Hrom hăng amăng dêh čar ta, ƀơi hơdôm tơring čar kual Dap Kơdư, bruă pơphun pơgôp hiăp mơnuih ƀôn sang kơ Tơlơi phiăn čih pơkra glăi Tơlơi phiăn lŏn mơnai pok pơhai pơ lu anih. Amăng anun, ƀơi tơring čar Gia Lai, grup hyu mă bruă mơ̆ng Ding jum kông ngăn lŏn glai hăng anih dŏ jum dar hơmâo mă bruă laih hăng Jơnum min mơnuih ƀôn sang hơdôm tơring čar kual Dap Kơdư laih anun dua boh tơring čar Ninh Thuận hăng Bình Thuận kơ tơlơi anai. Hơdôm tơlơi pơgôp hiăp anun lăi, kual Dap Kơdư hơmâo anŏ gêh găl phara, boh nik ñu tơlơi čih pioh gru phun, mrô mơnuih ƀôn sang mơ̆ng anih pơkŏn mut dŏ, kual hơmâo lu mơnuih djuai ƀiă, lŏn glai, ngă hmua prong.....

Yua kơ anun, ƀơi lu boh yôm phun khom pơkă rơđah tong ten hăng ƀu pơrơkua nao rai hăng lu mơta tơlơi phiăn. Biă mă ñu wai lăng lŏn ngă hmua, pla kyâo glai, jơlan hơdră kơnuk kơna pơkă brơi mơnuih ƀôn sang djuai ƀiă, tơlơi pơtrun rơnoh yua lŏn djơ̆ hăng hnong pơkă anih anom sĭ mơdrô....Ơi Nguyễn Ngọc Sâm, Kơ-iăng Khua Jơnum min mơnuih ƀôn sang tơring čar Kon Tum, pơgôp hiăp tui anai:

“Tơdơi kơ ngă tui Hră pơtrun mrô 118 lĕ tơring čar Kon Tum hơmâo pơkă glăi đơ đam lŏn arăng kơsing mă, đơ đam lŏn mơ̆ng hơdôm kông ty aka ƀu yua jao glăi kơ gong gai tơring čar, plơi pla wai lăng. Ră anai, tơnap hloh lĕ, pioh pơsir yua dah lu đơ đam lŏn anun hơmâo mơnuih yua laih, mă yua soh glăi hăng anŏ jao pơkă. Tơdơi kơ tơlơi phiăn lŏn mơnai čih pơkra glăi kiăng hơmâo jơlan hơdră tum teč hloh, hơmâo tơlơi pơtrun lăp djơ̆ pơsir ƀing mă yua lŏn anai, ƀing hlơi ƀu dưi, hnong pơkă brơi apah yua, ƀudah jao mă yua hiư̆m pă”.

Ƀơi mông jơnum bơkơtuai pơgôp hiăp mơ̆ng ană plơi pla hăng Kơčăo bruă čih pơkra tơlơi phiăn Lŏn mơnai phrâo dơ̆ng, yua kơ Jơnum min mơnuih ƀôn sang tơring čar Dak Lak pơphun, lu tơlơi pơgôp hiăp lăi lĕ: bruă pơtrut pơđĭ kyar lŏn mơnai, akŏ pơjing anih ngă lŏn hmua, lŏn glai pla kyâo kơnang kơ bruă brơi apah yua hăng pơjao nao rai mă prăk ƀudah lăi dưi sĭ nao rai tơlơi dưi yua lŏn anun jing anŏ pơkă phrâo, ngă gêh găl hloh či ngă tui hơdră bruă prong, đơ đam lŏn ngă hmua pla pơjing. Samơ̆ Tơlơi phiăn kiăng pơkă rơđah hloh kơ pô hlơi dưi apah yua ƀudah sĭ glăi tơlơi dưi yua. Ơi Huỳnh Bài, Khua khul anom bruă ngă ƀong hrom tơring čar Dak Lak rơkâo:

“Hăng ƀing brơi apah yua lŏn, sĭ glăi dưi yua lŏn khom pơkă rođah hloh. Bĕ hĭ tơlơi phiăn pơkă tui anun laih samơ̆ sit ngă tui mah hơmâo hră apah yua ƀudah sĭ glăi dưi yua ăt kơnang kơ bruă juă nua blơi, sit mơ̆n ƀing tơdu ƀu hơmâo tơlơi dưi kah hăng mơnuih ƀôn sang ngă hmua, sang bruă ngă ƀong hrom ƀu dưi bơrơsua, pơhno ôh ôh hăng sang bruă sĭ mơdrô pơprong hơmâo prăk lu, ngă hnun bơbeč djơ̆ bruă mă hăng tơlơi pơđĭ kyar bơwih ƀong huă mơnuih ƀôn sang dŏ pơ kual ataih. Kâo rơkâo Tơlơi phiăn anai, kiăng pơkă rơđah hloh pô hlơi dưi sĭ glăi, dưi apah yua lŏn mơ̆ ƀu tơguan juă nua blơi, kiăng kơ ƀing anun amuñ biă ngă tui djơ̆ tơlơi phiăn lŏn mơnai”.

