Tơlơi pơtrun Jơnum ping gah dêh čar tal 13 pơsit laih: Pơđĭ kyar abih bang hăng pơjing rai tơlơi pơlir hơbit amăng kual; laih dong hơmâo jơlan pơđĭ kyar kual tui hơdră “mă yua klă hloh hăng pơtrut tui klă hloh hơdôm tơlơi gêh gal mơng rim kual” kơ man pơkra anih anom, ayuh hyiăng lŏn adai, tơlơi bơwih ƀong huă - kơđi čar, mơnuih mă bruă hăng pơtrut nao rai pơlir hơbit amăng kual hăng kual pơkŏn či pơkra rai nua gơnam đơ đam rŏng lŏn tơnah, hơmâo anih pơđĭ kyar phrâo.

Kiăng pơtruh nao rai kual lĕ phun ñu khŏm hơmâo anih anom ngă bruă. Tui hăng ơi Trần Văn Hảo - Khua gơnong bruă tuh tia pơkra gơnam tơring čar Hải Dương, amăng bruă man pơdong, phun ñu lĕ jơlan nao rai mơ-ak, pơtruh nao rai hơdôm anih amăng kual laih anun pơtruh hăng kual pơkŏn ăt kah hăng pơkra rai anih anom yôm pơkŏn dong:

“Rơkâo hơdôm Ding jum, anom bruă Ping gah, Jơnum min mơnuih ƀon sang tơring čar, ƀon prong tañ pơtrut bruă man pơkra jơlan nao rai pơtruh hơdôm boh tơring čar, ƀon prong amăng kual kiăng pơtruh nao rai kual kơtang hloh, pơđĭ kyar anih pơkra măi mok, sang bruă pơtruh nao rai bơwih ƀong hăng anih anom hiam hơmâo sang măi pơkra gơnam, bơwih bơwang; lăng ba tuh pơ alin man pơkra phrâo ƀudah pok prong anom bruă Logictics prong ƀơi Hải Phòng, Quảng Ninh, Hà Nội, Hải Dương hăng hơdôm boh tơring čar dưi ngă či man pơdong anom bruă Logictics pơtruh nao rai, pơđĭ kyar hăng pơtrut tui tơlơi dưi djru nao rai tơdruă, tŭ yua hloh, plai ƀiă rơngiă prăk kơ hơdôm anom bơwih ƀong, pơđĭ tui tơlơi pơhno nao rai, ngă gêh gal brơi bruă pơđĭ kyar amăng kual...

Mơng tơlơi hơmâo sit nik mơng Kual lŏn dăo ia krông Hồng - anih yôm biă mă gah kơđi čar, bơwih ƀong, gru grua, mơnuih mơna, pơgang lŏn ia, rơnuk rơnua hăng pơtom hiăp hăng čar rơngiao. Hăng phun ñu lĕ plơi prong jưh jom Hà Nội - jing sa amăng 2 anih akŏ phun ba jơlan bơwih ƀong huă, pơđĭ kyar hloh mơng lŏn ia, thun blan rơgao, yua hơmâo tơlơi pơtruh nao rai, ngă hrŏm, anun jing hơdôm boh tơring amăng kual lŏn dăo ia krông Hồng pơđĭ kyar phara hloh kơ jơlan nao rai, logistics...Khă hnun hai, tui hăng yă Lê Việt Nga - Kơ-iăng khua wai lăng anih sĭ mơdrô, Ding jum tuh tia pơkra gơnam ăt dŏ hơmâo lu bruă mơ̆ gong gai tơring čar ƀon prong amăng kual kiăng ngă hrŏm pơlir hơbit pok pơhai gum ngă, tui anun kah mơng dưi pơplih phrâo klă hloh bruă sĭ mơdrô mơng kual hăng amăng đơ đam lŏn ia mơtăm:

“Hơmâo hơdôm bruă mơ̆ ƀing gơmơi lăng pơtruh nao rai kual ăt aka ƀu mă yua abih tơlơi gêh gal ôh. Pơhmutu bruă dưm dăp pơdong anih Logistics lĕ kual lŏn ia krông Hồng hơmâo lu tơlơi gêh gal, hơmâo djru ba biă mă yơh lơ̆m Khua dêh čar pơsit laih ƀơi Tơlơi pơtrun mrô 1012 thun 2015 kơ kual ia krông Hồng, hơmâo sang anom bruă Logictics mrô sa pơdong ƀơi Pơngŏ Hà Nội; Anom bruă Logistics mrô 2 hơmâo pơdong ƀơi Dơnung Hà Nội; laih anun thun 2030 ăt hơmâo mơn anom bruă Logistics prong truh kơ 50 ha hơmâo pơtruh nao rai hơdôm boh tơdrun tum păn - tơdron rơdêh por truh kơ tơdrun ia rơsĭ amăng kual, samơ̆ truh ră anai ƀing ta aka ƀu hơmâo ôh. Yua hnun bruă pơhưč tuh pơ alin gah bruă anai kiăng abih bang pơtruh nao rai kah mơng dưi”.

