Hrŏm hăng tơlơi pơhing lăi pơthâo boh tơhnal jơnum, ƀing pơ ala mơnuih ƀôn sang dêh čar čih pioh lu tơlơi, lăi glăi tơlơi tơña, pơgôp hiăp mơ̆ng mơnuih ruah khua.

Grup khua mua pơ ala mơnuih ƀôn sang dêh čar tơring čar Dak Nông hơmâo pơphun nao bưp mơnuih ruah khua ƀơi hơdôm phường amăng plơi prong Gia Nghĩa kah hăng phường Nghĩa Đức, să Nam Bình tơring glông Dak Song, să Dak Lao tơring glông Dak Mil hăng să Čư̆ Knia tơring glông Čư̆ Jŭt. Ƀơi mông bưp, ƀing pơ ala mơnuih ƀôn sang dêh čar hơmâo lăi pơthâo hăng lu mơnuih ƀôn sang ruah khua kơ tal jơnum lok 5.

Lăng yôm bruă mă mơ̆ng Grup pơ ala mơnuih ƀôn sang dêh čar ƀơi Dak Nông amăng mông jơnum prong anun, mơnuih ƀôn sang ruah khua čang rơmang Kơnuk kơna lŏn ia tuh pơ alin lu hloh ngă pơgiong atur man pơdong plơi pla, pơsir hĭ tơlơi tơnap tap kơ jơlan glông, sang hră, sang ia jrao ƀơi plơi pla pơtrut bơwih ƀong huă mơnuih mơnam pơđĭ tơlơi hơdip mơda ană plơi pla. Hrŏm hăng anun, mơnuih ruah khua ƀơi Dak Nông lăi mơ̆n kơ tơlơi hơmâo lu čơđai ƀlung ia samơ̆ aka ƀu hơmâo hơdră pơhlôm, pơgang klă ôh; lu kơčăo bruă pơkra apui lơtrik dar hăng angin ƀơi Dak Song giong laih aka ƀu ƀu pơkĕ pơdar apui lơtrik ôh.

Mơnuih ruah khua rơkâo hăng ƀing pơ ala mơnuih ƀôn sang dêh čar kiăng hơmâo lu jơlan hơdră pơkong ƀing khua mua, mơnuih apăn bruă kơhnâo gah bruă ia jrao, khom hơmâo hơdră djru ba mơnuih tha rơma. Ƀuh rơđah biă ñu, amăng bruă lŏn mơnai, mơnuih ruah khua ƀơi Dak Nông rơkâo brơi pơsir bruă čuk pơdăo mă glăi lŏn duh prăk kơ mơnuih ƀôn sang gun lu, ngă hră črek ling pơpha dŏ tơnap, pơblih bruă yua lŏn aka ƀu djơ̆ anŏ pơkă, akŏ bruă yua lŏn sui thun....Mơnuih ƀôn sang ruah khua ơi Trần Văn Chức, dŏ pơ phường Nghĩa Đức, plơi prong Gia Nghĩa rơkâo đĭ:

“Kâo ƀuh hră pơkă ling tui hla kak pơkă hnong hlâo adih hăng ră anai dŏ lu tơlơi bơrơkua nao rai, biă mă ñu akŏ bruă mă yua lŏn mơnai thun 2022 hăng akŏ bruă yua lŏn mơnai thun 2023 ăt bơrơkua mơ̆n, mơ̆ng anun lu sang anŏ mơnuih ƀôn sang ngă hră pơar rơkâo pơblih hơdră mă yua lŏn đang hmua jing lŏn pơdong sang mơ̆ lu wơ̆t nao rai rơngiă prăk apah nao pơkă lăng, tuč rơnuč ăt aka ƀu dưi ngă hră pơar mơ̆n, ngă tơnap biă mă kơ mơnuih ƀôn sang”.

Ăt amăng rơwang hrơi tơjuh laih rơgao mơ̆n, ƀing pơ ala mơnuih ƀôn sang tơring čar Dak Lak hơmâo mông nao bưp mơnuih ruah khua ƀơi tơring glông Čư̆ Mgar, Lak, Krông Bông hăng plơi prong Ƀuôn Ma Thuôt. Ƀơi hơdôm anih nao bưp, ƀing pơ ala mơnuih ƀôn sang dêh čar tơring čar Dak Lak hơmâo lăi pơthâo boh tơhnal mă bruă amăng mông jơnum lok 5, khua mua pơ ala tal XV phrâo anai hăng bruă mă mơ̆ng grup khua mua pơ ala mơnuih ƀôn sang dêh čar amăng mông jơnum anun; pơđing hmư̆ hăng čih pioh tơlơi pơgôp hiăp mơ̆ng mơnuih ƀôn sang ruah khua mơ-it hăng khua mua pơ ala mơnuih ƀôn sang dêh čar.

