Kơnang mơ̆ng anun, djru pơđĭ tui tơlơi thâo hluh ba glăi boh tŭ yua ngă djơ̆ tơlơi phiăn, mơnuih ƀôn sang ngă khua pô. Yua kơ anun yơh, mrô mơnuih ngă soh glăi tơlơi phiăn hrŏ tui, djru mơnuih ƀôn sang hơđong ƀiă mă bruă, pơđĭ kyar tơlơi bơwih ƀong huă mơnuih mơnam ƀơi tơring čar, plơi pla.

Jing tơlơi juăt laih, sit truh mơguah hlâo kơ nao mă bruă ƀudah abih mông mă bruă či tlam, hmư̆ jua mikrô mơ̆ng tơhan pơgang guai dêh čar puih kơđông Huổi Luông, gah sang bruă khua tơhan pơgang guai dêh čar tơring čar Lai Châu, uang uang pôr hyu amăng kual giăm guai dêh čar. Bruă ngă anai, hơmâo ba glăi boh tŭ yua biă mă lơ̆m bơyan hơmâo klin Covid 19 ƀă hyu tơnap tap hăngdŏ ngă tui na nao truh ră anai.

Kơnong sa boh mikrô djă hyu đôč, dưm nao USB hrip pioh laih hiăp pơtô lăi hăng đĭ rơdêh thut akă mikrô pôr, tơhan pơgang guai dêh čar nao tơl djop plơi pla, anih mơnuih ƀôn sang dŏ pioh pơtô lăi.

Đại uý Phan Thành Nam,  kơ-iăng khua kơđi čar, Puih kơđông Huổi Luông brơi thâo: Amăng anih  gơñu mă bruă lu kơ mơnuih ƀôn sang djuai ania Yao, Hmông, Hà Nhì dŏ. Hơdră pơtô pơblang hơmâo ƀing khua mua tơhan pơguai dêh čar pơtô hăng tơlơi yuan laih anun tơlơi pơhiăp mơnuih djuai ƀiă, djơ̆ hăng tơlơi thâo mơ̆ng mơnuih ƀôn sang. Yua kơ anun, djop pô lêng kơ thâo hluh soh tơlơi pơtô anun yơh hur har biă mă sit hmư̆ mikrô pôr, tơ-ua đĭ:

“Hăng tơlơi pơđok arăng pôr anun, pơtô tơlơi phiăn kơnuk kơna pơkă kơ guai dêh čar Việt Nam ƀơi amăng tơring čar, ƀing gơmơi hơmâo pơkra hơdră pơtô pơblang, pơphun dua wơ̆t hrơi tơjuh sa wơ̆t ƀơi djop plơi pla. Hơdră ngă anai, tŭ yua biă mă, yua pơtô pơblang kơ boh yôm phun, tơlơi phiăn brơi mơnuih ƀôn sang thâo. Pơ anăp anai,  gơmơi ngă hrom gong gai kơnuk kơna ƀơi tơring čar, ngă tui lu hơdră pơtô pơblang”.

Yua tơlơi bơwih ƀong huă anih tơnap tap, anun yơh ƀu djơ̆ lăi djop sang anŏ dŏ pơ guai dêh čar lêng kơ hơmâo prăk blơi tivi, ƀudah măi komputer pơkĕ internet ôh. Hloh kơ anun dơ̆ng , mikrô pôr tơlơi pơhiăp tơ-ua hyu djop jơlan glông, anun yơh mơnuih ƀôn sang dŏ pơ sang đôč hmư̆ mơ̆n tơlơi pôr, tơl pơ hmua dŏ mă bruă hai ăt hmư̆ mơ̆n tơlơi pơtô. Tal blung a, bruă pôr tơlơi pơhing tui hăng mikrô pôr anai ƀu mơak ôh, samơ̆ sui hrơi jing juăt hĭ yơh, ƀu kơƀah ôh hăng mơnuih ƀôn sang dŏ pơ kual giăm guai dêh čar.

Ayong Trần Chỉnh Hoàng, plơi A Sa Phìn, să Huổi Luông, tơring glông Phong Thổ brơi thâo: Na nao amăng hrơi năm hăng hrơi tơjuh,  mikrô pôr tơlơi pơhing mơ̆ng ping gah, kơnuk kơna. Hrom hăng anun, dua wơ̆t hrơi tơjuh sa wơ̆t pôr pơthâo tơlơi phiăn tơhan pơgang guai dêh čar Việt Nam; djop jơlan hơdră pơtô ber đôč, amuñ thâo hluh djop jơlan hơdră tơlơi phiăn guai dêh čar, bruă mă pơgang gong tơmeh pơkă guai dêh čar.