Rơwang hrơi tơjuh rơgao, Khua apăn bruă phun Jơnum min bơwih ƀong huă mơ̆ng sang bruă khua pơ ala mơnuih ƀôn sang dêh čar pơphun jơnum mă bruă hăng khua mua Ding jum kông ngăn lŏn mơnai hănganih dŏ jum dar pioh hmư̆ lăi pơthâo kơ hnong pok pơhai Tơlơi phiăn Lŏn mơnai čih pơkra glăi, hơdôm tơlơi hlăk bơbeč djơ̆ amăng rơwang pơphun mă hiăp mơnuih ƀôn sang pơgôp brơi tơlơi phiăn anai, djop anom bruă, djop mơnuih tŭ ư hiư̆m pă hăng hơngah hiư̆m pă, pơtong glăi lu tơlơi pơblih phrâo, ngă djơ̆ anŏ kiăng amăng tơlơi hơdip mơda mơnuih ƀôn sang, dưi pơtum pran kơtang, anŏ gêh găl lŏn mơnai pơtrut pơđĭ kyar bơwih ƀong huă mơnuih mơnam, djru hrom bruă wai lăng lŏn tơnah tong ten hloh, mă yua lŏn thâo pơkrem, hơmâo boh tơhnal tŭ yua.

Klah čun mông mă bruă, Khua git gai pơ ala mơnuih ƀôn sang dêh čar ơi Vương Đình Huệ lăi lĕ, bruă mă hiăp mơnuih ƀôn sang pơgôp brơi kơčăo bruă tơlơi phiăn Lŏn mơnai čih glăi phrâo hlăk hơmâo lu mơnuih ƀôn sang ngă hrom tar ƀar, pơdah rai tơlơi đing nao mơ̆ng djop anom bruă kơnuk kơna, khul mơnuih mơnam kiăng pơgôp hrom tơlơi phiăn yôm anai. Tui hăng ơi Vương Đình Huệ, bruă pơphun mă hiăp mơnuih ƀôn sang djru pơgôp hiăp kơ tơlơi phiăn anai khom tơpă, djơ̆ hnong, ĕp lăng anŏ aka ƀu găl, djru kiăng găl hloh, pơpŭ tơlơi pơgôp hiăp mơ̆ng djop mơnuih. Ƀu brơi hơmâo jơnum mă hiăp mơ̆, ƀu hơmâo pô hlơi djru pơgôp hiăp brơi ôh laih anun tơlơi pơgôp hiăp mơ̆ ƀu čih pioh pơđing lăng; ƀu hơmâo ôh bruă djop tơlơi pơgôp hiăp mơ̆ng mơnuih ƀôn sang mơ̆ ƀu čih pioh hăng ƀu hơmâo tơlơi pơgôp hiăp pơpă ôh ƀu lăi pơthâo amăng mông jơnum. Khua git gai pơ ala mơnuih ƀôn sang dêh čar ơi Vương Đình Huệ pơtă pơtăn, ƀu dưi čih pơtum pioh tui hluai hăng khul čih pơkra lui hlâo ôh.

“Mă hiăp pơgôp mơ̆ng mơnuih ƀôn sang yôm pơphăn biă mă, samơ̆ ƀu djơ̆ lăi mă hiăp tŭ kơ hơmâo. Ră anai, tơlơi pơgôp hiăp tŭ yua hrup anun ƀu djơ̆ čih pioh pơtum glăi tŭ kơ hơmâo. Mơ̆ng anun, ngă pơblih hĭ boh tŭ yua mơ̆ng kơčăo bruă tơlơi phiăn čih pơkra phrâo ƀing ta hlăk ngă. Tơlơi anun yơh yôm hloh. Djop sang bruă pơpha tơlơi glăm ba hơmâo laih, ƀing ta khom lăng tui lơ̆m pơphun bruă mă anai khom tơpă hnong, rơđah rơđong, pơhaih ba mơtam”.

Khua git gai pơ ala mơnuih ƀôn sang dêh čar tŭ ư hăng lu tơlơi pơgôp hiăp amăng mông jơnum mă bruă lĕ, kiăng pơtong glăi rơđah anăp rơkâo, lăi pơthâo bruă mă. Giong anun ruah mă hơdôm mơta tơlơi yôm, boh nik ñu hơdôm tơlơi dŏ phara ba tơlơi pơgôp hiăp ƀudah aka ƀu rơđah amăng kơčăo bruă tơlơi phiăn pioh kơsem glăi, mă hiăp pơgôp dơ̆ng, pơphun jơnum pơčrông sai, bơkơtuai nao rai dơlăm hloh. Jơnum min apăn bruă phun git gai pơ ala mơnuih ƀôn sang dêh čar amra pioh sa hrơi jơnum hăng pơgôp hiăp boh yôm phun anai. Ơi Vương Đình Huệ, Khua git gai pơ ala mơnuih ƀôn sang dêh čar rơkâo, Jơnum min bơwih ƀong huă ngă hrom Khua čih pioh kơ anom bruă pơ ala mơnuih ƀôn sang dêh čar, ngă hră pơtrun kơ bruă mă kiăng djop sang bruă pơyŭ hơmâo kơnôl pioh ngă tui. Tơdơi kơ pơđut mông mă bruă, mă hiăp mơnuih ƀôn sang kơ kơčăo bruă tơlơi phiăn anai, lơ 25/3, djop sang bruă khom ngă giong lăi pơthâo ƀudah mơ-it glăi kơ Jơnum min apăn bruă phun pơ ala mơnuih ƀôn sang dêh čar yơh.