Amăng tuh pơ alin, Khua mua pơ ala mơnuih ƀon sang ăt lăi nao bruă jao prăk dŏ kaih amăng 3 jơlan hơdră tui hơnong pơkă dêh čar, sit biă ñu hăng jơlan hơdră phrâo amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng. Mah jơlan hơdră hơmâo pok pơhai sui thun anun lĕ man pơdong plơi pla phrâo hăng pơhrŏ trun ƀun rin hơđong kjăp, ăt kah hăng dŏ gun găn aka pơsir hĭ klă hloh. Ơi Đinh Ngọc Quý, Ding kơna khul apăn bruă Jơnum min mơnuih mơnam pơtă pơtăn: 

“Hơdôm hơnong pơkă pơmut hrŏm dŏ ngă tơnap tap, gun găn hăng Khua dêh čar kiăng ba tơbiă tơlơi črâo trun pơsir hĭ rơbêh 400 bruă gun găn, truh ră anai djop ding jum, gơnong bruă ăt hơmâo lăi glăi laih. Samơ̆, bruă čih pơkra tơlơi pơsit bơdjơ̆ nao bruă ngă tui, kah pha jơlan hơdră tui hơnong pơkă anai aka hơmâo pơtrun hmao tlôn hăng kơnuk kơna glăk amăng hrơi mông pơgiong. Čang rơmang pơ anăp anai, kơnuk kơna amra hmao tlôn pơtrut tañ bruă anai, ƀu djơ̆ kơnong djru brơi djop ding jum, gơnong bruă đôč ôh mơ̆ ăt kiăng djru brơi hơdôm boh ƀon lan pơsir hĭ tơnap tap, sit biă ñu amăng bruă ngă tui lêng ƀơi gưl tơring glông, să”.

Yă Nguyễn Thị Hải, dŏ ƀơi plơi Phú Vinh, să Ia Băng, tơring glông Chư Prông, tơring čar Gia Lai brơi thâo amăng hơdôm thun laih rơgao, bruă pok pơhai hơdôm jơlan hơdră tui hơnong pơkă dêh čar ƀơi kual ataih, asuek amăng tơring čar Gia Lai aka ƀu djơ̆ hăng tơlơi kiăng. Amăng anun yôm hloh lĕ tuh pơ alin man pơkra jơlan glông kiăng pơgôp hrưn đĭ tơlơi hơdip mơda, pơtrut pơdŭ pơgiăng gơnam sĭ mơdrô amăng kual tơnap tap.

“Tui kâo pơmĭn ƀơi hơdôm kual ataih, asuek kiăng tuh pơ alin lu ƀiă dong, sit biă ñu lĕ bruă tuh pơ alin man pơkra jơlan glông, yua anai ăt lĕ sa amăng hơdôm tơlơi gun găn ba truh pơ bruă ƀing čơđai lui sang hră, mơnuih ƀon sang găn nao rai, pơdŭ pơgiăng gơnam tam ăt tơnap tap, đa hơmâo gơnam samơ̆ ƀu dưi ba nao pơ sĭ mơdrô hmao tlôn”.

Mơnuih ƀon sang Dak Lak đing nao hơdră djru anom bơwih ƀong sĭ mơdrô anet hăng gap ƀrô amăng hrơi blan tơnap tap bơwih ƀong tui ră anai. Dak Lak ră anai hơmâo giăm 13.500 boh anom bơwih ƀong sĭ mơdrô glăk mă bruă, amăng anun anom bruă anet hăng gap ƀrô dưm dưm 97,5% mrô anom bơwih ƀong sĭ mơdrô amăng tơring čar. Hrơi blan laih rơgao, sa, dua hơdră hơmâo mă yua klă pơgôp djru brơi anom bơwih ƀong sĭ mơdrô anet hăng gap ƀrô. Samơ̆, lu mơnuih brơi thâo, sit nik anom bơwih ƀong sĭ mơdrô ăt dŏ bưp tơnap tap amăng čan prăk pơđĭ kyar bơwih ƀong lơ̆m sa, dua boh ding jum, gơnong bruă bơdjơ̆ nao aka ƀu hơmâo hră črâo trun tong ten, ba truh sư̆ rơbư̆ lơm pok pơhai ngă tui, sit biă ñu hăng hơdôm anom bơwih ƀong sĭ mơdrô gah ngă hmua. Yă Nguyễn Thị Hường, dŏ hơdip ƀơi plơi prong Buôn Ma Thuột, tơring čar Dak Lak rơkâo.

