Hơdôm hrơi akŏ blan 7 ƀơi phường Xuân Hương-Đà Lạt, tơring čar Lâm Đồng, ƀing hlăk ai hơmâo pơphun hơdôm bruă mă “Pioh hơdor tơngia”, nao tơña bla, juh alum sang anŏ tui hơdră djru; uă rơmet, tŭi ñang ƀơi pơsat tơhan djai pơsăn drơi. Amai Nguyễn Thị Thúy, Khua khul hlăk ai ƀut plơi 9 brơi thâo, anai ƀu djơ̆ kơnong lĕ bruă pioh hơdor tơngia đôč ôh mơ̆ ăt lĕ tơlơi pơtô glăi sit nik pran khăp kơ lŏn ia hăng tơlơi gơgrong mơng rơnuk klăk ai ră anai:

“Ƀing gơmơi hơmâo gum hrŏm hăng Khul git gai mơng ƀut plơi pla hăng phường nao čuă hơdôm boh sang anŏ tui hơdră djru amăng ƀon lan kiăng djru brơi ƀing hlăk ai dưi pơdah pran hơdor tơngia hăng ƀing anong met wa. Rơngiao kơ hơdôm bruă mă anun, ƀing gơmơi ăt uă rơmet, tŭi ñang ƀơi pơsat tơhan djai pơsăn drơi jăn. Hơdôm hrơi tui hăng anai rĭm thun lĕ hrơi mông kiăng ƀing gơmơi pơtô glăi pran khăp kơ lŏn ia hăng pran gơgrong brơi kơ ƀing hlăk ai amăng plơi pla ala ƀon”.

Pơdah pran hơdor tơngia hăng rơnuk anong met wa yua tơlơi gum pơgôp amăng pơklaih rơngai lŏn ia, wai pơgang hăng pơjing lŏn ia ta ră anai, amăng hơdôm hrơi anai khul hlăk ai phường Xuân Hương-Đà Lạt hơmâo jak iâu hlăk ai amăng hơdôm bruă mă sit nik, ngă lar hyu pran jua “Mơñum ia hơdor kơ pô klơi”. Khua khul hlăk ai phường Thái Thị Thu Thắm brơi thaoa, hơdôm bruă mă anai hơmâo tơlơi mut hrŏm abih pran jua, tơlơi gơgrong mơng 106 khul hlăk ai hăng rơbêh 5.000 čô hlăk ai:

“Ƀrô tal hơdor glăi 78 thun hrơi tơhan rơka-tơhan djai pơsăn drơi 100% khul grup hlăk ai phrâo man pơkra hơdôm ring bruă kah hăng bruă mă phara, anun lĕ djru rơmet pơagaih jum dar plơi, uă rơmet ƀơi pơsat tơhan djai pơsăn drơi; pơphun hơdôm bruă hyu tơña blan hơdôm sang anŏ tui hơdră djru, sang anŏ djru hơkrŭ amăng đơ đam phường. Hrŏm hăng anun ƀing hlăk ai hơmâo djru brơi sang anŏ tui hơdră djru tŭ mă tơlơi djru hăng bruă ngă hră pơ-ar mơ̆ hơdôm boh sang anŏ aka ƀu dưi tŭ mă”.

Hơdôm bruă mă sit nik mơng hlăk ai phường Xuân Hương-Đà Lạt lăi phara hăng hlăk ai tơring čar Lâm Đồng hnun mơn amăng hơdôm hrơi blan 7 ba glăi tơlơi hok mơ-ak, ol kơdol pran jua lu tơhan hơđăp, tơhan rơka, ƀing mơnuih pioh rơnuk hlăk ai gơñu brơi kơ bruă pơklaih rơngai lŏn ia. Ơi Phan Xuân Khanh, 74 thun, tơhan rơka mrô 3/4, ol kơdol brơi thâo:

“Ƀing met wa ăt tha rơma pơdơi lơtret laih samơ̆ truh lơ 27/7 amăng pran jua ăt hur har hok kơdok yua hrơi anai lĕ hrơi đơ đam dêh čar pioh hơdor hăng pơpŭ ƀing tơhan đưm hlâo wơr ƀing gơñu pô yua kơ lŏn ia. Hăng hơmâo tui anai ăt yua mơng pran tuh rơyuh, pơsăn drơi mơng ƀing tơhan kơsông kơtang, hơdôm boh sang anŏ wơr ƀing gơñu pô djru blah wang yua kơ tơlơi rơngai lŏn ia”.

Tơring čar Lâm Đồng hơmâo rơbêh 21.000 čô tơhan, rơbêh 11.000 tơhan rơka, 2.460 čô amĭ Việt Nam sông kơtang (ră anai 17 čô amĭ dŏ hơdip) hrŏm hăng hơdôm hơpluh rơbâo čô hơmâo pơgôp djru hơkrŭ. Hơdor tơngia hơdôm tơlơi rơngiă, pơsăn drơi mơng rơnuk ơi yă, ơi Y Thanh Hà Niê Kdăm, Ding kơna Ping gah dêh čar, Khua git gai Ping gah tơring čar, Khua Khul Khua pơ ala mơnuih ƀôn sang tal XV tơring čar Lâm Đồng pơsit tong, amra tŏ tui bơwih brơi djop mơta kơ hơdôm sang anŏ tui hơdră djru:

“Ƀing gơmơi ăt thâo rơđah hơdôm tơlơi gum djru brơi ăt aka ƀu dưi pơhlôm abih tơlơi rơngiă, pơsăn drơi mơng tơhan djai pơsăn drơi hăng sang anŏ djru hơkrŭ. Yua anun, pơ anăp anai, Ping gah, gong gai hăng mơnuih ƀon sang tơring čar amra tŏ tui gir run ƀiă dong kiăng hrưn đĭ tơlơi hơdip mơda brơi mơnuih djru hơkrŭ, ƀu wơr hlơi ôh, ƀu brơi hlơi dŏ glăi gah tlôn amăng pơjing hăng pơđĭ kyar tơring čar”.

Bruă pioh hơdor tơngia hơdôm sang anŏ tui hơdră djru, sang anŏ tơhan djai pơsăn drơi jăn, mơnuih djru hơkrŭ amăng hơdôm hrơi blan 7 ƀơi tơring čar Lâm Đồng ƀu djơ̆ kơnong lĕ hrơi mông kiăng hơdor tơngia đôč ôh mơ̆ ăt kiăng pơtrut pơsur pran jua rĭm čô mơnuih amăng ƀon lan, sit biă ñu lĕ ƀing hlăk ai khăp kơ lŏn ia, pơ-ư ang djuai ania mơng anun hơdip hiam tui, hơmâo lu tơlơi gum pơgôp. Hơdôm hơdră sit nik anăp nao hơdôm anih pioh hơdor, anun lĕ djru sang dŏ, bơwih brơi tơlơi suaih pral, ĕp brơi bruă mă, djru brơi tơlơi hơdip sang anŏ tui hơdră djru, sang anŏ tơhan djai pơsăn drơi, mơnuih djru hơkrŭ ƀơi tơring čar Lâm Đồng glăk pơgôp djă pioh hăng tŏ tui gru grua “Hơdor tơngia”, “mơñum ia hơdor kơ pô klơi” mơng djuai ania ta./.