Khua ding jum ơi Hầu A Lềnh brơi thâo tơlơi tơnap tap hloh ră anai lĕ pok pơhai jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng. Pơ anăp anai gơnong glông amra kơtưn pơpha glăi djop rơnoh kiăng ƀon lan pok pơhai jơlan hơdră. Kơ-iăng khua dêh čar ăt lăi pơtong pơ anăp anai pơtrut pơsir hĭ hăng pơgiong hră pơ-ar brơi kjăp kiăng hơdôm jơlan hơdră dưi jao prăk djơ̆ tơlơi rơkâo.

Mông tơña hăng lăi glăi pơphun  hur har hăng tơlơi tơña mơng khua mua tơpă nao hơdôm bruă aka ƀu klă amăng ngă tui 3 jơlan hơdră tui hơnong pơkă dêh čar amăng man pơdong plơi pla phrâo; pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng; pơhrŏ trun ƀun rin hơđong kjăp. Ơi Mai Văn Hải, khua pơ ala mơnuih ƀon sang tơring čar Thanh Hóa tơña:

“Tơdơi kơ rơbêh 2 thun pok pơhai ngă tui jơlan hơdră tui hơnong pơkă dêh čar amăng pơđĭ kyar bơwih ƀong huă, mơnuih mơnam kual mơnuih djuai ania ƀiă hăng čư̆ siăng rơwang thun 2021-2025 ba glăi sa, dua boh tŭ yua prong. Samơ̆ hrŏm hăng anun bruă dŏ kaih hăng hơmâo lu tơlơi gun găn amăng hơdră wai lăng. Rơkâo Khua ding jum brơi thâo, tơlơi tơnap tap, gun găn hơpă prong hloh hăng hơdră pơsir hĭ. Bơni kơ khua ding jum”.

Khua ding jum, Khua jơnum min djuai ania brơi thâo, jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng lĕ tơnap tap hloh. Yua jơlan hơdră prong hăng pok pơhai ƀơi kual tơnap tap hloh. Hơdôm akŏ bruă, hơdră bruă pơmut hrŏm jơlan hơdră hơmâo wŏt hơdră bruă mơng rơwang hlâo anun dong:

“Tơlơi gun găn prong hloh ră anai lĕ bruă pok pơhai ngă tui amăng ƀon lan, yua hơdôm akŏ bruă pok pơhai tong ten tơl rĭm boh plơi pla, rĭm sang anŏ. Kơ hơdră bruă ăt hơmâo hơdôm pok hră pơ-ar črâo ba djop laih, samơ̆ ăt ƀu bĕ hĭ tơlơi glêh tơnap sit nik phrâo ƀuh. Gơnong glông amra kơtưn amăng bruă pel ĕp, pơtrut pơsur hăng črâo ba pơsir hĭ hmao tlôn hơdôm tơlơi tơnap tap, gun găn brơi gong gai ƀon lan. Hăng hơdôm boh plơi pla, amăng hơdôm hră pơ-ar črâo ba tal anai amra kơtưn kah pha lu hloh rơnoh prăk kiăng ƀon lan gir run, đing nao pok pơhai ngă tui”.

Ăt amăng mông tơña hăng lăi glăi, Khua ding jum, khua jơnum min djuai ania Hầu A Lềnh lăi glăi hơdôm tơlơi tơnap tap, gun găn amăng hơdră djuai ania bơdjơ̆ nao bruă kah pha să, ƀon lan kual mơnuih djuai ania ƀiă, kual čư̆ siăng:

“Hơdôm boh să, ƀon lan hơmâo 15% mrô mơnuih djuai ania ƀiă pơ glông, arăng pơsit tong lĕ să ƀudah ƀon lan, kual mơnuih djuai ania ƀiă dŏ hơdip. Dua dong lĕ să rin rơpa lĕ să hơmâo 15% mrô mơnuih djuai ania ƀiă dŏ hơdip, ƀơi anun dŏ lu sang anŏ rin rơpa arăng amra iâu să rin. Bruă kah pha anai amra ba truh hơdôm bruă, lơ̆m pơsit anun lĕ să rin, plơi pla rin, bơ hơdôm boh să, plơi pla hơmâo mrô sang anŏ ƀun rin pơ yŭ 15% arăng ƀu lăng să rin, să tơnap tap dong tah-hăng anai lĕ bruă ngă tơnap tap”.

