Grŭp Khua pơ ala mơnuih ƀôn sang tơring čar Gialai hmâo laih hơdôm mông bưp mơnuih ƀôn sang ƀơi hơdôm bôh tơring glông Phú Thiện, Đức Cơ, Čư̆ Păh, Đăk Đoa, Kbang, Čư̆ Prông, Đăk Pơ hăng Ia Grai. Amăng hơdôm mông bưp, mơnuih ƀôn sang tơring čar Gialai pơdah pran jua mơ-ak ƀơi anăp truh kih mơng tal jơnum lok 4 Khua pơ ala mơnuih ƀôn sang dêh čar ta tal 15. Mơnuih ƀôn sang ăt pơsit yôm mơn pran jua gơgrong mơng ƀing khua pơ ala mơnuih ƀôn sang tơring čar Gialai hmâo laih lu tơlơi gum pơhiăp yôm phăn amăng truh kih tal jơnum.

Mơnuih ƀôh sang rơkâo đĭ lu tơlơi akă dưi ngă giong ƀơi tơring čar, kah hăng đing nao tuh pơplai, pơđĭ tui anih anom mă yua amăng plơi pla, biă ñu jơlan nao rai. Tơlơi ia ƀlung ƀơi ƀing čơđai đĭ lu amăng thun rơgao, kơƀah anih anom ngui ngor kơ čơđai kual plơi pla, kual mơnuih djuai ania ƀiă dô̆. Amăng mông bưp, lu mơnuih ƀôn sang ăt rơkâo mơn hơdôm gơnong bruă hmâo hơdôm jơlan pơsir hơđong nua sĭ kơmok pruai, pơjeh pla hlô rông pioh mơnuih ngă đang hmua hơđong pran jua bơwih ƀong huă. Mơnuih ƀôn sang Lê Văn Trung, ƀơi thôn 3, să Ia Tô, tơring glông Ia Grai gum pơhiăp:

 “Tơlơi nua sĭ ƀu hơđong, dua lĕ kơmok pruai lĕ lu, neh wa bơwih brơi kơ phun kơ phê lĕ ƀu hmâo kơmlai ôh mơ̆, hloh pla hơdôm thun hăng anai laih, hơdôm mơta prăk tuh kơ kơmok pruai. Hlâo adih 600 rơbâo prăk sa kơsăk, ră anai đĭ giăm truh sa klăk prăk sa kơsăk laih anun prăk apah pĕ pơhrui dong... Neh wa ăt čang rơmang mơn Khua pơ ala mơnuih ƀôn sang, Gong gai pel ĕp kiăng ngă hơđong nua gơnam sĭ hăng kơmok pruai”.

Bơ̆ ƀơi tơring čar Daknông, Grŭp khua pơ ala Khua pơ ala mơnuih ƀôn sang tơring čar anai hmâo ngă tui laih hơdôm bruă bưp mơnuih ƀôn sang ƀơi hơdôm bôh tơring glông Dăk Rlấp, Dak Mil, Čư̆ Jut hăng plơi prong Gia Nghĩa. Mơnuih ƀôn sang Daknông pơsit yôm bruă mă mơng grŭp khua pơ ala mơng tơring čar lom gum hrom bơkơtuai, gum pơhiăp hăng tơña ƀơi anih jơnum Khua pơ ala mơnuih ƀôn sang. Mơnuih ƀôn sang ƀơi Daknông ăt rơkâo mơn lu tơlơi pơplih ngă pơ-ar amăng bruă lŏn drŏn, bruă pơkă kual mă yua lŏn, bruă tuh pơplai hơdôm ring bruă anom mă yua ƀơi plơi pla, agaih anih anom dô̆...

Amăng bruă pơgang pơgăn hưp ƀong kông ngăn, mơnuih ƀôn sang čang rơmang tơring čar Daknông kiăng pơtrut kơtang hloh dong pioh pơsir pơđut hơdôm kơđi tơlơi ƀuh rơđah hloh ƀơi plơi pla. Rơđah biă ñu kah hăng ƀơi să Dăk Nia, plơi prong Gia Nghĩa, lu mơnuih ƀôn sang rơkâo tañ ngă rơđah bruă gơgrong hăng hơkrŭ pơsir tơlơi ring bruă jơlan nao rai pơ̆ drai ia Liêng Nung lŏn tơhlom, ngă gun jơlan nao rai. Mơnuih ƀôn sang Nguyễn Đình Thi, ƀơi ƀôn Sê Rê U, să Dak Nia, lăi tơlơi gum pơhiăp:

