Lăi kơ bruă pơđĭ kyar bơwih ƀong mơnuih mơnam mơng thôn 8, să guai dêh čar Ea Bung, tơring glông Ea Sup, ơi Bùi Công Oách, Khua git gai ping gah brơi thâo, tơlơi lăp djă pioh hloh lĕ bruă plơi hmâo pơdŏng laih hơdră hmua pơdai ngă gru prong, mă yua hơdôm djuai pơjeh klă hiam kah hăng ST25, Đài thơm, hăng pok pơhai hơdră rông rơmô klai tui blok đang. Hơdôm hơdră anai leng kơ ba glăi bôh tơhnal bơwih ƀong hloh bơhmu hăng hlâo. Ơi Bùi Công Oách pơtŏng sit, hơdôm pơplih kơ tơlơi pơmin tơjŭ pla hăng rông hlô mơng mơnuih ƀôn sang hmâo gru nam mơng mơnuih apăn bruă, mơnuih ping gah Puih kơđông pơgang guai dêh čar ƀơi bah amăng jang Dak Ruê:

 “Mơng hrơi mơ̆ hmâo mơnuih mă bruă pơgang guai dêh čar rai jơnum hrom hăng grŭp ping gah, gah pơđĭ kyar bơwih ƀong mơng mơnuih ƀôn sang kơtang biă. Khom lăi truh tơlơi črâo ba kơjăp mơng Ping gah ăt kah hăng hơdôm mơnuih pơgang lŏn ia hmâo pơphô brơi kơ grŭp lu bôh yôm djơ̆ kơ pơđĭ kyar bơwih ƀong. Kah hăng abih bang thun anai mơnuih ƀôn sang ba pơjeh pơdai hmâo lu bôh hăng ST25 yua rah pơtem hăng hơdră ngă anai ƀing gơmơi glăk pơhư prong”.

Hăng pô blung a pok pơhai hơdră rông rơmô klai tui hơdră blok đang ƀơi să Ea Bung, ơi Đỗ Xuân Trường, Khua git gai Ping gah thôn 5, brơi thâo, hlâo adih neh wa biă ñu rông rơmô hơđăp ƀơi plơi pla pô, rông tlaih, ba glăi bôh tŭ yua ƀiă. Gơnang kơ mơnuih mă bruă pơgang lŏn ia abih pran jua lăi pơthâo hăng djru ba lu mơta, ñu hmâo pơphun truh kih laih bruă hơdai nao rông rơmô klai tui blok đang mơng rơnuč thun 2020. Thun hlâo, ñu hmâo kơmlai giăm truh kơ 100 klăk prăk hăng thun anai pơkă hlâo amra lu hloh ha mơkrah mrô anai. Lu sang anô̆ amăng plơi, amăng să ăt glăk ngă tui mơn hăng yak blung a brơi ƀuh bôh tơhnal gơnam kơ ngă tui hơdôm anô̆ gal hmâo hơđăp:

“Mơnuih mă bruă pơgang guai dêh čar lĕ djă tơngan črâo bruă, đa lĕ djru ngăn drăp pioh djru brơi kơ neh wa rông rơmô, ngă gal brơi pơđĭ kyar bơwih ƀong sang anô̆, hrô̆ trun rin rơpa. Neh wa rông hlô hmâo pơphun ba glăi bôh tŭ yua. Anô̆ gal hloh ƀơi anai lĕ gơnam ƀong ƀơi anai lu biă, kâo pơ̆ anai ngă rai lu pơdai, hmâo drăng pơdai lu kul glăi ñu pioh lui kơ rơmô ƀong sa thun. Hrom hăng anun, lŏn prong lĕ kâo pla rok, pla kơtor măh hĭ ñu pioh kơ rơmô ƀong”.

