čar Bạc Liêu.

Kơ-iăng Khua dêh čar ăt jao mơn kơ Ding jum kơčăo bruă hăng tuh pơplai git gai, gum hrom hăng hơdôm Ding jum, ƀirô: Đang hmua hăng pơđĭ kyar ƀôn lan, Mơnuih mă bruă tơhan rơka ruă hăng mơnuih mơnam, Jơnum min djuai ania hăng hơdôm Ding jum, ƀirô, tơring čar bơdjơ̆ nao prăp lui Tơlơi lăi pơthâo glăi, hră pơ-ar pioh kơ hơdôm mông mă bruă hăng hơdôm tơring čar, amăng anun đing nao pơsit hơdôm tơlơi găn rơgao, lăi pơthâo hơdôm hơdră ngă klă, pơčeh phrâo amăng bruă pơdŏng, ngă giong hơdră pơkă, hơdră bruă hăng pơphun pok pơhai, pơsir prăk ngă tui hơdôm jơlan hơdră pơkă mơng dêh čar ƀơi tơring čar; pel ĕp tŏng ten, thâo hơdôm tơlơi tơnap, tơlơi gun kiăng ba ơtbiă, rơkâo đĭ hơdôm jơlan gah rơđah kiăng pơtlaih, pơtrut tañ rơnoh pok pơhai ngă tui. Anom bruă Gong gai dêh čar gum hrom hăng hơdôm Ding jum, ƀirô, tơring čar bơdjơ̆ nao prăp lui bôh yôm, jơlan hơdră hăng tơlơi kiăng pơkon pioh pơphun ngă tui kơčăo bruă./.