 “Rơkâo brơi mơnuih ƀôn sang ƀing gơmơi thâo lĕ tơdơi kơ pơdŏng Grŭp črâo ba pơgang pơgăn hưp ƀong kông ngăn mơng tơring čar lĕ truh ră anai Grŭp hmâo ba mut jơlan hơdră pơsir hăng tŭ mă hơdôm bruă mă ƀu klă ƀơi tơring čar? Ră anai mơnuih ƀôn sang să Dak Nia ƀing gơmơi bơngot biă lĕ giăm truh 30 klai prăk tuh pơplai kơ Kual tuai čuă ngui Liêng Nung yap wot jơlan nao rai ră anai pơwot glăi mrô 0 mơ̆, ƀơi anai lĕ anih anom tuai čuă ngui plơi pla glăk pơdŏng”.

Ăt amăng rơwang hrơi tơjuh rơgao mơn, ơi Phan Đình Trạc, Ding kơna Ding jum kơđi čar, Ding kơna git gai Ping gah dêh čar, Khua Grŭp apăn bruă Ping gah dêh čar hrom hăng Grŭp Khua pơ ala mơnuih ƀôn sang tơring čar Lâm Đồng hmâo laih mông bưp mơnuih ƀôn sang ƀơi să Dă Nhim, tơring glông Lạc Dương.

Amăng mông bưp, neh wa mơnuih ƀôn sang să Dă Nhim, tơring glông Lạc Dương hmâo pơdah pran jua mơ-ak kơ hơdôm bôh tơhnal yôm phăn mơng tal jơnum lok 4, Khua pơ ala mơnuih ƀôn sang dêh čar tal 15, biă ñu hơdôm tơlơi Phiăn, Tơlơi pơtrun pơsit yôm phăn dưi pel ĕp. Hrom hăng anun, rơkâo đĭ dong Grŭp Khua pơ ala mơnuih ƀôn sang tơring čar Lâm Đồng sa dua tơlơi akă gal hăng rơkâo tơring glông, tơring čar hăng dêh čar khom tañ lăng ba, pel ĕp pơsir. Amăng anun, hmâo tơlơi jơlan mrô 27C răm tui, gun găn na nao yua kơ lŏn tơhlom, lu črăn čun čue huĭ rơhyư̆t hăng ƀu pơhlôm; tañ pel ĕp glăi, pơsit hră pơ-ar tŭ yap pô mă yua lŏn kơ mơnuih ƀôn sang; hơdră djru gum mơng mơnuih apăn bruă ƀu juăt gưl să ƀiă đơi; pơsir prăk čan đing nao djru bruă bơwih ƀong huă... Khua Jơnum min mơnuih ƀôn sang tơring čar Lâm Đồng, Jơnum min mơnuih ƀôn sang tơring glông Lạc Dương ăt ƀơi anăp lăi pơhing, lăi glăi sa dua mơta tơlơi gah pô dưi mơ̆ mơnuih ƀôn sang să Dă Nhim lăi đĭ.

Ơi Phan Đình Trạc, Khua Grŭp apăn bruă dêh čar čih djă pioh hơdôm tơlơi gum pơhiăp rơkâo đĭ mơng mơnuih ƀôn sang hăng amra ruah mă, hmâo tơlơi lăi pơthâo glăi kơ Khua pơ ala mơnuih ƀôn sang dêh čar amăng hơdôm tal jơnum pơ̆ anăp. Amăng anun, rơkâo tuh pơplai pok prong, pơkra glăi jơlan 27C jing tơlơi rơkâo sit nik biă mơng mơnuih ƀôn sang hăng djơ̆ hăng jơlan gah pơsit pơđĭ kyar kual Dăp Kơdư mơng Ding jum kơđi čar. Ơi Phan Đình Trạc, lăi:

 “Gah jơlan mrô 27C, kâo ƀuh Grŭp Khua pơ ala mơnuih ƀôn sang dêh čar ta khom hmâo mông mă bruă hăng Ding jum wai lăng jơlan nao rai hăng dŭ pơgiăn hrom hăng tơring čar pơtlaih hơdôm tơlơi tơnap tui anai. Anai ăt lĕ tơlơi dŏng măng jơlan gah pơsit hrom mơng Ding jum kơđi čar kơ Tơlơi pơtrun pơsit kual Dăp Kơdư. Amăng anun, sa jơlan gah pơsit yôm phăn jing tô nao rai hơdôm kual, kual Dăp Kơdư hăng hơdôm pran pơtrut pơđĭ kyar ƀơi kual Ngŏ, hăng ƀôn prong Hồ Chí Minh, hăng Khánh Hòa...”./.