Khul pơsur hrăm hră Việt Nam hăng 23 klăk čô mơnuih apăn bruă, ding kơna glăk jơnum pơƀut hrŏm ƀơi giăm 140 rơbâo khul grup hăng 125 rơbâo anom pơsur hrăm hră. Amăng hrơi blan laih rơgao, djop gưl amăng Khul lêng lĕ anom bruă akŏ phun amăng pơtrut pơsur abih bang mơnuih mut hrŏm amăng bruă pơhrăm truh djai ba. Sit biă ñu, thun 2022, keh prăk pơsur hrăm hră rơgơi Việt Nam hơmâo pơkra ming hơdôm anih pơtô hrăm, jao prăk djru hrăm hră brơi ƀing čơđai ƀun rin, čơđai sang hră rơgơi hăng ƀing mơnuih pơprong gir run hrăm tui arăng hăng abih tih rơbêh 12 klai prăk.

Đĭ pơhiăp amăng mông mă bruă, Kơ-iăng khua dêh čar ơi Trần Hồng Hà čang rơmang Khul pơsur hrăm hră Việt Nam hăng pran jua hur har hăng abih pran tŏ tui gum pơgôp amăng bruă pơtô hrăm, pơđĭ kyar mơnuih mă bruă. Ngă tui klă bruă jao lĕ akŏ phun pơjing mơnuih mơnam gir hrăm hră, pơđĭ kyar hơbô̆ bruă hrăm hră: sang anŏ, kơnong djuai gir hrăm hră, plơi pla, anom bruă gir hrăm hră.