Pơgôp hiăp kơ Tơlơi pơtrun hrŏm kơplah wah Jơnum min apăn bruă khua pơ ala mơnuih ƀôn sang dêh čar hăng Khul khua Jơnum min djŏp djuai ania mơnuih mơnam (iâu klah čun lĕ tơlơi pơtrun mrô 525) kơ bruă bưp mơnuih ƀôn sang mơ̆ng ƀing khua pơ ala mơnuih ƀôn sang, ƀing khua črâo rơđah bruă “ƀing khua nao bưp mơnuih ƀôn sang samơ̆ kơnong dŏ pơhmư̆ đôč”. Khua anom bruă pơtô ba mơnuih ƀôn sang ơi Dương Thanh Bình brơi thâo, amăng 10 thun ngă tui Tơlơi pơsit mrô 525, lu khua pơ ala prăp rơmet bruă bưp mơnuih ƀôn sang hăng lu hơdră phara; pơƀut, kơsem min hăng mơ-it tơlơi pơgôp hiăp pơ hơdôm anom bruă dưi pơsir. Khă hnun, Kơ-iăng khua pơ ala mơnuih ƀôn sang ơi Trần Quang Phương lăi rơđah, bruă kiăng pơplih hơdră bruă, ăt kah hăng pô bưp mơnuih ƀôn sang, lăp đing nao hơmâo bruă “ƀing khua nao bưp mơnuih ƀôn sang samơ̆ kơnong kơ dŏ pơhmư̆ đôč”.

“Bưp mơnuih ƀôn sang ră anai lĕ “mơnuih ƀôn sang prong soh” juăt ñu ƀing ngă khua, mơnuih mă bruă mơ̆ng djŏp gưl, anom bruă mơ̆ng să, đa lĕ khua tơhan hơkrŭ đưm, mơnuih pơdơi lơtret, ƀu hơmâo bưp abih bang ôh. Bruă bưp hơmâo lu mơta mơn: bưp na nao, bưp kiăo tui akŏ bruă, bưp lăng mơ̆ng ataih amăng tivi, bưp ƀơi anăp...jing khŏm kiăng pơplih phrâo. Bruă tum pơƀut tơlơi pơgôp hiăp mơ̆ng mơnuih ƀôn sang ruah khua, pơsir hĭ hăng lăi glăi tơlơi rơkâo đĭ laih anun wai lăng bruă lăi glăi anun”.

Bơ Kơ-iăng khua git gai pơ ala mơnuih ƀôn sang dêh čar ơi Nguyễn Khắc Định lăi nao tơlơi hơmâo sit nik pơkŏn dong:

“Hơmâo tơring čar kiăo tui grup khua pơ ala nao pơ anih plĕ hră ruah khua laih anun nao na nao amăng abih rơwang thun ngă bruă mơtăm yơh. Tui anun, 3 čô khua tơbiă anăn ba ruah ƀơi 3 boh tơring čar plih nao plih rai ƀơi 3 boh tơring čar anun yơh. Sa čô khua đĭ pơhiăp, sa čô mơnuih ngă bruă anet đôč, ƀơi anŏ ñu kơnong dŏ pơhmư̆ mơ̆ng blung truh kơ abih mông. Bơ khua prong hloh tơgŭ pơmư̆, lăi glăi. Yua tui anun yơh, hơmâo ƀing khua nao bưp mơnuih ƀôn sang mơ̆ kơnong kơ dŏ pơhmư̆ đôč, anai lĕ tơlơi hơmâo sit”.

Ƀing khua pơgôp hiăp hăng hơdôm boh tơring čar hơmâo lu khua pơ ala anun kah pơpha jing lu grup kiăng hơmâo mrô mơnuih hăng tal bưp mơnuih ƀôn sang lu hloh. Laih dong, amăng hrơi bưp mơnuih ƀôn sang juăt pơƀut lăi nao bruă hrăm hră, bruă mă, lŏn tơnah...hơdôm bruă yua tơring čar dưi pơsir, hơdôm bruă bơdjơ̆ nao tơlơi dưi mơ̆ng mơnuih ƀôn sang. Yua hnun, kiăng hơmâo khua tơring nao pơhmư̆ mông bưp mơnuih ƀôn sang đah mơ̆ng pơhmư̆ tơlơi pơgôp hiăp, hơdôm bruă yua ƀing gơñu dưi pơsir brơi.

