Rơwang hrơi tơjuh rơgao, Grup khua mua pơ ala mơnuih ƀôn sang dêh čar djop tơring čar Dap Kơdư hơmâo nao bưp mơnuih ruah khua djop plơi pla. Ƀing čih tơlơi pơhing phrâo Gong phun jua pơhiăp Việt Nam lăi nao bruă mă anun ƀơi 2 boh tơring čar Dak Lak hăng Kon Tum.

Grup khua mua pơ ala mơnuih ƀôn sang dêh čar tơring čar Dak Lak hơmâo jơnum mă hiăp pơgôp kơ hơdôm pok hră pơdah thâo tơlơi phiăn, ƀing pơ ala mơnuih ƀôn sang dêh čar amra pơčrong sai jơnum lok anai. Ƀơi mông bưp, mơnuih ruah khua ƀơi Dak Lak pơgôp hiăp lu boh yôm phun bơdjơ̆ nao tơlơi phiăn Viễn Thông čih pơkra glăi; Tơlơi phiăn kông ngăn ia yua čih pơkra glăi; tơlơi phiăn djop anom bruă brơi čan prăk čih pơkra glăi; tơlơi phiăn wai lăng pơgang ring bruă gah ling tơhan hăng pơgang dêh čar; tơlơi phiăn sĭ mơdrô lŏn mơnai, gơnam  hơđong; tơlơi phiăn sang dŏ čih pơkra glăi.

Pơgôp hiăp kơ Tơlơi phiăn sĭ mơdrô lŏn mơnai gơnam hơđong, lu mơnuih lăi lĕ: Hăng hơdôm tơlơi pơkă phrâo, amra pơjing rai tơlơi phiăn pơkă djop hloh, sa hnong, tŭ ư hrom pioh wai lăng bruă sĭ mơdrô lŏn mơnai hăng gơnam hơđong lir hơbit, pơtrut anih anom sĭ mơdrô lŏn mơnai pơđĭ kyar tui hơdră sĭ mơdrô lơ̆n mơnai, gơnam hơđong. Ngă gêh gal kơ bruă sĭ mơdrô, pơblih nao rai amăng bruă anai amuñ hloh, djơ̆ găl hăng  bruă sĭ mơdrô tơpă laih anun pơhaih rơđah, tong ten. Samơ̆, kiăng pơđĭ tui bruă mă tơlơi glăm ba, anŏ gơgrong phun, tơlơi thâo kơ bruă mơ̆ng djop sang bruă kơnuk kơna wai lăng gah bruă sĭ mơdrô lŏn mơnai hăng gơnam hơđong, kiăng pơhrua nao dơ̆ng tơlơi pơkă, bruă pơtrun ngă tui tơlơi phiăn sĭ mơdrô lŏn mơnai hăng gơnam hơđong. Ơi Hoàng Trọng Hùng, Kơ-iăng Khua Gơnong bruă Tơlơi phiăn tơring čar Dak Lak pơgôp hiăp:

“Glông 6 mơta tơlơi 87 hơmâo lăi boh yôm phun kơnuk kơna wai lăng bruă mă sĭ mơdrô lŏn mơnai gơnam hơđong lĕ kâo rơkâo pơhrua nao dơ̆ng boh pia krăo lăng tơlơi pơhing ngă tui tơlơi phiăn sĭ mơdrô lŏn mơnai gơnam hơđong. Anun lĕ boh yôm phun yôm biă mă wai bruă lăng mơ̆ng kơnuk kơna. Laih anun ƀơi mơta tơlơi 89 ăt hơmâo boh yôm phun  lăi nao bruă jao kơ Ding jum Man pơdong  pơthâo brơi hăng Kơnuk kơna krăo lăng tơlơi pơhing ngă tui tơlơi phiăn amăng bruă sĭ mơdrô lŏn mơnai gơnam hơđong yua kơ anun rơkâo pơhrua dơ̆ng boh yôm phun anai”.

Pơhiăp glăi hăng mơnuih ruah khua amăng mông jơnum anun, Kơ-iăng Khua grup ƀing pơ ala mơnuih ƀôn sang dêh čar ƀơi tơring čar Dak Lak, Lê Thị Thanh Xuân čih pioh, lăng yôm hơdôm tơlơi pơgôp hiăp mơ̆ng lu khua mua, mơnuih ruah khua lăi nao kơ tơlơi phiăn hlăk čih pơkra glăi. Laih dơ̆ng čang rơmang ƀing pơ ala ăt djru pơgôp hiăp lu hloh, kơsem min tong ten kiăng pơgôp hiăp čih hăng hră mơ-it nao kơ ƀing pơ ala mơnuih ƀôn sang dêh čar ƀơi tơring čar djă ba, pơtum glăi hăng lăi pơthâo amăng mông jơnum lok 5.

