Ơi Trần Văn Hòa, mơnuih mơgăt ƀattô BTH 95032TS ƀơi să Phước Thể, tơring glông Tuy Phong, tơring čar Bình Thuận hlâo anun ngă soh lơ̆m hyu mă akan hơdang mơ̆ ƀu hơmâo hră pơ-ar; ƀu hơmâo čih glăi gơnam ñu hyu mă; ƀu lăi pơthâo lơ̆m nao rai tơdrun tum păn. Ră anai, hơdôm tơlơi ngă soh anun ƀu hơmâo dong tah. Anai lĕ yua ling tơhan wai pơgang guai pơtô pơblang, lăi pơthâo tơlơi phiăn, črâo brơi glông jơlan đuăi hyu amăng kual ia rơsĭ tong ten bơi ơi Hòa hăng mơnuih hyu mă akan hơdang mơng ƀon lan. Laih dong, ling tơhan wai pơgang guai ăt črâo brơi neh met wa ngă tui hiưm pă djơ̆ hăng tơlơi phiăn, huăi găn nao hơdôm kual ia rơsĭ dêh čar pơkŏn hăng djru pơsir hĭ hơdôm bruă amăng kual ia rơsĭ:

“Yua kơ hơmâo tơlơi pơtô pơblang mơng ling tơhan, mơng anun kâo thâo rơđah, laih anun črâo brơi adơi ayong pơkŏn dong, hơdôm boh ƀattô pơkŏn kiăng huăi ngă soh. Tơdah mơnuih hyu mă akan hơdang kiăng ling tơhan amra nao djru hăng črâo brơi mơtăm. Pơhmutu, hơdôm bruă bơrơsua amăng kual ia rơsĭ, ƀudah hơdôm bruă hyua mă soh glăi kiăng lăi pơthâo ling tơhan, laih anun amra hơmâo ƀattô tui nao kiăng pơsir hĭ, bĕ hĭ bruă bơrơsua amăng kual ia rơsĭ”.

Truh ră anai, lu mơnuih hyu mă akan hơdang ƀơi Bình Thuận thâo tong ten tơlơi yôm mơng bruă čih glăi bruă hyu mă akan hơdang, ngă tui djơ̆ bruă dưm truă măi mok krăo lăng (VMS). 100% boh ƀattô hyu mă akan hơdang ataih mơng hang ƀuăn huăi ngă soh amăng kual ia rơsĭ dêh čar pơkŏn. Ơi Huỳnh Hương, pô mơgăt ƀattô BTH 84025TS lĕ mơnuih dŏ ƀơi tơring kual Liêng Hương, tơring glông Tuy Phong, tơring čar Bình Thuận brơi thâo dong:

“Ling tơhan wai amăng jang Liên Hương juăt bưp mơnuih ƀon sang hyu mă akan hơdang kiăng lăi pơthâo hơdôm tơlơi pơhing amăng kual ia rơsĭ. Ayuh hyiăng ƀudah lơ̆m hyu mă akan hơdang bưp hơget thơ, pơhmutu bưp ƀattô dêh čar pơkŏn, ta kiăng lăi pơthâo brơi ling tơhan thâo. Sit biă ñu ling tơhan đing nao biă mă neh met wa hyu mă akan hơdang”.

Ƀu djơ̆ kơnong pơtô pơblang, lăi pơthâo tơlơi phiăn, pơsur neh met wa bra hyu amăng kual ia rơsĭ, wai pơgang bul pơtâo, ling tơhan wai pơgang guai wai lăng amăng kual ia rơsĭ Bình Thuận ăt gum hrŏm hăng gưl Ping gah, gong gai ƀon lan bơwih brơi tơlơi hơdip kơ mơnuih ƀon sang amăng kual ia rơsĭ. Rĭm thun, ling tơhan pok pơhai hơdôm jơlan hơdră anun lĕ: Keh prăk yua mơnuih ƀun rin, pơdjai braih khăp pap, čung ba čơđai nao sang hră…djru brơi hmao tlôn brơi mơnuih tơnap tap.

