Sa amăng hơdôm bruă hơmâo mơnuih ƀon sang ruah khua An Giang lăp đing nao anun lĕ pơtô pơjuăt. Lu mơnuih ƀon sang lăng nao biă kơ bruă pơtô hrăm klă, biă ñu hăng bruă pơplih hơdră pơtô hrăm amăng thun blan rơgao. Lu tơlơi pơgôp hiăp lăi, hrơi blan rơgao, bruă pơplih hơdră pơtô hrăm jing ba glăi boh than blung a laih, bruă hrăm hră hơmâo pơplih klă tui, plai ƀiă bruă pơtô kiăng kơ hơmâo arăng bơni mơ̆ čơđai hrăm thâo sit ñu ƀiă đôč.

Hăng bruă pơtô hrăm abih bang, lu mơnuih ƀon sang lăi: bruă pơplih phrâo hơdră pơtô hrăm ră anai glăk hơmâo lu tơlơi aka ƀu djơ̆ mơn; jơlan hơdră pơtô hrăm phrâo ră anai ƀơi hơdôm boh sang hră, djŏp gưl hrăm aka ƀu dlăm, aka ƀu djơ̆ hrŏm; hơdrôm hră pơtô aka ƀu kiăo tui anŏ klă mơng hơdrôm hră hơđăp, ƀu kơnong ngă rơngiă prăk kăk amĭ ama ƀing čơđai hăng ƀing čơđai đôč ôh mơ̆ ăt prai khưi khai mơn prăk kăk mơnuih mơnam. Rơngiao kơ anun, ƀing čơđai sang hră kơƀah anih ngui ngor hrăm hră klă hiam. Mrô čơđai amăng sa anih hrăm dŏ lu đôč, mơng anun jing ngă kơ nai pơtô ƀu dưi pơtô tong ten đơi ôh, anun jing bruă pơtô hrăm aka ƀu tui hăng tơlơi ƀing ta kiăng...Mơnuih ƀon sang  Nguyễn Văn Tùng, dŏ ƀơi tơring kual Vĩnh Bình, tơring glông Châu Thành lăi.

“Čơđai sang hră mông anai, abih bang 50% bruă hrăm hơdip hiam aset biă mă. Kâo kiăng khua mua pơ ala mơnuih ƀon sang, anom bruă pơtô hrăm kiăng hơmâo hơdră pơtô hrăm tơlơi hơdip hiam, tơlơi pơmin hiam ƀơ̆i hlâo, kiăng tơdơi anai gơñu jing mơnuih rơgơi hơmâo tơlơi pơmin hiam. Bruă pơplih hơdrôm hră pơtô, ƀing rơgơi kơhnâo, nai prin tha hơmâo pơmin ruă akŏ hlâo, hyu ĕp, čih pơkra hơdrôm hră pơtô glăi gru grua boh thâo hiam kơ ƀing čơđai, samơ̆ hrăm mă ha thun đôč lui yơh, tui anun hơ-ưi biă mă, rơngiă prăk amĭ ama, sang anŏ ƀing čơđai. Yua hnun, kâo rơkâo khua mua pơ ala mơnuih ƀon sang, anom bruă pơtô hrăm čih pơkra sa hơdrôm hră đôč, samơ̆ hơdrôm hră anun khŏm mă yua sui”.

Gah bruă ngă hmua, mơnuih ƀon sang lăi, nua kmơk pruai, gơnam ngă hmua đĭ na nao, lơ̆m anun nua pơdai hăng gơnam pơkŏn ƀu hơđong ôh. Mơnuih ƀon sang ƀơi tơring čar An Giang rơkâo Kơnuk kơna tañ hơmâo hơdră pơsir, pơtruh brơi, ba sĭ gơnam mơng hmua tŭ yua hăng sui thun, kiăng mơnuih ngă hmua dưi ngă pơdrong mơng hmua ƀing gơñu. Rơngiao kơ anun, bruă pơđĭ kyar ngă hmua “pơlir hơbit”, biă ñu lĕ pơtruh nao rai mơnuih ngă hmua hăng anom bơwih ƀong ră anai aka ƀu kơjăp ôh, anun jing aka ƀu tŭ yua đơi ôh bruă ngă hrŏm anai, mơnuih ngă hmua aka ƀu ƀong lu ôh mơng hơdôm hơbô̆ bruă ngă hrŏm anai. Mơnuih ƀon sang Trần Văn Đức, dŏ ƀơi să Vĩnh Chánh, tơring glông Thoại Sơn, An Giang lăi.