Bơdjơ̆ nao boh tơhnal pơtô hrăm brơi mơnuih djuai ania ƀiă, ơi Nguyễn Lân Hiếu, khua pơ ala mơnuih ƀon sang Bình Định tơña:

“Kâo kiăng tơña jơnum min hơmâo hơdôm tal pel ĕp kơ mrô mơnuih ƀu thâo boh hră amăng kual mơnuih djuai ania ƀiă mơng čơđai anet truh ƀing pơprong. Khhua ding jum hơmâo hơdră lăp djơ̆ kiăng Jơnum min djop djuai ania mơnuih mơnam hăng Ding jum pơtô pơjuăt pơsir hĭ bruă anai.

Khua ding jum Hầu A Lềnh brơi thâo:

“Tui mrô jŭ yap truh ră anai, mrô mơnuih djuai ania ƀiă aka ƀu thâo pơđok, čih tơlơi yuăn giăm 15%, anai ăt lĕ tơlơi dŏ ngă bơngŏt. Ƀing gơmơi amra gum hrŏm hăng Ding jum pơtô pơjuăt hơmâo hơdră amăng hơdôm pok hră pơ-ar pơsir amăng bruă pơtô hrăm pơ anăp kiăng pơsir hĭ mơtăm bruă anai hăng kual mơnuih djuai ania ƀiă, sit biă ñu lĕ 6 tơlơi pơtrun mơng Ding jum kơđi čar amăng pơđĭ kyar 6 kual bơwih ƀong huă, amăng anun hơmâo bruă pơđĭ kyar pơtô pơjuăt hơmâo lăi nao, amra kơsem min hăng hơmâo hơdră kiăng pơtô boh hră brơi mơnuih djuai ania ƀiă”.

Yă Vũ Thị Lưu Mai, khua pơ ala mơnuih ƀon sang ƀôn prong Hà Nội rơkâo Khua ding jum lăi rơđah kơ bruă jao prăk tuh pơ alin amăng hơdôm jơlan hơdră tui hơnong pơkă dêh čar dŏ aset 4.634 klai dưm dưm 51%. Lơm anun, ha bơnah hơmâo jao brơi hơdôm tal jơnum bơkơtuai, pơtop hrăm. Sit biă ñu, jao brơi jơnum bơkơtuai kơ bruă bơkơnar đah rơkơi đah kơmơi 64 klai. Črâo brơi bruă pơdô̆ rơkơi bơnai 102 klai. Pel ĕp jơnum bơkơtuai 88 klai. Lơm anun pơjing glông khăm pơjrao ƀon lan dưm dưm 38 klai. Khua ding jum, khua jơnum min djuai ania Hầu A Lềnh lăi rơđah: Akŏ bruă ania hơmâo kah pha amăng rơwang ania lĕ 2.382 klai hăng lu boh tơhnal, amăng anun hơmâo boh tơhnal pơtop hrăm, pơtô pơblang tui hơdôm bruă pôr pơhing. Yua anun yơh, rơnoh prăk kiăng djru brơi đah kơmơi hơmâo yua amăng tal pơtop hrăm hlâo anun, hơdôm bruă pokŏn amra pok pơhai amăng rơwang tŏ tui dong”.