Tŭ ư hăng tơlơi pơmin anai, samơ̆ yă Trần Thị Phương Lan - Khua jăng jai gơnong bruă tuh tia pơkra gơnam ƀon prong Hà Nội lăi nao tơlơi gơgrong bruă mơng Ding jum tuh tia pơkra gơnam amăng bruă man pơkra Logistics pơtruh nao rai amăng kual hăng kual pơkŏn:

“Tui hăng kâo pơmin, lu tơring čar amăng kual dưi pơđĭ kyar Logistics gah jơlan nao rai ƀơi lŏn, jơlan rơdêh por, jơlan ia rơsĭ, ia krông...yua hnun kâo kiăng gah bruă anai lĕ Ding jum tuh tia pơkra gơnam amra gơgrong bruă phun pơtô brơi hơdôm boh tơring čar, laih anun ƀing ta črâo rơđah hơdôm anih kiăng pơđĭ kyar hŭi bơrơkua nao rai, laih anun pơtrut tui tŭ yua, mă yua abih hơdôm glông jơlan mơ̆ ƀing ta gêh gal hloh amăng kual”.

Bruă ngă hrŏm kơplah wah hơdôm boh tơring čar amăng kual pioh man pơdong anih anom yôm kah hăng jơlan nao rai, pơdŭ pơgiăng, logistics, anom bruă sĭ mơdrô amra ngă amuñ brơi bruă pơgiăng gơnam tam, ba hyu gơnam. Ơi Triệu Đăng Khoa - Khua anom ngă ƀong hrŏm Chạm bạc Đồng Xâm (gah Plơi pơkra gơnam Chạm bạc Đồng Xâm, tơring glông Kiến Xương, Thái Bình) lăi lĕ:

“Lơ̆m pơtruh nao rai lĕ amra ngă amuñ yơh bruă ba sĭ gơnam tam mơng plơi pơkra gơnam chạm bạc Đồng Xâm yua dah abih bang lêng kơ thâo, abih bang bruă nao rai sĭ mơdrô amuñ hloh jing djru gơnam pơkra mơng chạm bạc Đồng Xâm amra hơmâo lu mơnuih hmư̆ hing hloh”.

Tui hăng kơhnâo bơwih ƀong, Kơ-iăng nai tha prin, nai prin tha Trần Đình Thiên, tơdơi kơ hơmâo anih pơtruh nao rai, kiăng pơtruh nao rai sit nik kiăng hơdôm anom bơwih ƀong amăng tơring čar ngă hrŏm pơtruh nao rai:

“Tơlơi blung a tơdơi kơ pơtruh kual ta khŏm akŏ pơdong anom bruă pơkra gơnam, ngă hiư̆m pă kiăng hơdôm anom bruă, tơring čar dưi pơtruh nao rai. Bruă blung a lĕ ta lăng nao pơ anăp hơdôm tơlơi gêh gal lơ̆m čuk pơkra man pơdong anih anom amăng kual, khŏm pơdong anih pơđĭ kyar bruă bơwih ƀong, tui anun kah mơng dưi pơtruh nao rai. Mơng tơlơi bơwih ƀong huă jing ngă kơ anom bơwih ƀong khŏm tuh pơ alin yơh, tuh pơ alin khŏm pơtruh nao rai. Tal dua dong kơ tơlơi pơkôl pơkă, tơlơi phiăn, mơng hlâo ƀing ta hơmâo kual lĕ kual lŏn đôč đač, bơ kual pơđĭ kyar bơwih ƀong lĕ ta aka ƀu hơmâo tơlơi phiăn ôh. Khŏm hơmâo kơčăo bruă pơđĭ kyar kual pơhlôm brơi kơčăo bruă anun pơtruh nao rai amăng kual ƀu dưi kơđông hĭ...bơ tui ră anai kơplah wah dua boh tơring čar ataih mă ha tơlŏ ƀrik đôč, samơ̆ ƀu thâo pơtruh nao rai ôh”.

Rơđah yơh, tơlơi phun ñu lĕ čih pơkra, ngă pơgiong tơlơi phiăn laih anun pơplih na nao anih tuh pơ alin mơng rim boh tơring čar ƀon prong truh pơ kual laih anun pơtruh nao rai kual, mơng anun ngă gêh gal pơhưč tuh pơ alin pơđĭ kyar anih anom hơmâo măi mok boh thâo phrâo tui hăng tơlơi rơkâo mơng yă Nguyễn Thị Bích Ngọc, Kơ-iăng khua Ding jum man pơphô bruă hăng tuh pơ alin:

“Kơnuk kơna rim thun ăt pơtrun laih tơlơi Pơsit mơng Kơnuk kơna kơ pơplih klă anih tuh pơ alin sĭ mơdrô. Yua hnun, gơmơi kiăng hơdôm boh tơring čar amăng kual pơƀut pok pơhai tŭ yua hơdôm tơlơi pơsit anai kiăng pơplih klă tui bruă ngă hră pơ-ar, ngă gêh gal pơhưč tuh pơ alin pơđĭ kyar anih anom. Hơdôm boh tơring čar amăng kual pơtruh nao rai, pơphun jơnum tuh pơ alin tui kual, hăng čih pơkra, pơtrun kơčăo bruă pơhưč tuh pơ alin tui jơlan PPP rơwang thun 2021-2030 hơmâo hơdôm tơlơi pơkă, hơdră djru ngă gêh gal brơi kiăng ngă pơhưč anom bruă hơjăn pô, anom bơwih ƀong prong tuh pơ alin, thâo hluh hăng đăo gơnang lơ̆m tuh pơ alin pơkra anih anom...”.