Mơguah lơ 26/7, Trung tướng Thái Đại Ngọc, Khua git gai Quân khu 5, hrŏm hăng Grup khua mơ̆ng Quân khu 5 hơmâo nao čuă, brơi gơnam kơ Amĭ Việt nam sông kơtang, sang anŏ hơmâo anăn kơnuk kơna djru, tơhan rơka ƀơi kuâ̆n Cẩm Lệ hăng tơring glông Hòa Vang, ƀôn prong Đà Nẵng. Pơ ala kơ khua mua, ling tơhan Quân khu 5, Trung tướng Thái Đại Ngọc hơdor bơni biă mă kơ ƀing Amĭ Việt Nam sông kơtang, tơhan rơka, tơhan duam ruă, sang anŏ hơmâo anăn kơnuk kơna djru ƀu hŭi kơ tuh drah pơčah asar kơ bruă hơkrŭ, pơlir hơbit lŏn ia. Ƀơi Quân khu 5, rơbêh 180.000 čô tơhan djai pơsăn drơi, 176 rơbâo čô tơhan rơka tuh drah pơsah asar amăng dua wơ̆t blah ayăt Prang, ayăt Mi. Ră anai, Quân khu 5 pơkiăo nao 3 grup hyu duñ tơlang tơhan djai pơsăn drơi hyu ĕp tơlang tơhan ƀơi 2 boh dêh čar Lao hăng Kur.

Anom bruă pơsur ngă hmua dêh čar phrâo nao čuă, ƀơk gơnam brơi hơdôm boh sang anŏ mơnuih djuai ania ƀiă djru ngă hơkrŭ ƀơi să Quảng Nhân, tơring glông A Lưới, Thừa Thiên Huế. Ƀơi plơi Pi Ân 2, anom bruă hơmâo nao čuă hăng ƀơk gơnam brơi yă Kăn Nghĩah (97 thun) djuai ania Pa Cô. Yă Kăn Nghĩah hơmâo lu tơlơi gum pơgôp amăng 2 rơnuk blah wang. Ăt ƀơi plơi Pi Ân 2, anom bruă hơmâo nao čuă hăng ƀơk gơnam brơi yă Kăn Cần (92 thun). Yă Cần djuai ania Pa Cô lĕ mơnuih tui hơdră djru, hơmâo djru ngă hơkrŭ laih dong lĕ sang anŏ ƀun rin amăng să Quảng Nhân, tơring glông A Lưới. 

Ƀơi kual Dap Kơdư, ăt hơmâo lu bruă “hơdor tơngia”, pơdah pran jua “mơñum ia hơdor kơ pô klơi”. Ƀơi tơring glông Đăk Glei, tơring čar Kon Tum, Kông ti Apui lơtrik Kon Tum pơphun mă yua hăng jao glăi 6 boh sang hơdor tơngia hrŏm hăng lu anung gơnam kơ hơdôm boh sang anŏ rin, djuai ania ƀiă sang anŏ tơnap tao, sang anŏ hơmâo anăn kơnuk kơna djru, mơnuih djru hơkrŭ lŏn ia ƀơi 2 boh să Mường Hoong hăng Ngọc Linh. Ƀơi să guai dêh čar Ia Rvê, tơring glông Ea Súp, Anom bruă git gai tơhan pơgang guai tơring čar Dak Lăk ăt ngă hrŏm hăng hơdôm anom bruă pơphun mă yua hăng jao glăi “Sang dŏ gum pơgôp tơhan hăng mơnuih ƀôn sang” kơ sang anŏ ơi Phan Thanh Sang. Sang dŏ hơmâo nua 210 klăk prăk. Amăng anun, 100 klăk prăk kơ ƀing khua, ling tơhan hơdôm puih kơđông tơhan pơgôp, mrô prăk dŏ glăi yua sang anŏ, kơnung djuai djru ba; khua mua, ling tơhan Puih kơđông tơhan pơgang guai Ia Rvê djru hrơi mă bruă man pơkra sang.