Ngă tui tơlơi git gai mơng Khua dêh čar kơ tŏ tui pơtrut kơtang pok pơhai ruh hĭ sang tơ̆i tơ̆i, sang dŏ jang jai amăng đơ đam dêh čar, truh lơ 6/2/2025 tơring čar Kon Tum hơmâo pok pơhai man pơkra 369 boh sang, amăng anun man pơdong phrâo 320 boh sang hăng pơkra ming 49 boh sang. Đơ đam tơring čar Kon Tum hơmâo 2.752 boh sang dŏ jang jai, sang tơ̆i rơ̆i, amăng anun kiăng man pơdong phrâo 2.186 boh sang hăng pơkra ming 566 boh sang. Abih tih prăk mă yua kiăng tơring čar Kon Tum ngă tui bruă ruh hĭ sang dŏ jang jai, sang tơ̆i rơ̆i lĕ rơbêh 141 klai 500 klăk prăk hăng ră anai tơring čar dŏ kơƀah rơbêh 54 klai 700 klăk prăk.

Ba truh kơ bruă tơring čar Kon Tum kơƀah prăk kak kiăng ruh pơkra glăi sang tơ̆i rơ̆i, sang dŏ jang jai yua hơdôm boh sang anŏ kiăng ruh pơkra glăi đĭ 1.214 boh sang pơhmu hăng pel ĕp hlâo anun. Sit biă ñu mrô pel ĕp hlâo anun lĕ 1.538 boh sang hăng tơdơi anun lĕ 2.752 boh sang tơ̆i, sang dŏ jang jai kiăng man pơdong phrâo hăng pơkra ming. Tui Khul git gai bruă ruh pơkra glăi sang tơ̆i, sang dŏ jang jai tơring čar Kon Tum, ră anai prăk djru mơng gơnong glông hăng hơdôm ngăn rơnoh mơng ƀon lan pơhlôm brơi kơnong 61% mrô prăk kiăng mă yua brơi kơ tơring čar Kon Tum ruh pơkra glăi sang dŏ jang jai, sang tơ̆i rơ̆i.