Hơdôm thun rơgao Sang bruă hmâo djru laih neh wa djuai ania ƀiă kual guai dêh čar pơđĭ kyar bơwih ƀong huă, hơđong tơlơi hơdip mơda.

Hăng sa čô mơnuih Ka Dong tơkeng rai prong đĭ ƀơi plơi Đăk Wang, să Sa Loong, tơring glông Ngọc Hồi (tơring čar Kon Tum), lom 19 thun Y Trang dưi hmâo Sang bruă mrô 732 čơkă mut mă bruă . Tơdơi kơ pơtô brơi kuah kơtăk kơ su, Y Trang dưi čơkă bruă jao 3 ektar. Rơbêh kơ 10 thun kĕ phĭ hăng sang bruă, ră anai tơlơi hơdip mơda sang anô̆ Y Trang hơđong laih. Dua tal na nao ư-ang dưi pơanăn sa amăng 4 čô mơnuih mă bruă ƀơi sang bruă nao pơhmư̆ bruă pơplông mơnuih mă kơtăk rơgơi Binh đoàn. Y Trang brơi thâo, rơngiao 3 ektar đang kơ su čơkă mă, rơkơi bơnai ñu dô̆ hmâo 1 ektar đang kơ phê dong. Gơnang kơ mă bruă ƀơi sang bruă, anun rơkơi bơnai ñu hmâo tơlơi gal hrăm tui bruă bơwih brơi kơ đang kơ phê hăng hmâo lu bôh.

 “Lom dưi ruah mut mă bruă kơ Sang bruă 732, sang bruă pok anih pơtô hơdră kuah kơtăk kơ su. Tơdơi kơ jing pô kuah kơtăk, kâo dưi čơkă mă bruă jao wai lăng đang kơ su. Jing mơnuih mă bruă kơ Sang bruă, kâo hmâo prăk pơhrui glăi hơđong, pơhlôm tơlơi hơdip mơda. Hăng hơdôm bôh sang anô̆ tơnap tap, Sang bruă djru braih pơdai kiăng gơñu huăi kơƀah ƀong huă amăng hơdôm hrơi giăm bơyan tơjŭ pla. Bơhmu hăng mơnuih amăng plơi ƀu hmâo mă bruă kơ sang bruă lĕ tơlơi hơdip mơda ƀing gơmơi jơnap hloh lu biă”.

Sang anô̆ ơi Nguyễn Công Hoàn plơi pla pơ̆ Thái Bình nao pơ̆ să Đăk Kan, tơring glông Ngọc Hồi, tơring čar Kon Tum dô̆ hơdip mơda bơwih ƀong hăng dua ƀĕ tơngan soh. Dưi hmâo tơlơi gum djru mơng Sang bruă 732, sang anô̆ ñu amăng ƀrư̆ hrưn đĭ, pơdŏng sang dô̆ klă hiam. Bơnai ñu mă bruă kơ Sang bruă 732, ră anai čơkă mă 5,5 ektar đang kơ phê pioh wai lăng. Sang anô̆ ñu dô̆ hmâo sa ektar đang kơ su hăng 1 ektar đang kơ phê dong. Ră anai, ơi Nguyễn Công Hoàn lĕ Khua Khul wai lăng Anom mă bruă hrom gah đang hmua Đăk Kan, hăng 400 čô mơnuih amăng khul, amăng anun ngă 80 ektar hmua ia. Hmua pơdai anai ăt jing Sang bruă 732 jah agaih laih anun pơpha brơi kơ hơdôm bôh sang anô̆ čơkă mă bruă jao.

"Ƀơi Ngọc Hồi ƀing gơmơi lĕ lu djuai ania mơng kual Kơdư dêh čar, kual Dơnung dêh čar nao dô̆. Ƀơi să Đăk Kan hmâo lu neh wa djuai ania ƀiă hơđăp ƀơi anai lĕ, dưi hmâo sang bruă gum djru ba na nao. Mơng bruă pơkra jơlan, pơdŏng anom mă yua mơng plơi pla, djru neh wa tơtlaih mơng ƀun rin, pơjing bruă mă kơ hlăk ai ană bă neh wa djuai ania ƀiă. Yua anun bruă bơwih ƀong ƀơi să Đăk Kan mơng ƀing gơmơi pơđĭ kyar dưm kơnar ƀiă. Hmâo tui anun lĕ gơnang kơ tơlơi gum djru mơng sang bruă 732".

