Bruă hyu hơduah ĕp, pơƀut tơlang 8 čô tơhan djai pơsăn drơi anai, hmư̆ tơlơi pơhing mơ̆ng sa čô tơhan hơđăp ơi  Lã Mạnh Tùng, ngă tơhan nao pơ tơdron blah B3 kual Dap Kơdư lăi brơi. Tơdơi kơ čih pioh tơlơi pơhing mơ̆ng sang anŏ mơnuih djai pơsăn drơi jăn anun, nao pơđing hmư̆ tơlơi pơhing mơnuih ƀôn sang giăm pơsat dor ƀing tơhan djai laih anun ĕp lăng hră anăn khul ling tơhan Quân đoàn 3, ƀing ling tơhan plơi prong Kom Tum hyu ĕp klơi ƀuh tơlang tơhan pơsăn drơi ƀơi 2 boh phường Duy Tân hăng Ngô Mây.

Mah tơlơi pơhing kơ 14 čô tơhan pơsăn drơi jăn ăt amăng kual anai mơ̆n samơ̆ yua kơ sui laih, plơi pla pơblih, ĕp lăng gơnam amăng drơi jăn ƀing tơhan djai anun arăng thâo krăn tong ten 8 čô tơlang tơleh mơnuih djai. Ră anai, aka ƀu thâo rơđah anăn păn sit nik mơ̆ng rĭm pô tơlang tơhan djai pơsăn drơi jăn kơ lŏn ia.