Dưi pơkiăo nao mă bruă ƀơi să Ea Bung ngă Kơ-iăng Khua git gai Ping gah să, Trung tá Nguyễn Văn Thanh, mơnuih mă bruă gah Puih kơđông pơgang guai dêh čar bah amăng jang Dak Ruê, brơi thâo, bruă blung a lĕ khul thâo kơjăp anih anom, thâo rơđah tơlơi ngă đang hmua mơng neh wa. Hrom hăng anun, ƀing gơñu khom hrăm tui, hyu hơduah ĕp tơlơi găn rơgao ƀơi lu anih, mơng anun mơng dưi lăi pơthâo, djru brơi neh wa pơphun ngă đang hmua ba glăi bôh tơhnal:

“Rơgao kơ gum hrom ƀơi anăp hăng neh wa amăng tơlơi hơdip mơda ăt kah hăng amăng bruă mă, ngă đang hmua lĕ tơlơi ƀơi să Ea Bung hmâo lu anô̆ gal, samơ̆ ƀuh bruă pơlar rông hlô hăng ngă hmua pơdai hmâo lu anô̆ gêh gal samơ̆ akă mă yua abih tơhnal ôh, dô̆ ngă lui lơi sôh mơn. Yua anun kâo khin hơtai pơphô brơi Ping gah kơtưn bruă git gai, črâo ba amăng bruă pơđĭ kyar bơwih ƀong, mơnuih mơnam. Biă ñu ƀơi anai lĕ đing nao kơ 2 mơta phun lĕ phun pơdai hăng dua lĕ rông rơmô”.

Thượng tá Phạm Đức Khá, Apăn bruă kơđi čar Puih kơđông pơgang guai dêh čar ƀơi bah amăng jang Dak Ruê, brơi thâo, ƀơi kual asuek lŏn drŏn krô kreñ Ea Bung, tơnap hloh lĕ ngă hiưm hơpă pơđĭ tui tơlơi hơdip mơda neh wa. Tơlơi hơdip mơda mơnuih ƀôn sang hơđong, pơđĭ kyar lĕ guai dêh čar amra kơjăp kơtang, pô guai dưi pơhlôm klă. Yua anun, lom pơkiăo nao mơnuih pơgang guai dêh čar gum hrom bruă ƀơi să hăng mơnuih ping gah gum hrom jơnum ƀơi hơdôm grŭp ping gah, anom bruă ruah mă tŏng ten hơdôm mơnuih apăn bruă, mơnuih ping gah hmâo bôh thâo, ia rơgơi, thâo hluh ƀơi anih anom dô̆. Ƀing apăn bruă, mơnuih ping gah hmâo ngă tui klă laih bruă mă, djru pơdŏng să Ea Bung jai hrơi jai pơđĭ kyar, kơjăp rơnuk rơnua hơđong kual guai dêh čar:

“Amăng ngă tui bruă kơđi čar mơng puih kơđông amăng hơdôm hrơi rơgao lĕ bruă mơng mơnuih apăn bruă phrâo pơkiăo nao ƀơi să, ăt kah hăng mơnuih ping gah gum hrom jơnum ƀơi hơdôm grŭp ping gah plơi pla să guai dêh čar hmâo ngă klă ba glăi bôh tơhnal. Hmâo djru laih kơ gưl ping gah, grŭp ping gah hơdôm bôh plơi pla hơkrŭ đĭ, pơđĭ tui bôh thâo, pran gơgrong mơng gưl ping gah, grŭp ping gah, hrom hăng gưl ping gah plơi pla pơdŏng hơdôm grŭp klă hiam, kơjăp kơtang. Hmâo ngă tui klă bruă mă lĕ jơlan tô nao rai kơplah wah Ping gah Puih kơđông pơgang guai dêh čar hăng Ping gah să”.

Thun 2021, să Ea Bung hmâo tŭ yap djơ̆ hăng plơi pla phrâo hăng anai lĕ să blung a ƀơi guai dêh čar mơng Daklak truh akô̆ pơkă jơlan hơdră anai. Pơdŏng plơi pla phrâo glăk nao hrom kơjăp hăng pơdŏng bruă pơgang lŏn ia abih bang mơnuih ƀôn sang kơjăp phik ƀơi guai dêh čar Ea Bung./.