Ƀơi mông ngă bruă, tơdơi kơ hmư̆ pô pơ ala Kơnuk kơna hăng Grup khua wai lăng Lăi pơthâo bruă ngă tui hăng Hră lăi pơthâo tơlơi pơtŏng glăi blung a mơ̆ng Grup Wai lăng kơ Tơlơi pơsit mrô 88 hăng tơlơi pơsit mrô 51 mơ̆ng Khua mua pơ ala mơnuih ƀôn sang kơ pơplih phrâo jơlan hơdră, hơdrôm hră pơtô čơđai, ƀing khua wai lăng hăng khua pơ ala bơkơtuai kơ hơdôm tơlơi hơmâo lăi nao amăng 2 pok hră. Amăng anun, hơmâo hơdôm bruă kah hăng: pơtŏng glăi Jơlan hơdră abih bang hăng hơdôm tơlơi hrăm; Kơ bruă pơplih hơdră pơtô, hơdră pơtŏng anŏ klă bruă pơtô hrăm; Bruă čih pơkra, pơsit, ba sĭ hăng nua sĭ hơdrôm hră; Tơlơi hơmâo sit nik hăng tơlơi rơkâo đĭ hăng bruă bơdjơ̆ nao nai pơtô; gơnam pơtô hrăm bơwih brơi jơlan hơdră hrăm phrâo.

Pơhiăp ƀơi mông ngă bruă, Kơ-iăng khua pơ ala mơnuih ƀôn sang dêh čar ơi Trần Thanh Mẫn pơsit, hơdôm tơlơi pơgôp hiăp lăi tơpă, abih pran jua ngă bruă. Grup krăp lăng pơsit djŏp hăng amra kơsem min, ngă pơgiong Hră lăi pơthâo glăi boh than wai lăng laih anun Tơlơi phiăn kiăng Jơnum min apăn bruă pơ ala mơnuih ƀôn sang dêh čar sit nik pơphun wai lăng bruă ƀơi mông Jơnum blan 8/2023. Hăng tơlơi pơgôp hiăp mơ̆ng Grup wai lăng hăng pô pơ ala hơdôm anom bruă, ding jum bơkơtuai ƀơi mông mă bruă, rơkâo Kơnuk kơna kơsem min, pơhmư̆ djŏp tơlơi lăi pơthâo či ngă pơgiong hră lăi pơthâo glăi, pơkra glăi dŏp mơ-it kơ Grup wai lăng. Kơ-iăng khua pơ ala mơnuih ƀôn sang dêh čar ơi Trần Thanh Mẫn kiăng Kơnuk kơna lăng ba 5 tơlơi, bruă yôm phun, amăng anun hơmâo bruă gah nai pơtô:

“Kơ ƀing nai pơtô, anai lĕ mơnuih yôm phun pơhlôm bruă pơtô hrăm tui jơlan hơdră phrâo dưi hă ƀŭ. Rơkâo Kơnuk kơna ta git gai hơdôm anom bruă bơdjơ̆ nao sem lăng, pơtŏng glăi abih bang, tơlơi kiăng pơđĭ kyar nai pơtô amăng hrơi blan pơ anăp hăng hơmâo hơdră ngă bruă lăp djơ̆, hmao tlôn pơsir hĭ bruă kơƀah nai pơtô hăng ruah nai pơtô; pơđĭ tui bruă pơtô pơjuăt, pơtô brơi dong kơ nai pơtô kiăng djơ̆ hăng Jơlan hơdră pơtô hrăm thun 2018”.

Kơ-iăng khua pơ ala mơnuih ƀôn sang dêh čar ơi Trần Thanh Mẫn ăt kiăng Kơnuk kơna lăng ba sem lăng, pơtŏng glăi hăng him lăng hlâo tơlơi kiăng gah gơnam yua, gơnam pơtô hrăm; hơmâo hơdră djru ba hơdôm boh tơring pơsir hĭ tơnap tap, gun găn amăng bruă pơphun ngă. Ăt kiăng djru ngă hlâo, brơi prăk kăk kơ bruă pơtô hrăm djơ̆ hăng tơlơi pơtrun; laih dong, hyu pel ĕp, wai lăng bruă ngă tui jơlan hơdră pơtô hrăm phrâo, hơdrôm hră pơtô phrâo.

Hlâo kơ anun, amăng blan 4/2023, grup krăp lăng mơ̆ng Jơnum min apăn bruă pơ ala mơnuih ƀôn sang hơmâo ngă bruă hăng Ding jum pơtô hăng pơjuăt kơ bruă ngă tui Tơlơi pơsit mrô 88 hăng Tơlơi pơsit mrô 51 mơ̆ng Ƀirô khua pơ ala mơnuih ƀôn sang kơ pơplih jơlan hơdră pơtô, hơdrôm hră pơtô. Grup krăp lăng bruă ăt ƀuh hơdôm bruă kiăng ngă rơđah, amăng anun kiăng pơhlôm prăk pioh ngă jơlan hơdră ăt kah hăng anŏ dưi ngă kiăo tui tơlơi kiăng abih bang mơnuih lăng ba bruă pơtô hrăm. Yă Vũ Thị Lưu Mai, Kơ-iăng khua Jơnum min prăk kăk - Prăk pioh yua mơ̆ng Ƀirô khua pơ ala mơnuih ƀôn sang dêh čar hơmâo tơlơi pơgôp hiăp:

“Amăng lu bruă lĕ ƀing ta dưi iâu pơthưr abih bang mơnuih gum ngă, samơ̆ hăng bruă pơtô pơjuăt lĕ bruă iâu pơthưr abih bang anom bơwih ƀong phara gum ngă amra bưp lu tơlơi tơnap biă. Yua hnun, tơdah ƀing ta iâu pơthưr abih bang mơnuih gum ngă jing gêh gal hăng tơnap tap hiư̆m pă, ăt khŏm lăi pơthâo glăi hăng Kơnuk kơna ăt khŏm lăi glăi tơlơi tơña anŏ klă lơ̆m iâu pơthưr abih bang ngă 2 Tơlơi pơtrun mơ̆ng Khua pơ ala mơnuih ƀôn sang dêh čar”.

Amăng blan 6 laih rơgao, Khua git gai pơ ala mơnuih ƀôn sang ơi Vương Đình Huệ git gai jơnum ngă bruă mơ̆ngkhua mua pơ ala hăng Grup krăp lăng bruă mơ̆ng Jơnum min apăn bruă pơ ala mơnuih ƀôn sang kơ “Bruă ngă tui Tơlơi pơsit mrô 88 hăng mrô 51 mơ̆ng Ƀiro khua pơ ala mơnuih ƀôn sang dêh čar kơ pơplih jơlan hơdră, hơdrôm hră pơtô čơđai”. Anai jing sa amăng 4 akŏ bruă krăp lăng mơ̆ng Khua mua pơ ala mơnuih ƀôn sang, Jơnum min apăn bruă pơ ala mơnuih ƀôn sang amăng thun 2023. Khua git gai pơ ala mơnuih ƀôn sang dêh čar bơni biă kơ Grup krăp lăng hơmâo ngă klă hơdôm tơlơi pơsit mơ̆ng khua pơ ala mơnuih ƀôn sang dêh čar hăng Jơnum min apăn bruă pơ ala mơnuih ƀôn sang, ngă klă, hơmâo tơlơi git gai, krăp lăng, gơgrong bruă hăng hră pơ-ar mơ̆ng Khua grup krăp lăng, Kơ-iăng khua git gai pơ ala mơnuih ƀôn sang dêh čar ơi Trần Thanh Mẫn.