Ngă tui Hơdră pơđĭ kyar man pơdong sang dŏ truh thun 2030, tơring čar Lâm Đồng pơkă tơhnal pơtrun man pơdong djop 3000 boh sang kơ mơnuih ƀong prăk blan ƀiă, mơnuih mă bruă apah amăng anih tuh tia pơkra ming sa ƀut dŏ. Amăng anun, mơ̆ng ră anai truh thun 2025 amra man pơdong giong 2100 boh sang, 900 boh sang dŏ glăi amra pơdong khom giong hơdôm thun tơdơi kơ anun.

Truh ră anai, Lâm Đồng phrâo pơhưč 1 boh sang bruă tuh pơ alin kơčăo bruă pơdong sang djru mơnuih mơnam tơnap tap brơi mơnuih ngă kông ñơn hăng mơnuih mă bruă apah  ƀơi anih mă bruă sa ƀut sang măi Phú Hội, tơring glông Đức Trọng. Tui hăng ơi Nguyễn Anh Tuấn, Kơ-iăng Khua Gơnong bruă man pơdong tơring čar Lâm Đồng, hrom hăng tơlơi tơnap tap pơhưč tuh pơ alin, tơlơi dŏ gun prong ră anai amăng bruă pok pơhai ngă tui lĕ hơdôm kơčăo bruă pơdong sang dŏ kơ mơnuih mơnam tơnap tap, khom ĕp prăk djru tơpă rơgoh.