Ƀơi mông jơnum lok 4, khua mua pơ ala mơnuih ƀôn sang tơring čar Kon Tum tal XII rơwang bruă thun 2021-2026, pơtong glăi boh tơhnal ngă tui bruă mă amăng thun 2022 brơi ƀuh, lu tơhnal pơkă ƀu anăm ngă ôh. Rơđah biă mă ñu, thun 2022 hnong pơđĭ kyar tơring čar Kon Tum dưi ngă 9,5% pơkă hăng thun 2021. Rơnoh prăk pơhrui glăi rĭm čô mơnuih pơkă dưm dưm amăng sa thun đĭ tui mơ̆ng 47 klăk truh 52 klăk prăk. Prăk pơhrui jia kơnuk kơna him lăng hơmâo 4000 klai, dưi ngă 100% rơnoh jao. Amăng thun tơring čar Kon Tum hơmâo pơhưč 19 kơčăo bruă tuh pơ alin hăng rơnoh prăk rơkâo čih anăn tuh pơ alin 1.600 klai prăk.

Hrom hăng boh tơhnal dưi ngă laih, hơmâo 4 tơhnal pơkă yôm tơring car Kon Tum aka ƀu dưi ngă djop, kah hăng: Rơnoh pơđĭ kyar ƀu anăm ngă djơ̆ tui Hră pơtrun jơnum ping gah pơtrun khom đĭ mơ̆ng 10% pơngŏ; prăk yua amăng tơring čar; prăk čan tuh pơ alin kơ bruă čar hăng man pơdong plơi pla phrâo ăt ƀu djop tui akŏ bruă jao lơi. Hrom hăng anun, boh tơhnal pơblih bruă ngă hră pơar, pơblih hơdră jak iâu tuh pơ alin, pơđĭ tui hnong pơhno sĭ mơdrô amăng tơring čar aka ƀu pơblih tong ten ôh; Bruă mă duh glăi lŏn, đang mơnuih ƀôn sang djơ̆ hĭ jơlan arăng čuk pơkra phrâo dŏ kaih, pơhưč tuh pơ alin dŏ kơƀah….

Amăng tơlơi đĭ pơhiăp lơ̆m jơnum, ơi Dương Văn Trang, Khua git gai ping gah, khua jơnum min pơ ala mơnuih ƀôn sang tơring čar Kon Tum rơkâo ƀing khua mua pơ ala pơtum pơblang rơđah tơlơi dŏ kơƀah, anŏ aka ƀu dưi ngă hăng pơtong glăi tong ten kiăng hơmâo hơdră pơsir:

“Ƀing khua pơ ala pơtum pơčrông sai, pơblang tong ten, pơčrâo rơđah hơdôm tơlơi tơnap tap, anŏ dŏ kơđông, dŏ kơƀah hăng phun ñu, boh nik ñu tơlơi ngă amưng ba truh anŏ kơƀah khom pơsỉ tañ. Mơ̆ng anun, pơtong rơđah hơdôm hơdră ngă rơđah rơđong, tơpă ară, kiăng ngă tui tŭ yua hơdôm tơhnal pơtrun, tơlơi pơkă pơđĭ kyar bơwih ƀong huă mơnuih mơnam, prăk kăk, tuh pơ alin kơ thun 2023”.

Ƀơi mông jơnum anai, khua mua pơ ala mơnuih ƀôn sang tơring čar Kon Tum tal XII sem lăng, pơsit 22 hră lăi pơthâo hăng 31 mơta hră pơtrun sa hnong bruă hăng lu boh yôm phun pơkŏn pơdjơ̆ nao prong kơ tơlơi hơdip mơda mơnuih ƀôn sang amăng tơring čar.

Ăt amăng rơwang hrơi tơjuh rơgao mơ̆n, ƀơi mông jơnum lok 5, khua mua pơ ala mơnuih ƀôn sang tơring čar Dak Lak tal X, rơwang bruă thun 2021-2026, lu tơlơi đing nao amăng bruă mă dŏ tơdu mă yua prăk čan tuh pơ alin kơ bruă čar, akŏ pơjing anih anom ngă hmua pla pơjing gơnam sĭ mơdrô hơmâo gru mrô pơkă kual, kiăng bơwih brơi bruă sĭ mơdrô pơ dêh čar tač rơngiao, pơsir bruă mă kơ hlăk ai..ăt hơmâo lăi pơthâo mơ̆n.

