Ƀơi djop mông bưp, mơnuih ƀôn sang ruah khua tơring čar Gia Lai lăng yôm pran jua mă bruă mơ̆ng ƀing pơ ala mơnuih ƀôn sang dêh čar mơ̆ng Gia Lai, hơmâo pơgôp hiăp prong, yôm amăng bruă mă jơnum khua mua pơ ala. Mơnuih ƀôn sang ruah khua rơkâo đĭ hơdôm tơlơi aka ƀu tŭ ư nao rai ƀơi tơring čar, kah hăng đing nao tuh pơ alin, pơđĭ tui bruă čuk pơkra jơlan glông, boh nik ñu kơ jơlan glông nao rai amăng plơi pla, kual mơnuih djuai ƀiă.

Ƀơi mông bưp, lu mơnuih ruah khua ăt rơkâo đĭ djop anom bruă ĕp hơdră ngă hơđong bruă pơtô čơđai sang hră yua thun blan rơgao lu čơđai muai djai ƀlung ia, kơƀah anih ngui ƀơi kual plơi pla, ngă hơđong anih anom sĭ mơdrô kmơ̆k pruai, gơnam yua mă bruă đang hmua pioh kơ mơnuih ngă hmua hơđong pran jua mă bruă.