“Mơnuih ƀôn sang pơ plơi pla gơmơi thâo hluh tong ten tơlơi yôm mơ̆ng bruă pơgang guai dêh čar hăng jơlan guai dêh čar. Mơnuih ƀôn sang nao rai ƀơi gong tơmeh, pơkă guai jơlan guai dêh čar ăt khom lăi pơthâo tơhan pơgang guai dêh čar thâo kiăng tơhan hyu tir mơ̆ng anun thâo hluh lu kơ tơlơi phiăn pơkă guai,tơmeh guai dêh čar”.

Hrom hăng tal hyu pơtô pơblang, pôr amăng mikrô ƀơi să, puih tơhan pơgang guai dêh čar Huổi Luông ăt brơi khua mua, tơhan nao tơl sang anŏ pơtô lăi mơnuih ƀôn sang. Mơ̆ng anun, djru mơnuih ƀôn sang thâo hluh tong ten răng kơđiăng truh pơ sang anŏ mơnuih ƀôn sang, kiăng mơnuih ƀôn sang bĕ hĭ tơlơi arăng plư, ƀing ayăt roh phă pơrai lŏn ia, ngă soh ƀơi guai dêh čar. Amai Lò Thị Trưởng, mơnuih ƀôn sang plơi Hồ Thầu, să Huổi Luông, tơring glông Phong Thổ lăi:

“Thun blan rơgao, gơmơi ăt dưi hơmâo ƀing tơhan pơgang guai dêh čar lăi pơthâo jơlan guai dêh čar, anih man pơdong gong tơmeh pơkă guai. Kâo thâo hluh mơ̆n guai dêh čar lĕ yôm hing ang biă mă ƀu dưi ngă sat ôh. Sa čô mơnuih ƀôn sang dŏ ƀơi kual giăm guai dêh čar, kâo khom hluh bruă ngă, djru tơhan pơgang guai dêh čar pơgang kjăp tơlơi ngă pô mơ̆ng guai dêh čar hăng pơgang rơnuk rơnua dêh čar”.

Tui hăng Đại tá, Lê Công Thành, Kơ-iăng khua kơđi čar gah sang bruă khua tơhan tơhan pơgang guai dêh čar tơring čarLai Châu, bruă pơtô pơblang, pôr pơthâo tơlơi phiăn kơnuk kơna, amăng anun tơlơi phiăn guai dêh čar Việt Nam, rơngiao kơ bruă pok pơhai lu hơdră pơtô lăng nao rai amăng tivi mơtam, lăng amăng măi telephôn truh pơ 115 anih lăng nao rai amăng tơring čar, hơmâo giăm 2.500 čô khua mua, ling tơhan hyu pơtô tơlơi phiăn kơnuk kơna mơ̆ng să ngă hrom. Bruă pơtô anun, ngă hrom na ano hăng khul mơnuih pơtô pơblang tơlơi phiăn mơ̆ng djop tơring glông, pơphun 22 boh să guai dêh čar.

“Kơnang kơ grup hyu pơtô pơblang, pơlar lu tơlơi phiăn pơgang guai dêh čar Việt Nam, tơlơi thâo hluh mơ̆ng mơnuih ƀôn sang ƀơi kual guai dêh čar ăt thâo hluh lu laih mơ̆n. Hăng hơdră ngă sit nik tŭ yua hăng lu hơdră pơtô pơblang gơmơi pôr pơthâo tong ten truh pơ mơnuih ƀôn sang. Biă mă ñu ƀing dŏ amăng kual guai dêh čar brơi thâo  hluh djop tong ten tơlơi phiăn guai dêh čar Việt Nam. Mơ̆ng anun, ƀuh rơđah bruă khua mua pơ ala mơnuih ƀôn sang dêh čar čih pơkra tơlơi phiăn guai dêh čar Việt Nam yôm biă mă amăng bruă wai pơgang guai lŏn ia, ngă pô dêh čar ră anai”.

Hăng hơdră, ngă hrom pơtô pơblang thâo pơčeh phrâo tŭ yua, mơnuih ƀôn sang djop plơi pla guai dêh čar thâo hluh dơlăm boh tŭ yua, kiăng djă pioh, wai pơgang guai jơlan guai dêh čar, gong tơmeh pơkă guai. Mơnuih ƀôn sang pơ guai dêh čar tơring čar Lai Châu hơđong yơh pran jua mă bruă, pơkra ming; rĭm thun mrô sang anŏ ƀun rin hrŏ tui 5%, mrô črih čruai mơnuih mơnam rơbêh 10%. Mơ̆ng anun, rĭm čô mơnuih thâo hluh hăng gir run hrom ping gah, kơnuk kơna ngă klă bruă man pơdong plơi pla pơgang guai dêh čar, hơđong kơđi čar, rơnuk rơnua mơnuih mơnam rô nao rai amăng kual guai dêh čar.