Ƀơi hơdôm boh plơi pla, tơring čar, mơnuih ƀôn sang ruah khua đing nao hloh lĕ tơlơi pơhing kơđi čar hăng rơnuk rơnua mơnuih mơnam, boh nik ñu tơdơi kơ hơmâo tơlơi rung răng ƀơi tơring glông Čư̆ Kuin, Dak Lak. Mơnuih ƀôn sang ruah khua lăi lĕ, bruă anun hơmâo ăt đing nao tañ, pơsir hmao kru mơ̆ng tơhan djop sang bruă kơnuk kơna, ngă tui sa hnong, mơnuih ƀôn sang gum hrŏm. Khă tui anun, anai ăt jing sa bruă mă djop sang bruă kơnuk kơna khom đing, sa tơlơi hrăm kơ abih bang sang bruă kơnuk kơna, sa glông bruă kơđi čar, kiăng pơđĭ tui tơlơi răng kơđiăng, pran jua gum pơgôp djuai ania, hŭi ayăt roh plư, ngă pơrung pơrăng. Mơnuih ƀôn sang ruah khua ơi Lê Đình Trúc, dŏ pơ thôn 1, să Ea Kiêt, tơring glông Čư̆ Mgar rơkâo đĭ tui anai:

“Ƀing gơmơi čang rơmang kiăng atur tơlơi rơnuk rơnua tơring čar Dak Lak lăi hrŏm, mơnuih ƀôn sang djop să hnun mơ̆n, kah hăng să Ea Kiêt gơmơi kiăng thâo krăn pô hlơi thâo ƀudah amăng tơlơi hơgĕt či rung răng khom dưi wai lăng tong ten laih anun pơsir hĭ anăm ngă bơbeč truh kơ tơlơi rung răng amăng plơi pla ôh. Kah hăng gơmơi hlăk gir run akŏ pơdong plơi pla phrâo. Kiăng dưi ngă tơlơi anun, khom ngă djop, hrŏm hăng tơlơi bơwih ƀong huă, kơđi čar bruă mơnuih mơnam, pơhlôm hơđong dêh čar”.

Hrŏm hăng anun, mơnuih ƀôn sang ruah khua ƀơi plơi prong Ƀuôn Ma Thuôt ăt đing nao mơ̆n kơ Bruă pơkă hnong yua lŏn mơnai mơ̆ng thun 2021-2030 yua Jơnum min mơnuih ƀôn sang plơi prong phrâo pôr pơthâo blan 5 rơgao. Tui hăng tơlơi pơtrun anai, amra hơmâo 1.100 ha lŏn ƀơi 12 boh să, phường amăng plơi prong amra pơblih glăi mơ̆ng lŏn dŏ plơi jing hĭ lŏn ngă hmua đôč hăng lŏn pla kyâo ngă đang bơnga. Mơnuih ƀôn sang ruah khua amăng kual anai tơña, tơdah pơkă hnong tui hăng anai amăng plơi pla amra ƀu hơmâo lŏn dŏ dơ̆ng tah. Mơnuih ƀôn sang ruah khua Y Mnông Hmŏk, dŏ pơ să Ea Kao, plơi prong Ƀuôn Ma Thuôt rơkâo đĭ:

“Amăng 14 boh plơi pla kâo ƀuh pơkă hnong lŏn pioh dŏ plơi ƀiă biă mă, aka ƀu găl hăng kual plơi pla ôh. Mơnuih ƀôn sang gơmơi khom hơmâo lŏn dŏ pioh pơdong plơi pla, pơdong sang hăng pơpha kơ ană tơčô rơnuk tơdơi. Kah hăng amăng ƀôn Huê, să Ea Kao, plơi prong Ƀuôn Ma Thuôt, tui hăng kâo lăng amăng hră lơ kak pơkă lŏn dŏ hăng lŏn pla kyâo sui thun, lŏn sĭ mơdrô bơwih bơwăng, lŏn ngă anih čơđai ngui hăng lŏn čuk jơlan, pơdong sang bruă ƀu hơmâo ôh. Yua ko anun ƀuôn Huê să Ea Kao dŏ mơ̆ng đưm laih tơdơi anai ƀu thâo ƀuôn Huê anai nao pơpă dơ̆ng tah”.

Čih pioh tơlơi pơgôp hiăp anun mơ̆ng mơnuih ƀôn sang ruah khua, grup khua mua pơ ala mơnuih ƀôn sang dêh čar tơring čar Dak Lak rơkâo djop sang bruă hơmâo tơlơi dưi amăng tơring čar khom pơblang glăi. Hăng tơlơi pơkŏn, grup amra čih pơgôp abih, pioh ba pơdah hăng khua mua pơ ala mơnuih ƀôn sang jơnum pơ anăp anai, hăng lăi pơthâo djop ding jum, anom bruă amăng tal jơnum tŏ tui.