“Hlơi mơng ƀu thâo kual lŏn dăo ia krông Cửu Long lĕ kual ngă pơdai prong hloh mơng lŏn ia ta, bơ An Giang lĕ kual phun, hmư̆ hing mơng kual lŏn dăo ia krông Cửu Ling, samơ̆ ră anai bruă djơ̆ bơyan nua trun hơmâo na nao; glăk amăng bơyan yuă lĕ pơdai trun nua, puih bơyan kah nua đĭ. Ƀơi să ăt iâu pơthưr laih ană plơi plih djuai phun pla, hlô rông, samơ̆ sit biă ñu pơdai kơtor lu biă mă yơh samơ̆ ƀu thâo ba sĭ pơpă ôh. Pơdai lĕ nua rơgêh, gơnam mơng mua sĭ ƀu abih ôh, samơ̆ kmơk pruai pơmă tui. Rơkâo Kơnuk kơna hăng hơdôm ding jum, anom bruă djru ba ană plơi ngă hmua ƀơi kual lŏn dăo ia krông Cửu Long, biă ñu lĕ tơring čar An Giang”.

Kơ bruă anai, Kơ-iăng khua mir sir yă Võ Thị Ánh Xuân lăi, tơring čar An Giang lĕ tơring čar pơđĭ kyar ngă hmua, khua mua tơring čar An Giang, tơring glông Châu Thành khŏm pơmin glăi dong, thâo mơneč mă tơlơi gêh gal hơmâo hơđăp či đĭ kyar ngă hmua khŏm tañ, tŭ yua hăng hơđong, pơkra rai anŏ yôm hloh dong, kiăng mơnuih ngă hmua dưi ngă pơdrong mơng asar pơdai mơ̆ gơñu pla.

“Lăi nao bruă ngă hmua. Kâo lăng truh ră anai, hơdôm tơlơi pơtrun mơng Ping gah, Kơnuk kơna, wơ̆t hăng prăk prăk, mơnuih mă bruă, wơ̆t hăng hơdră ngă bruă abih bang lêng kơ hơmâo soh yơh; mông anai kơnong kiăng ƀing ta ngă hiư̆m pă đôč yơh, ƀing ta lăi pơthâo glăi jơlan hơdră anai hiư̆m pă kiăng ană plơi thâo hrưn đĭ bơwih ƀong, gơgrong ngă pô pơkra rai asar braih mơng ƀing gơñu; kiăng dưi ngă pô lĕ khŏm hơmâo tơlơi pơmin ngă pô. Čang rơmang neh met wa hrŏm hăng gong gai pơmin hrŏm kiăng pơđĭ tui tơlơi gơgrong bruă mơng pô ngă hmua. Kơ bruă pơtô hrăm; bruă pơplih khŏm hơmâo hrơi blan pơplih mơn, ƀing ta khŏm bưp lu tơlơi glêh tơnap yơh amăng hrơi blan pơplih, abih yơh hrơi tơnap tap amra hơđong glăi mơn”.

Tui hăng Kơ-iăng khua mir sir Võ Thị Ánh Xuân, hơdôm bruă hơmâo mơnuih ƀon sang lăi ăt jing tơlơi pơmin mơng khua mua Ping gah, Kơnuk kơna, Khua pơ ala mơnuih ƀon sang hăng gong gai plơi pla mơn. Khul khua pơ ala mơnuih ƀon sang tơring čar An Giang djă pioh tơlơi pơgôp hiăp mơng mơnuih ƀon sang laih anun kiăo tui rim mơta bruă amra hơmâo tơlơi rơkâo đĭ dong ƀơi mông jơnum bơdjơ̆ nao.