Ăt amăng rơwang hrơi kom laih rơgao, Grup khua mua pơ ala mơnuih ƀôn sang dêh čar ƀơi Kon Tum ngă hrom Khua mua Jơnum min djop djuai ania mơnuih mơnam Việt Nam tơring čar Kon Tum hăng Khua mua anom bruă mơnuih tơpuôl tơring čar pơphun jơnum khul nao bưp mơnuih ruah khua hăng 100 čô mơnuih jing ƀing ngă kông ñơn ƀơi tơring čar.

Ƀơi mông bưp, mơnuih ruah khua jing kông ñơn ƀơi Kon Tum rơkâo đĭ hăng Grup khua mua pơ ala mơnuih ƀôn sang dêh čar 6 mơta bruă hăng 38 mơta boh yôm phun, kah hăng: Khul ngă bruă git gai, ngă tui jơlan hơdră djru mơ̆ng kơnuk kơna, Khul gah bruă ngă hmua, Khul gah bruă wai lăng kyâo glai; Khul gah bruă sĭ mơdrô pơkra ming; Khul gah bruă ia jrao; Khul gah bruă pơtô hrăm hăng Khul gah bruă djru mơnuih mơnam tơnap tap.

Lăi pơthâo hăng mơnuih ruah khua, ơi Phạm Đình Thanh, Kơ-iăng Khua grup pơ ala mơnuih ƀôn sang dêh čar ƀơi Kon Tum brơi thâo, hơdôm tơlơi mơnuih ruah khua rơkâo djop laih, mơ-it đĭ hăng kơnuk kơna, khua mua pơ ala mơnuih ƀôn sang hăng djop ding jum, anom bruă bơdjơ̆ nao. Kah hăng jơlan hơdră djru ba kơ mơnuih apăn bruă kơnuk kơna, mơnuih mă bruă apah ƀơi djop khul wai lăng pơgang glaỉưng; hơdră djru ba kơ ƀing nai ia jrao, boh nik ñu amăng hrơi blan mă bruă pơgang klin kheng tơnap tap....Kiăng abih bang tơlơi pơgôp hiăp anun, dưi čih pioh pơđing hmư̆ djop hăng pơsir brơi lăp, ơi Phạm Đình Thanh, rơkâo tui anai:

“Grup khua mua pơ ala mơnuih ƀông sang dêh čar ƀơi tơring čar rơkâo khua mua wai lăng anom bruă mơnuih tơpuôl tơring čar jŭ yap glăi hơdôm tơlơi rơkâo,djop bohyôm phun, amăng 38 mơta tơlơi anun ăt kiăng thâo hăng rơkâo đĭ phara tong ten ƀu ngă hrom hrom ôh. Tơdah čih hrom hrom soh tơnap biă mă sang bruă kơnuk kơna hơmâo tơlơi dưi pơsir hăng lăi glăi. Hơdôm boh yôm phun gah tơlơi gơgrong ba mơ̆ng hlơi thâo, gah anom bruă kơnuk kơna pơ Gơnong dlông lĕ gơmơi čih pioh, rơkâo đĭ hăng Jơnum min apăn bruă phun pơ ala mơnuih ƀôn sang dêh čar”.

Ƀơi mông bưp mơnuih ruah khua, Grup khua mua pơ ala mơnuih ƀôn sang amăng kual Dap Kơdư hơmâo lăi pơthâo akŏ bruă jơnum lok 5, khua mua  tal XV; laih dơ̆ng čih pioh hơdôm tơlơi pơgôp hiăp mơ̆ng mơnuih ƀôn sang ruah khua, lăi pơthâo hăng sang bruă kơnuk kơna hơdôm tơlơi rơkâo anun, kiăng anom bruă pơpă hơmâo tơlơi dưi khom pơsir hăng lăi glăi djơ̆ tơlơi phiăn.

Khua čih pioh gơnong bruă  pơ ala mơnuih ƀôn sang dêh čar, Khua anom bruă pơ ala mơnuih ƀôn sang dêh čar ơi Bùi Văn Cường brơi thâo, jơnum lok 5 khua mua pơ ala mơnuih ƀôn sang dêh čar tal XV pơphun amăng lơ 22/5; pơđut amăng lơ 20/6/2023, him lăng mă bruă amăng 22 hrơi, ăt prăp lui wơ̆t lơ 21/6/2023 tơdah ƀu djop hrơi či mă bruă yua aka ƀu giong bruă. Prăp lui jơnum lok anai dưi hơmâo djop sang bruă kơnuk kơna ngă hrom tong ten, hmar, tŭ yua, djơ̆ hrơi blan pơkă, kiăng hmao bơwih brơi kơ mông jơnum tŭ yua sit nik.