“Kơnuk kơna kiăng hơmâo hơdră djru đing nao anom bơwih ƀong sĭ mơdrô gah ngă hmua. Hlâo adih hơdôm hơdră mă yua brơi ngă hmua, anom bơwih ƀong hrŏm hơmâo ngă tui klă laih, ră anai kiăng hơmâo dong hơdôm hơdră djru brơi anom bơwih ƀong sĭ mơdrô gah ngă hmua gap ƀrô hăng anet pơhmutu lĕ djru čan prăk hăng hơdôm hơdră đing nao phara brơi gơnong bruă ngă hmua. Amăng jơnum tal anai, hơdôm anom bơwih ƀong sĭ mơdrô čang rơmang Khua pơ ala mơnuih ƀon sang dêh čar pơčrông sai dong kơ tơlơi anai”.

Tơlơi yôm hloh lĕ kơtưn tŭ yua hơdôm hơdră hơkrŭ hăng pơtrut pơđĭ kyar bơwih ƀong huă, mơ̆ ƀu kiăng hơmâo hơdôm hơdră phrâo. Anai lĕ tơlơi hơmâo lu Khua pơ ala mơnuih ƀon sang lăi nao amăng jơnum tal ania.

Khua mua pơ ala mơnuih ƀon sang lăi pơtong, tơlơi yôm hloh lĕ ba glăi tŭ yua  mơng ngăn drăp kah pha kiăng pơtrut tuh pơ alin bruă čar, ƀudah kiăng djru brơi anom bơwih ƀong sĭ mơdrô găn rơgao tơnap tap tui ră anai. Anai lĕ bruă mă yua ngăn drăp ba glăi tŭ yua hloh kiăng pơtrut kơtang bruă hơkrŭ glăi bơwih ƀong huă hăng pơđĭ kyar. Yua anun, ơi Phan Đức Hiếu, Ding kơna Jơnum min bơwih ƀong huă mơng Ƀirô Khua pơ ala mơnuih ƀon sang dêh čar hơmâo tơlơi tơña bơdjơ̆ nao tơlơi rơkâo mơng Kơnuk kơna kiăng tŏ ngă tui hơdră pơhrŏ 2% mrô jia pơhrui -VAT.

“Ngă tui hơdră pơhrŏ trun jia rơwang thun laih rơgao, kah hăng ƀuh lu tơlơi sư̆ rơbư̆, amăng anun hơmâo wŏt tơlơi ngă tơnap tap brơi anom bruă wai lăng hăng anom bơwih ƀong sĭ mơdrô lơ̆m ngă tui, kah hăng pơplih bruă jŭ yap, ƀudah hơdôm tơlơi tơña duh prăk kak hlâo hrơi pơkă, mah hră pơ-ar mơ-it nao tơdơi anun? tal anai čang rơmang hơmâo tơlơi găn rơgao, kiăng djru brơi hăng črâo ba kiăng Khua pơ ala mơnuih ƀon sang dêh čar hluai tui hrŏ jia VAT anai, hơmâo ngă tui sit nik mơ̆ huăi bưp tơnap tap, sư̆ rơbư̆. Tơdah bưp tơnap tap, sư̆ rơbư̆, boh tŭ yua mơng hơdră bruă amra hrŏ trun”.