Amon Trần Quốc Thịnh hăng Trần Hoàng Duy, dŏ ƀơi plơi Nhì, să Mỹ Long Nam, tơring glông Cầu Ngang, tơring čar Trà Vinh lĕ čơđai drit druai. Amĭ ñu tơdơi kơ hyu mă bruă apah ataih mơng plơi pla, ĕp rơkơi phrâo dong, samơ̆ tơlơi hơdip ăt dŏ tơnap tap, yua anun pioh dua adơi ayong ñu hơdip hăng yă tha rơma yơh. Tlâo yă tơčô ñu hơdip rin rơpa, kơƀah djop mơta yua anun khŏm pơdơi sang hră. Bưng băi brơi kơ dua adơi ayong ñu, thun 2019 ling tơhan wai pơgang guai tơring čar Trà Vinh hơmâo pok pơhai hơbô̆ bruă “Ană rông puih kơđông tơhan” yua anun ƀing gơñu arăng ba glăi čem rông ƀơi puih kơđông tơhan Mỹ Long hăng hơmâo tơlơi dong yua mơng gong gai ƀon lan.

Trung úy Nguyễn Quốc Việt, tơhan hơmâo jao wai lăng, čung ba dua adơi ayong ñu brơi thâo, tơdơi kơ hơmâo ling tơhan čơkă mă, tơlơi hơdip dua adơi ayong ñu pơplih laih. Tơdơi kơ ha thun ngă ană rông ƀơi puih kơđông tơhan, mơng sa čô čơđai hrăm ƀu thâo ră anai jing rơgơi yơh, tơlơi hơdip jai hiam drơi jăn pran jua mơn.

“Hăng kâo pô ƀuh amon Duy lơ̆m ba rai hơdip amăng puih kơđông tơhan, ñu săng biă mă, nao pơpă lêng tơña soh, thâo luă gŭ arăng, bưp mơnuih pơprong lêng kơ thâo kuh soh…Mông ƀơi anai mơguah 5 mông tơgŭ laih, amon Duy ăt tơgŭ kiăo tui mơn. Amon Duy čang rơmang amra ngă ling tơhan tơdơi anai, ƀing gơmơi ăt gir run abih pran djru brơi, čung ba kiăng ñu hơmâo djop tơlơi gal dưi mut ngă ling tơhan”.

Amon Trần Hoàng Duy thun anai hrăm anih 6, amra hơdip hrŏm hăng ling tơhan truh hrơi ñu hrăm giong anih 9 kar hăng ayong ñu. Ñu brơi thâo, nao hơdip hrŏm amăng puih kơđông tơhan, bruă ƀong huă, pit đih lêng kơ djơ̆ mông soh, hơmâo ƀing anong met wa pơtô brơi, črâo ba yua anun ñu hrăm jai hrơi thâo tui. Ñu čang rơmang tơdơi anai amra jing sa čô tơhan kar hăng anong met wa:

“Ƀơi anai mơguah 5 mông tơgŭ prap nao sang hră laih, hăng rĭm mơguah ƀing met brơi 15 rơbâo prăk, bơ hrăm wŏt yang hrơi tlam brơi pơhrua 10 rơbâo dong. Truh tlam pot glăi huă asơi, bơrơguăt drơi jăn hrŏm hăng ƀing met. Kâo pap biă mă ƀing anong met ƀơi anai. Kâo amra gir kơtir hrăm rơgơi kiăng tơdơi anai dưi ngă ling tơhan, djru bruă amăng khul ling tơhan”.

Bơ amon Trần Quốc Thịnh, thun hlâo hrăm pơgiong gưl dua hăng dưi pot glăi hơdip hrŏm hăng sang anŏ, arăng pơmut amăng jơlan hơdră “Čung ba čơđai nao sang hră” hăng prăk djru 500 rơbâo/blan. Laih dong, kiăng ngă gêh gal hloh tơdơi kơ pot glăi pơ sang anŏ, ƀing apăn bruă, ling tơhan mơng puih kơđông tơhan Mỹ Long ăt pơtrut pơsur, dưi pơkrem 27 klăk prăk kiăng djru brơi ƀing čơđai, hrŏm hăng hơdrôm hră hăng gơnam yua pơkŏn. Trung tá Phan Thanh Sang, mơnuih apăn bruă Puih kơđông tơhan Mỹ Long brơi thâo, tơdơi kơ abih hrơi ngă ană rông, ƀing čơđai hơmâo pơmut amăng jơlan hơdră “Čung ba čơđai nao sang hră” kiăng tŏ tui djru hăng kiăo tui hrăm hrŏm hăng hră pơkrem. Yua anun, ƀing gơmơi amra gir run, pơtrut pơsur tơdruă, gum tơngan hrŏm gum djru brơi tui tơlơi dưi:

“Puih kơđông tơhan ngă tui jơlan hơdră anai dong mơng thun 2019. Kơnong kơ bruă rông ba 2 čô čơđai hơmâo jak iâu ƀing mơnuih čơmah, ƀing ling tơhan mơng anom bruă hăng puih kơđong tơhan pơkŏn djru. Tlâo dong lĕ keh prăk djru bơwih ƀong, ngă hiưm pă djru brơi, ngă gêh gal brơi ƀing čơđai klă hloh”.

Hrŏm hăng hơbô̆ bruă “Ană rông puih kơđông tơhan”, ƀing apăn bruă, ling tơhan puih kơđông Mỹ Long, tơring čar Trà Vinh ăt rông ba 10 čô čơđai sang anŏ tơnap tap amăng tơring čar tui jơlan hơdră “Čung ba čơđai nao sang hrăm”. Tui anun, rĭm čô čơđai hơmâo djru brơi 500 rơbâo/blan prăk duh hrăm hră truh abih anih 12. Mơng jơlan hơdră anai hơmâo djru brơi ƀing čơđai mơng hră ƀu thâo jing ƀing čơđai thâo rơgơi.

Mơng thun 2016 truh ră anai, ling tơhan wai pơgang guai tơring čar Trà Vinh tŏ tui djru brơi 34 čô čơđai sang anŏ tơnap tap hăng abih tih prăk rơbêh 1,4 klai. Rơnoh prăk anai yua hơdôm anom bruă djru, gum pơgôp mơng ƀing apăn bruă, ling tơhan amăng khul ling tơhan hăng keh prăk bơwih ƀong mơng hơdôm anom bruă. Mơng hơbô̆ bruă anai, hơdôm puih kơđông tơhan amăng đơ đam dêh čar hơmâo djru brơi, čem rông hơdôm rơtuh čô čơđai sang anŏ tơnap tap kual giăm guai kiăo tui hrăm hră, kiăng tơdơi ania jing mơnuih thâo mă bruă./.