Ƀơi mông jơnum, khua git gai pơ ala mơnuih ƀôn sang dêh čar ơi Vương Đình Huệ lăi: Khua pơ ala mơnuih ƀôn sang dêh čar jing mơnuih pơ ala brơi tơlơi kiăng khăp mơ̆ng mơnuih ƀôn sang ƀơi anih ruah ta ngă khua laih anun mơ̆ng mơnuih ƀôn sang đơ đam dêh čar, gơgrong bruă hăng mơnuih ƀôn sang wơ̆t hăng ƀơi anăp Khua pơ ala mơnuih ƀôn sang. Yua hnun, bruă bưp mơnuih ƀôn sang ƀu kơnong anom bruă ruah khua đôč ôh mơ̆ ăt hơmâo ƀơi anih mă bruă dong:

“Amăng tơlơi pơkă kơ khua pơ ala mơnuih ƀôn sang ăt lăi mơn khua pơ ala khŏm pơhiăp tom kơjăp hăng mơnuih ƀôn sang, pơhmư̆ tơlơi pơgôp hiăp mơ̆ng mơnuih ƀôn sang. Tơlơi phiăn khua pơ ala mơnuih ƀôn sang pơkra glăi thun 2020 hơmâo lăi: ƀing pơ ala mơnuih ƀôn sang dêh čar khŏm bưp mơnuih ƀôn sang na nao, hơduah ĕp tơlơi kiăng mơ̆ng mơnuih ƀôn sang. Ƀing khua pơ ala bưp mơnuih ƀôn sang kiăo tui jơlan hơdră bưp mơnuih ƀôn sang mơ̆ng grup khua pơ ala mơnuih ƀôn sang jing ha mơta. Mơta dua dong lĕ bưp mơnuih ƀôn sang ƀơi anih dŏ, anih mă bruă. Tơlơi pơsit pơ anăp anai ăt khŏm lăi rơđah tơlơi anai, bruă bưp hiư̆m pă khŏm pơtô brơi rơđah”.

Jơnum min apăn bruă pơ ala mơnuih ƀôn sang dêh čar tŭ ư čih pơkra, pơhrui tui Tơlơi pơsit mrô 525, ba pơmut amăng jơlan hơdră čih pơkra Tơlơi pơsit mơ̆ng Jơnum min apăn bruă pơ ala mơnuih ƀôn sang, jao kơ Anom bruă lăi glăi tơlơi kiăng mơ̆ng mơnuih ƀôn sang git gai ngă hrŏm hăng hơdôm anom bruă bơdjơ̆ nao či čih pơkra Tơlơi pơsit djơ̆ hăng tơlơi phiăn.

Ăt ƀơi mông jơnum tal anai mơn, Jơnum min apăn bruă pơ ala mơnuih ƀôn sang dêh čar sem lăng tơlơi lăi pơthâo bruă hơduah tơña tơlơi kiăng mơ̆ng mơnuih ƀôn sang mơ̆ng Ƀirô pơ ala mơnuih ƀôn sang blan 5 hăng blan 6 phrâo rơgao. Khua Jơnum min Tơlơi phiăn yă Lê Thị Nga lăi pơthâo tơlơi hơmâo sit nik amĭ ama čơđai sang hră dŏ tơguan truh mlăm či nô̆p hră pơ-ar kơ ană bă hrăm anih 10, anun jing tơlơi gêh tơnap biă hăng ƀing čơđai.

“Tơlơi gleh hăng ƀing čơđai hrăm anih 10 ƀơi Hà Nội, ƀôn prong Hồ Chí Minh lĕ jing bruă hơmâo amăng lu thun laih. Pơplông hrăm anih 10 ră anai jing tơnap hloh kơ hrăm Đại học. Hiư̆m, ƀing ta kơƀah lu đơi sang hră gưl 3 hă, laih anun tơlơi anai ta pơsir hiư̆m? Kơnuk kơna git gai kiăng Ding jum pơtô pơjuăt lăi pơthâo lĕ gơmơi kiăng lăi nao tơlơi anai hai amăng hră lăi pơthâo bruă hơduah tơña tơlơi kiăng mơ̆ng mơnuih ƀôn sang”.