Kiăng prăp lui kơ bruă pel ĕp rơwang bruă Tơlơi phiăn lŏn drŏn (pơplih pơkra) lăi pơthâo kơ Jơnum min apăn bruă Khua pơ ala mơnuih ƀôn sang amăng mông jơnum blan 4 hăng gum pơhiăp tal 2, tal jơnum lok 5, Khua pơ ala mơnuih ƀôn sang dêh čar ta tal 15, čơtlăm lơ 9/3, Jơnum min Bơwih ƀong pơphun mông mă bruă hăng Ding jum kông ngăn dlai tlô hăng rơhuông adai lŏn mơnai kiăng hmư̆ tơlơi lăi pơthâo glăi kơ rơnoh pok pơhai mơng Tơlơi phiăn lŏn drŏn (pơplih pơkra), hơdôm tơlơi rŭ đĭ lom mă tơlơi gum pơhiăp mơnuih ƀôn sang.

Khua git gai wai lăng pơ ala mơnuih ƀôn sang dêh čar ta ơi Vương Đình Huệ git gai mông mă bruă. Tui tơlơi lăi pơthâo glăi mơng Ding jum kông ngăn dlai tlô hăng rơhuông adai lŏn mơnai, yap truh lơ 6/3, tui mrô ƀơi website mă tơlơi gum pơhiăp mơnuih ƀôn sang mơng ƀirô čih pơkra, akă hmâo mrô mơng hơdôm plơi pla hmâo tŭ jum 7.873 wot tơlơi gum pơhiăp mơng 768 grŭp, mơnuih amăng hơdôm bôh yôm mơng hră čih pơkra tơlơi phiăn. Rơgao kơ ruah mă tơlơi gum pơhiăp mơng hơdôm ƀirô, khul grŭp, mơnuih, lu tơlơi gum pơhiăp tŭ ư hăng hơdôm bôh yôm phun mơng hră čih pơkra tơlơi phiăn, pơsit hră čih pơkra hmâo lu tơlơi pơplih laih, djơ̆ hăng tơlơi kiăng, tơlơi čang rơmang mơng mơnuih ƀôn sang, dưi ngă tui lŏn drŏn pioh pơđĭ kyar bơwih ƀong – mơnuih mơnam, djru wai lăng lŏn drŏn kơjăp, mă yua lŏn pơkrem, ba glăi bôh tơhnal. Klah čun mông mă bruă, ơi Vương Đình Huệ lăi rơđah, bruă mă tơlơi gum pơhiăp mơnuih ƀôn sang khom hluai tui pran jua tơpă sit, ƀu hmâo đing gah hơpă, pơdah rơđah, pơpŭ djop tơlơi gum pơhiăp. Khua git gai wai lăng pơ ala mơnuih ƀôn sang dêh čar ta tŭ ư hăng hơdôm tơlơi gum pơhiăp amăng mông mă bruă lĕ, khom pơsit hơdôm jơlan gah, rơkâo đĭ, ba tơbiă. Tơdơi kơ anun ruah mă sa dua mơta tơlơi yôm phăn, biă ñu lĕ hơdôm tơlơi dô̆ hmâo tơlơi gum pơhiăp pha ra ƀudah akă rơđah amăng rơwang bruă tơlơi phiăn kiăng pơphun kơsem min, mă tơlơi gum pơhiăp, pơphun bơkơtuai dơlăm hloh, tŏng ten hloh./.