Sang bruă bơwih ƀong mơnuih ƀôn sang sa ding kơna 732 wai lăng 2.330 ektar đang kơ su, rơbêh kơ 80 ektar hmua pơdai, 1 bôh sang măi pơkra kơtăk kơ su hăng jua kơtang 5.000 tơn kơtăk krô sa thun. Mrô kơ su hmâo rim thun leng kơ djơ̆ hăng tơhnal pơkă hăng hloh kơ tơhnal pơkă mơng Binh đoàn jao. Sang bruă hmâo pơjing laih bruă mă kơ mơnuih djuai ania ƀiă. Sang bruă ăt lăi pơhing klă mơn, pơsur mơnuih mă bruă hăng mơnuih ƀôn sang amăng plơi pla ngă tui tơpă hơdôm hơdră pơtrun, hơdră bruă mơng Ping gah, tơlơi phiăn mơng Kơnuk kơna. Sang bruă dô̆ tuh pơplai pơdŏng sang jơnum plơi pla, sang hră, sang wai lăng čơđai muai, kual ngui ngor; pel ĕp tơlơi ruă, pha brơi ia jrao kơ neh wa. Đại tá Hà Văn Nam, Khua git gai Ping gah, Kơ-iăng Khua Sang bruă 732, lăi:

 “Sang bruă 732 ngă tui bruă mă ƀơi Kơdư kual Dăp Kơdư. Dŏng anom bruă ƀơi 4 bôh să gah 2 tơring glông Ngọc Hồi hăng Sa Thầy tơring čar Kon Tum; ngă tui bruă pơđĭ kyar bơwih ƀong mơnuih mơnam pơhlôm bruă pơgang lŏn ia rơnuk rơnua plơi pla ƀơi tơring glông. Sang bruă lăng ba na nao ngă gal brơi bruă mă kơ mơnuih djuai ania ƀiă, biă ñu djuai ania ƀiă hơđăp ƀơi anai Sang bruă hmâo ruah 50%. Prăk pơhrui glăi mơng mơnuih mă bruă giăm truh 9 klăk rim blan. Sang bruă hmâo ngă klă laih bruă gum djru, hơđong tơlơi hơdip mơnuih mơnam ƀu djơ̆ kơnong kơ ƀơi mơnuih mă bruă ôh mơ̆ wot mơnuih ƀôn sang ƀơi plơi pla anai, biă ñu hơdôm bôh sang anô̆ hmâo tơlơi hơdip tơnap lĕ sang bruă hmao tlôn djru gum, ngă gal brơi kơ mơnuih ƀôn sang hmâo tơlơi hơdip hơđong. Sang bruă lăng ba pơdŏng klă tơlơi rô nao rai gum hrom hơbit hăng gưl Ping gah, Gong gai hăng Mơnuih ƀôn sang plơi pla. Biă ñu gum hrom hơdôm khul ling tơhan ƀơi plơi pla hyu tir na nao, wai lăng kual guai dêh čar, ƀu hmâo hlơi găn rơgao ƀu djơ̆ phiăn ƀơi guai dêh čar”.

Hăng hơdôm bôh than dưi ngă, Sang bruă 732 dưi hmâo laih Khua mir sir dêh čar ta ƀơk hră pơanăn hing ang Anom mă bruă sông kơtang rơnuk pơplih phrâo. Lu puih kơđông, mơnuih mơng sang bruă ăt čơkă mă mơn hơdôm črăn apah bơni yôm phăn mơng Ding jum, gơnong bruă hăng Binh đoàn 15. Samơ̆ hăng mơnuih apăn bruă, mơnuih mă bruă mơng Sang bruă 732, hơdôm mơnuih hmâo kĕ phĭ klă hiam hăng kual lŏn “sa jua mơnŭ tơdjô̆ 3 bôh dêh čar hmư̆” anai, črăn apah bơni tŭ yua hloh lĕ pran đăo gơnang, jing anih kơnang kơjăp kơ mơnuih ƀôn sang djop djuai ania guai dêh čar Lŏn ia./.