Kơnong thun 2022, jơlan hơdră čung ba čơđai nao sang hră hơmâo djru brơi 42 čô čơđai hăng mrô prăk 189 klăk; jơlan hơdră ană rông puih kơđông tơhan hơmâo djru brơi 42 čô čơđai hăng mrô prăk rơbêh 100 klăk. Ling tơhan ăt man pơdong brơi hơdôm boh ƀon lan ter hang ia rơsĭ Bình Thuận 3 boh sang khăp pap, ƀơk 9 tơ̆n braih brơi hơdôm boh sang anŏ tơnap tap…Ơi Huỳnh Đình Dũng, kơ-iăng khua Jơnum min mơnuih ƀon sang să Phước Thể, tơring glông Tuy Phong, tơring čar Bình Thuận brơi thâo:

“Amăng hơdôm boh să hơmâo puih kơđông tơhan pơdong, tơlơi gum hrŏm kơplah wah gong gai ƀon lan, hơdôm gơnong bruă, khul grup ƀơi ƀon lan hrŏm hăng mơnuih ƀon sang, sit biă ñu mơnuih hyu mă akan hơdang kjăp biă mă. Pran khăp pap kơplah wah mơnuih hyu mă akan hơdang hăng ling tơhan jai hrơi kjăp phik”.

Đại tá Đinh Văn Sáu, Khua git gai Ping gah, Khua anom bruă git gai ling tơhan wai pơgang guai tơring čar Bình Thuận brơi thâo, pơtô pơblang hơdră bruă, tơlơi črâo trun, tơlơi phiăn hăng bơwih brơi tơlơi hơdip brơi mơnuih ƀon sang lăi hrŏm, amăng anun hơmâo mơnuih hyu mă akan hơdang lĕ bruă jao mơng ling tơhan. Bruă jao anai lêng hruă kjăp tơl rĭm čô mơnuih apăn bruă, ling tơhan kiăng thun tơdơi ngă tui klă ƀiă dong, tŭ yua ƀiă thun hlâo:

“Ngă hiưm pă kiăng jak iâu mut hrŏm mơng djop anih anom hăng abih bang mơnuih ƀon sang kiăng pơjing bruă wai pơgang amăng abih bang hơđong kjăp, mơng anun pơgiong bruă jao wai pơgang guai, rơnuk rơnua lŏn ia. Hrŏm hăng anun, ƀing gơmơi đing nao git gai ngă klă bruă pơjing Ping gah, ngă tui pran gơgrong mơng ƀing apăn bruă Ping gah. Yua anai lĕ ƀing mơnuih akŏ phun kiăng git gai anom bruă pơgiong bruă jao pơ anăp anai”.

Bình Thuận giăm hang rơsĭ glông 192 km, hơmâo rơbêh 5.700 boh ƀattô glông mơng 6 met pơ glông, amăng anun hơmâo 1.946 boh ƀattô glông mơng 15 met pơ glông glăk hyu mă akan hơdang ataih mơng hang. Gơnong bruă hyu mă akan hơdang pơhlôm brơi bruă mă kơ rơbêh 46.000 čô mơnuih, amăng anun hơmâo giăm 15.000 čô glăk hyu mă akan amăng hơdôm boh ƀattô. Bruă mă akan hơdang amăng kual ia rơsĭ dŏ lu tơnap tap, hŭi rơhyưt, samơ̆ hơmâo tơlơi đing nao, gum djru mơng Kơnuk kơna, gong gai ƀon lan hăng ling tơhan wai pơgang guai, mơnuih hyu mă akan hơdang Bình Thuận hơmâo dong tơlơi pơtrut kiăng bra hyu amăng kual ia rơsĭ, pơsit tong kual ia rơsĭ, bul pơtâo lŏn ia.