Mơguah lơ 10/1, Khul mơnuih djơ̆ jrao hret dioxin tơring čar Kon Tum gum hrŏm hăng kông ti sĭ mơdrô djop gơnam Kon Tum pơphun ƀơk 389 anung gơnam hăng abih tih nua ñu rơbêh 146 klăk prăk brơi mơnuih drơi jăn ƀu klă lĕ ƀing djơ̆ jrao hret rơnuk tal 3 ƀơi hơdôm tơring glông: Đăk Hà, Kon Rẫy, Ngọc Hồi hăng plơi prong Kon Tum. Hrŏm hăng anun Khul mơnuih djơ̆ jrao hret dioxin tơring čar Kon Tum ăt kah mơng keh prăk djru mơnuih djơ̆ jrao hret rơbêh 137 klăk prăk blơi gơnam ƀơk brơi 846 čô mơnuih djơ̆ jrao hret amăng tơring čar Kon Tum.

Hlâo anun, khul mơnuih mă bruă mut phung hơdôm kual tuh tia pơkra pơjing - kual bơwih ƀong huă tơring čar Kon Tum gum hrŏm hăng Khul mơnuih mă bruă mut phung, ƀing apăn bruă tơring čar Kon Tum pơphun jơlan hơdră Tết tum jơngum-bơyan bơnga pơlir hơbit thun 2022. Amăng jơlan hơdră anai hơmâo 360 čô ding kơna, mơnuih mă bruă tơnap tap arăng ƀơk brơi rĭm čô mơnuih sa anung gơnam nua ñu mơng 500 rơbâo truh 1 klăk prăk.