Mơ̆ng anun, djru hrom mơnuih ƀôn sang djop djuai ƀiă hơđong tơlơi hơdip mơda, boh nik ñu djru čơđai sang hră tơnap tap hrưn đĭ amăng bruă hrăm hră hăng pơtop hrăm kơ drơi jăn.

Hrom hăng Khua mua git gai ling tơhan plơi prong Sơn La nao čuă sang anŏ adơi Chiêu Thanh Trúc, djuai ania Thái, hrăm anih 5 dŏ pơ plơi Nà Ngùa, gah grup mrô 2, phường Chiềng An, plơi prong  Sơn La, tơring čar Sơn La. Sang anŏ Trúc ƀun rin tơnap tap, amĭ ama ƀu hơmâo bruă mă hơđong ôh. Hloh kơ anun dơ̆ng ama Trúc duăm ruă, khom đih pơ sang ia jrao re se đôč, anun yơh sang anŏ jai kraih tơnap tap.

Thâo kơ tơlơi tơnap tap sang anŏ Trúc, Ping gah, khua mua anom bruă tơhan plơi prong Sơn La nao bưp sang anŏ ñu; laih dơ̆ng bưp khua sang hră gưl sa Lò Văn Giá-anih Trúc hlăk dŏ hrăm kiăng rơkâo djru ba, hơmâo tơlơi gêh găl nao hrăm hră. Ƀu ngă kơ amĭ ama, nai pơtô hrăm hră hăng ƀing khua mua, ling tơhan plơi prong bơngơ̆t ôh, lu thun rơgao Trúc hrăm thâo biă mă hăng jing amôn săng mơ̆ng Wa Hô. Chiêu Thanh Trúc ră ruai:

“Dưi hơmâo tơlơi djru mơ̆ng ƀing met ling tơhan, kâo mơak biă mă hăng djru ba hơmâo sa črăn kơ amĭ ama, kâo gir run hloh hrăm hră klă, dưi tŭ mă boh tơhnal lu kiăng huăi ngă rơngôt pran jua ƀing met ling tơhan hăng ƀing nai pơtô pơ sang hră”.

Pok pơhai hơdră “Yong tơkai adơi nao sang hră”, truh ră anai, khua mua ling tơhan plơi prong Sơn La hơmâo tŭ mă djru 5 čô adơi đeh čơđai sang hră ƀun rin sang anŏ tơnap tap hlăk dŏ hrăm ƀơi sang hră Lò Văn Giá, plơi prong Sơn La hăng rơnoh prăk djru 250 rơbâo prăk sa blan sa čô amăng5 thun na nao mơtam. Rơngiao kơ anun, dŏ djru ba gơnam yua hrăm hră kơ ƀing čơđai sang hră sit truh thun hrăm phrâo.

Trung tá Khuất Minh Tuấn, khua kơđi čar, sang bruă khua tơhan plơi prong Sơn La brơi thâo: Mrô prăk djru ƀu lu ôh, samơ̆ anai lĕ gơnam djru mơ̆ng khul grup, khua mua ling tơhan amăngsang bruă pioh kơ bruă djru pơtrut hrăm hră kơ ƀing čơđai  sang hră ƀun rin kiăng ĕp tơlơi thâo, jing mơnuih bon sang klă tŭ yua kơ plơi pla, dêh čar tơdơi anai:

“Pơ anăp anai, Ping gah, khua mua ling tơhan plơi prong gơmơi pơsit bruă mă pok pơhai ngă tui tŭ yua hloh hơdôm jơlan hơdră, tơlơi phiăn mơ̆ng Kơnuk kơna, ping gah ta, rơđah biă ñu hăng Hră pơtrun mơ̆ng khua mua ping gah anom bruă, hur har pơtô lăi kiăng thâo hluh kơ djop khua mua, ling tơhan amăng bruă, tơhnal ngă, boh yôm hiam mơ̆ng hơdră anai; laih dơ̆ng ngă hrom tong ten hăng djop sang bruă ping gah, gong gai kơnuk kơna amăng plơi prong, hyu ĕp jum yap anăn ƀing čơđai tơnap tap biă mă, mơ̆ng anun ĕp hơdră djru ba, pơtrut pơsur hmao kru kơ gơñu hrăm hră anăm tơbiă sang hră”.

Mơ̆ng bruă mă tŭ jum djru ba kơ čơđai sang hră tơnap tap yua anom bruă khua tơhan plơi prong, lu sang anŏ, khul grup, mơnuih ƀôn sang amăng plơi prong Sơn La ăt tŭ jum djru ba kah hăng hla hnil gôm ba hla tơ̆i. Truh ră anai, abih bang hơmâo 110 čô čơđai sang hră tơnap tap amăng plơi prong dưi tŭ jum djru ba amăng bruă hrăm hră. Ơi Hà Trung Chiến, Khua git gai ping gah plơi prong Sơn La brơi thâo:

Hăng bruă mă kơsung nao hlâo amăng lu bruă amăng tơlơi hơdip mơda, boh nik ñu bruă djru ngă hơđong tơlơi hơdip mơda mơnuih bon sang, rĭm čô khua, ling tơhan amăng sang bruă khua tơhan plơi prong Sơn La hơmâo ngă hăng hlăk ngă klă tơlơi glăm ba, tơlơi gơgrong amăng bruă djru ană plơi, lăp hăng tơlơi đăo kơnang mơ̆ng mơnuih bon sang djop djuai ania plơi prong Sơn La.

“Khua mua ping gah plơi prong lăng yôm biă mă tơlơi pơčeh phrâo ruah mă hơbô̆ brưa hăng bruă ngă mơ̆ng Khua mua ling tơhan plơi prong, hơdră ngă anai ƀu kơnong djru kơ lu sang anŏ, ƀing ană amôn čơđai sang hră ƀun rin đôč ôh, dŏ djru ngă gêh găl kơ lu mơnuih hrưn đĭ amăng tơlơi hơdip mơda, bruă ngă anai bang tơlơi bơngač amăng bruă kơđi čar pioh kơ djop sang bruă, anom bruă kơnuk kơna pơmin ngă hrom klă jơlan hơdră pơsir tơlơi tơnap kơ mơnuih mơnam amăng plơi prong”.

Nao hrom bruă pơsir tơlơi tơnap tap mơnuih mơnam hăng tep ačăng yong tơkai brơi adơi nao sang hră, ƀu kơnong jing bruă ngă hiam kă đôč ôh, jing bruă ngă djru tum teč, rơđah rơđong biă mă mơ̆ng sang bruă khua mua ling tơhan plơi prong Sơn La, ngă jă hiam ia iom rup rap kơ ling tơhan rơnuk Wa Hô.

Anai ăt jing atur phun kjăp pioh kơ anom bruă khua tơhan plơi prong gir run akŏ pơdong anom bruă ngă klă jĕ giăm pơtô ană plơi, ăt pơjing tơdron blah amăng pran jua ană plơi, pơđĭ tui hloh pran kơtang lu ling tơhan  mơ̆ng mơnuih ƀôn sang kiăng ngă djơ̆ bruă kơđi čar hăng pơđĭ tui bruă mă pơgang lŏn ia, ling tơhan plơi prong, djru man pơdong plơi prong Sơn La pơđĭ kyar mơtah mơda, hmar, hơđong kjăp, phrâo hloh, thâo rơgơi.