Kơčăo bruă anai dưi ngă tui hră kĭ pơkôl ngă hrŏm plah wah anom bruă pơđĭ kyar ayuh hyiăng anih dŏ jar kmar Japan, Khul wai lăng mơnuih djơ̆ jrao hret dioxin Việt Nam hăng Anom bruă ngă hrŏm jar kmar Japan. Truh ră anai, hơdră pơtô hrăm bruă mă hơmâo 4 čô mơnuih kỹ sư mơnuih kơhnăk bruă hmua hăng 6 čô mơnuih kơhnăk gah bruă ia jrao djru kơ mơnuih mă bruă jing mơnuih ƀu klă drơi jăn yua bơbeč djơ̆ jrao hret. Hrŏm hăng anun, Jơnum min Japan djru Plơi djơ̆ jrao hret iâu pơthưr pơčruh prăk mơ̆ng 270 čô mơnuih ƀôn sang Japan, gum hrŏm man pơdong sang dăng hơñôl pioh pla añăm amăng ia hăng ngă đang war pla añăm pơtam ƀơi ƀôn prong Hồ Chí Minh.

Truh ră anai, hơbô̆ bruă pla añăm pơtam rơgoh hơmâo ba glăi rơnoh yôm, djru pơčeh pla añăm pơtam pơ plơi pla gah rơngiao ƀôn prong. Lu hră pơar rơkâo blơi añăm pơtam pơtruh nao rai tơlơi pơhing amăng plang Internet hăng sĭ pơthâo amăng plăng internet hơmâo lu mơnuih ƀôn sang ngă hrŏm, huăi tơguan kơnang kơ anih sĭ mơdrô ngă gong jơlan, anun yơh prăk kơmlai huăi rơngiă ôh hăng ba glăi boh tŭ yua lu kơ mơnuih ƀu klă drơi jăn sĭ mơdrô añăm pơtam gơñu pla.