Ƀơi anăp Khua pơ ala mơnuih ƀon sang dêh čar, kơ-iăng khua dêh čar ơi Trần Lưu Quang pơthâo tơlơi ngă soh hăng Khua pơ ala mơnuih ƀon sang dêh čar hăng neh met wa kual mơnuih djuai ania ƀiă, kual čư̆ siăng lơ̆m kaih pok pơhai jơlan hơdră pơđĭ kyar bơwih ƀong-mơnuih mơnam kual mơnuih djuai ania ƀiă hăng čư̆ siăng. Truh lơ 31/5/2023, rơnoh prăk mơng thun 2022 brơi jơlan hơdră anai kơnong 58% mrô prăk tuh pơ alin, pơđĭ kyar, rơnoh prăk amăng thun 2023 kơnong 17% mrô prăk tuh pơ alin pơđĭ kyar. Lơm anun kơnong 2 thun ha mơkrah kiăng ngă tui  rơwang tal 1 mơng akŏ bruă anai, tŏ tui dong, lu mơnuih djuai ania ƀă tŭ mă tơlơi djru mơng jơlan hơdră anai glăk dŏ hơdip ƀơi kual giăm guai, ataih, asuek, glăk hơmâo lu tơlơi tơnap tap kiăng wai pơgang lŏn ia ta. Kơ-iăng Khua dêh čar lăi nao lu tơlơi gun găn phun amăng bruă pok pơhai jơlan hơdră lĕ yua mrô hră pơ-ar pơtrun lu đơi yua anun ngă tơnap, gun găn brơi bruă jao prăk mơng gơnong glông. Kơ-iăng khua dêh čar lăi pơtong pơ anăp anai pơtrut pơsir hĭ, pơgiong hră pơ-ar djơ̆ tơlơi phiăn kiăng jơlan hơdră dưi jao prăk djơ̆ tơlơi rơkâo:

“Tơlơi yôm hloh lĕ ƀing ta amra pơtrut pơpha bruă ƀon lan kiăng ƀing gơñu gơgrong ngă tui hơdôm tơlơi mơ̆ kơnong ƀing gơñu kah mơng thâo ngă hiưm pă brơi kơ djơ̆. Hăng pran jua hrŏm, ƀing gơmơi gir run kiăng tŏ tui pơsir hĭ hơdôm bruă mơ̆ ƀing gơmơi thâo amra tŏ tui ngă tơnap, ngă hiưm pă kiăng pơsir hĭ tơlơi anai djơ̆ hăng tơlơi pơkă hăng djơ̆ tơlơi rơkâo mơng abih bang mơnuih”.

Pơđut hĭ mông tơña hăng hơdôm bruă bơdjơ̆ nao djuai ania, Khua pơ ala mơnuih ƀon sang dêh čar ơi Vương Đình Huệ lăng yôm mông tơña hăng lăi glăi pơphun hur har, gơgrong, tơpă sit hăng hơmâo lu tơlơi gum pơgôp. Lăi nao rơđah hơdôm anŏ aka ƀu klă, sit biă ñu bruă kaih pok pơhai hơdôm jơlan hơdră tui hơnong pơkă dêh čar. Sa, dua hră pơ-ar črâo ba dŏ kaih hăng aka ha amăng plĕ, aka ƀu tong ten, aka hơmâo hơnong pơkă tong ten, Khua pơ ala mơnuih ƀon sang dêh čar rơkâo pơ anăp anai kiăng khut khăt pok pơhai hơdôm hơdră bruă kiăng ngă pơgiong djop, hmao tlôn hơdôm tơlơi črâo trun, jơlan gah yôm phăn kơ hơdră djru djuai ania rơwang thun 2021-2030. Jak iâu pơgôp kiăng tuh pơ alin pơđĭ kyar bơwih ƀong huă kual mơnuih djuai ania ƀiă hăng čư̆ siăng; amăng anun đing nao kual tơnap tap hloh, kual mơnuih djuai ania ƀiă dŏ lu tơnap tap ….Ngă tui tŭ yua hơdră djru lŏn dŏ, lŏn ngă hmua, pơplih bruă mă brơi hơdôm boh sang anŏ djuai ania ƀiă aka bu hơmâo ƀudah kơƀah lŏn dŏ, lŏn ngă hmua hăng pơhlôm đơ đam glai rưng hăng lŏn mơnai pioh pơđĭ kyar glai rưng khŏm jao, brơi yua apah tơl ƀing mơnuih wai lăng glai./.