Hơdôm hrơi giăm tết, să Trường Sơn, tơring glông Quảng Ninh, tơring čar Quảng Bình glăk dik dak mơ-ak. Ling tơhan wai pơgang guai plơi Mô ƀơi tơring glông Quảng Ninh pơphun tuk ƀañ tek ƀơk brơi neh met wa amăng plơi Ploang, să Trường Sơn, tơring glông Quảng Ninh. Neh met wa hrŏm hăng ling tơhan pơphun ngui adôh suang, pơphun hơdôm tơlơi ngui sô hơđăp ngă kơ hrơi mông čơkă thun phrâo jai mơ-ak, pơđao amăng pran jua.

Ƀrô tal anai, Anom bruă git gai ling tơhan wai pơgang guai plơi Mô hrŏm hăng hơdôm anom bruă ƀơk gơnam tết brơi mơnuih djuai ania ƀiă amăng plơi Ploang hăng Rìn Rìn, ƀơk ao pơđao brơi kơ ƀing čơđai, jao 5 “Boh sang juă glai amăng plơi pla”, nao yuă amŭ soh sel hăng khăm pơjrao, ƀơk jrao, djru brơi mông sơker kơ neh met wa kual giăm guai. Ơi Hồ Văn Thông, dŏ ƀơi plơi Ploang, să Trường Sơn, tơring glông Quảng Ninh hur har pran jua brơi thâo:

“Bơyan bơnga giăm guai - pơđao pran jua ană plơi pla” pơphun ngă kơ mơnuih ƀon sang hok mơ-ak biă mă. Dong mơng hlâo adih, kâo ƀuh thun anai dưi mut hrŏm jơlan hơdră ngui mơ-it tui anai kơplah wah ling tơhan hăng mơnuih ƀon sang. Hơdôm mông pơphun mơng ngui adôh, neh met wa nao ayun suang, adôh, ngui hrŏm lu tơlơi ngui hăng hơmâo arăng ƀơk brơi gơnam, lăng hlơi hlơi lêng kơ hok mơ-ak”.

Sa bơyan bơnga dong trun rai ƀơi kual giăm guai Dân Hoá, tơring glông Minh Hóa, tơring čar Quảng Bình. Ƀing apăn bruă, ling tơhan wai lăng amăng jang jar kmar Cha Lo hrŏm hăng hơdôm puih tơhan pơdong amăng kual pok pơhai jơlan hơdră “Bơyan bơnga giăm guai-Pơđao pran jua ană plơi pla”, hmao tlôn bơwih brơi tết kơ neh met wa rin rơpa ter tơkai kơčong čư̆ Giăng Màn. Jơlan hơdră hơmâo lu bruă mă yôm phăn anun lĕ tŭi ñang kơ tơhan djai pơsăn drơi jăn, ngui adôh suang, pơplông tuk ƀañ tek, ƀơk gơnam brơi hơdôm boh sang anŏ. Yă Đinh Thị Mùi, dŏ ƀơi plơi Bãi Dinh, să Dân Hoá, tơring glông Minh Hóa hok mơ-ak brơi thâo:

“Jơlan hơdră “Bơyan bơnga kual giăm guai-Pơđao pran jua ană plơi pla”, mơnuih ƀon sang să giăm guai, kual ataih, asuek hur har hok mơ-ak biă mă. Yua, ƀing gơmơi lĕ hơdôm boh sang anŏ ƀun rin amăng să kual giăm guai, kual ataih asuek ră anai hơmâo tơlơi gum djru. Pơ anăp anai, ƀing gơmơi amra gir run bơwih ƀong kiăng sang anŏ hrưn đĭ, plai ƀiă gơnang nao kơnuk kơna, hăng hơdôm anom bruă bơdjơ̆ nao”.

Jơlan hơdră “Bơyan bơnga giăm guai - Pơđao pran jua ană plơi pla” hơmâo pơphun tui tơđar hlâo hrơi čơkă thun phrâo hăng ƀu amăng djop să kual giăm guai, ba glăi hrơi mông čơkă thun phrâo mơ-ak amăng djop plơi pla ala ƀon. Mơng jơlan hơdră anai, mơnuih djuai ania ƀiă, ƀing apăn bruă, ling tơhan kual giăm guai, pơdah pran gum pơgôp, pran jua hrưn đĭ găn rơgao tơnap tap hăng čang rơmang amra hơmâo lu tơlơi truh kih amăng thun phrâo Quý Mão 2023”.

Đại tá Trịnh Thanh Bình, khua anom bruă git gai ling tơhan wai pơgang guai tơring čar Quảng Bình brơi thâo, hlâo kơ tết, ling tơhan wai pơgang guai git gai hăng iâu pơthưr hơdôm khul grup, mơnuih čơmah gum pơgôp kiăng hơmâo hơdôm rơbâo gơnam djru brơi neh met wa kual giăm guai Quảng Bình dưi čơkă thun phrâo mơ-ak, pơđao amăng pran jua.

“Jơlan hơdră hơmâo lu bruă mă sit nik hăng ƀơk lu gơnam mơng ƀing mơnuih čơmah kiăng kơ neh met wa hơmâo tơlơi hơdip trơi pơđao, pơhlôm brơi hrơi čơkă thun phrâo mơ-ak. Pơtrut pran jua mơnuih ƀon sang, ling tơhan ƀơi kual giăm guai čơkă thun phrâo tum jơngum, mơ-ak, pơtrut pran hrưn đĭ kiăng pơđĭ kyar bơwih ƀong huă mơnuih mơnam pơlir hăng bruă wai pơgang hơđong ƀơi kual giăm guai lŏn ia”.

Hlâo anun, ƀơi să Hồng Vân, tơring glông A Lưới, tơring čar Thừa Thiên Huế, anom bruă git gai ling tơhan wai pơgang guai, Khul pơlir hơbit đah kơmơi Việt Nam gum hrŏm hăng Ping gah, Jơnum min mơnuih ƀon sang tơring čar Thừa Thiên Huế pơphun jơlan hơdră “Bơyan bơnga pơđao pran jua mơnuih ƀon sang” čơkă thun phrâo tui phiăn juăt Quý Mão 2023. Ƀơi anai pơphun hơdôm bruă anun lĕ: Pok đĭ dŏ sang phrâo, jao sang khăp pap brơi mơnuih ƀun rin kual giăm guai; nao čuă, ƀơk gơnam brơi mơnuih ƀun rin, sang anŏ ngă hơkrŭ; nao čuă, pơpŭ thun phrâo gong gai, mơnuih ƀon sang, ƀing čơđai sang hră, anom bruă wai pơgang gual lŏn ia; ngui adôh suang; jao gơnam brơi čơđai sang hră hăng sang anŏ tơnap tap amăng tơring glông A Lưới; khăm pơjrao, ƀơk jrao brơi mơnuih ƀon sang; hơdôm bruă gru grua, bơrơguăt drơi jăn, ngui tơlơi ngui sô hơđăp. Jơlan hơdră ăt jao 10 boh sang khăp pap brơi mơnuih ƀun rin kual giăm guai; 15 drơi rơmô ania, 500 anung gơnam tết./.