Pơtong rơđah kơ bruă ngă tui bruă mă thun 2022, ƀing pơ ala lăi lĕ, lăng nao rup rap tơlơi pơhing bơwih ƀong huă mơnuih mơnam tơring čar Dak Lak thun anai hơmâo anŏ bơngač mơ̆n. Khă hnun, mă yua prăk čan tuh pơ alin kơ bruă čar ƀiă đơi kơnong 29,5%, hrom hăng anun pơhrua nao dơ̆ng lu kơčăo bruă, boh tŭ yua ring bruă aka djơ̆, ngă bơbeč truh tơlơi đăo kơnang mơ̆ng mơnuih ƀôn sang ăt kah hăng bruă rŭ glăi bơwih ƀong huă tơdơi kơ abih klin Covid 19. Yua kơ anun, pô pơ ala yă Tô Thị Tâm, tơring glông Ea Kar rơkâo:

“Tuh pơ alin hơdôm kơčăo bruă man pơdong khom pơhlôm kjăp. Hơmâo hơdôm ring bruă pơphun mơ̆ng akŏ thun truh rơnuč thun aka ƀu giong mơ̆n. Anŏ tŭ yua ring bruă anun ăt hơmâo tơlơi mơ̆n, kiăng đing nao pioh kơ mơnuih ƀôn sang pô tŭ mă yua hơdôm ring bruă anun, gơñu mơak kah mơ̆ng đăo kơnang kơ jơlan hơdră tơlơi pơtrun mơ̆ng kơnuk kơna tuh pơ alin djơ̆ lăp”.

Hăng bruă ngă hmua, lu khua mua pơ ala mơnuih ƀôn sang tơring čar Dak Lak rơkâo kiăng čih pơkra lu mơta tơlơi pơkă djơ̆ lăp, hơmâo jơlan hơdră rơđah rơđong hloh kiăng djru mơnuih ngă hmua pơđĭ kyar ngă hmua ba yua boh thâo ia rơgơi phrâo, pơjing rai bruă mă pơtruh nao rai sang bruă sĭ mơdrô hăng mơnuih ngă hmua. Hrom hăng anun, kiăng pơkă hnong, čih pơkra gru mrô pơkă kual pla boh čroh, biă mă ñu boh sầu riêng, kiăng anăm ngă tui pla lu kah hăng hơdôm thun hlâo pla giong koh lui, yua djơ̆ bơyan trun nua, nua đĭ lĕ anih blơi ƀu djop. Pô pơ ala yă Laị Thị Loan-Khua Khul mơnuih ngă hmua tơring čar Dak Lak rơkâo:

“Jơlan hơdră ƀu brơi pok prong đơ đam pla boh sầu riêng kơnong đing nao pla pơđĭ boh tŭ yua hiam, ƀing ta khom dăp hơdră pơkă hnong hiư̆m pă, kơñ mơnuih ƀôn sang ngă hmua pla tŭ kơ hơmâo hơdôm kiăng, koh drôm lui kơphê pioh pla sầu riêng. Tui hăng ƀing mơnuih kơhnâo kơhnăk lăi, 5 thun pơ anăp dơ̆ng anih sĭ mơdrô boh sầu riêng pơ dêh čar Khač, yua dêh čar Khač pô pla, amra lu hloh”.

Hrom hăng anun, lu khua mua pơ ala ăt lăi pơthâo tơlơi hlăk hơmâo amăng tơring čar Dak Lak, kah hăng pơsir bruă mă kơ mơnuih mă bruă glăi mơ̆ng hơdôm tơring čar gah dơnung yua kơ lu tơlơi prăk trun nua, ƀu hơmâo bruă mă; dăp bruă mơnuih apăn bruă pơkă hnong mrô apăn bruă kơnuk kơna amăng tơring glông; pơkra hơdră, tơlơi djru kơ mơnuih apăn bruă ngă khua amăng kual plơi pla, pơđĭ tui rơnoh prăk blan, pơđĭ tui tơlơi hơdip mơda kơ ƀing nai pơtô hrăm hră kiăng hơđong pran jua mă bruă.

Ăt amăng rơwang hrơi tơjuh tơgao mơ̆n, jơnum lok 23, khua mua pơ ala mơnuih ƀôn sang tơring čar Dak Nông tal IV, pơčrông sai, ĕp lăng, pơsit hơdôm pok hră rơkâo đĭ, hră pơtrun kơ jơnum lok 5, khua mua pơ ala tal IV, rơwang bruă thun 2021-2026. Amăng anun, lu hră rơkâo, kơčăo bruă hơmâo lu khua pơ ala đing nao, djru pơgôp hiăp kiăng ngă djơ̆ đah mơ̆ng dưi thâo ngă tui sit nik.