Khua anom djru bruă pơ ala mơnuih ƀon sang, Kơ-iăng khua anom pơphun bruă ping gah yă Nguyễn Thị Thanh brơi thâo, 20 laih rơgao, Anom djru bruă khua pơ ala mơnuih ƀon sang hơmâo ngă hrŏm hăng hơdôm anom bruă bơdjơ̆ nao pơphô bruă kơ Jơnum min apăn bruă git gai pơ ala mơnuih ƀon sang pơsit jing tơlơi phiăn tơlơi pơtrun mơng Ping gah, amăng bruă pơkra, pơhrua tui Phiah phiăn 2013, biă ñu hơdôm tơlơi pơkă kơ ruah khua, Khul ruah khua Dêh čar.

Mơng thun 2005 truh ră anai, Anom djru bruă khua pơ ala mơnuih ƀon sang hơmâo pơphun 142 wơ̆t jơnum kiăng kơjăp bruă mă, pơhưč hơmâo giăm 15.000 čô khua pơ ala mơnuih ƀon sang dêh čar, Jơnum min pơ ala mơnuih ƀon sang tơring čar, khua mua hăng mơnuih apăn bruă mơng Anom bruă khul khua pơ ala hăng Jơnum min pơ ala mơnuih ƀon sang djŏp tơring čar, ƀon prong.

Kơ bruă Jơnum min pơ ala mơnuih ƀon sang, Anom bruă hơmâo ngă bruă klă, hmao tlôn lăi pơthâo kơ Jơnum min apăn bruă pơ ala mơnuih ƀon sang dêh čar hơmâo pơtrun 400 hră pơ-ar pơtô ba bruă mă mơng Jơnum min pơ ala mơnuih ƀon sang djŏp tơring čar, ƀon prong, mơng anun ƀơ ƀrư̆ pơsir hĭ tơlơi tơnap tap, aka ƀu rơđah amăng bruă mă, mơng anun ngă gêh gal kiăng jơnum min pơ ala mơnuih ƀon sang djŏp gưl ngă bruă klă, pơtrut tui tơlơi gơgrong hăng kơnuk kơna, pơ ala kơ tơlơi pơmin pran jua kơtưn pơ anăp, tơlơi čang rơmang, tơlơi dưi ngă pô mơng Mơnuih ƀon sang ƀơi plơi pla.

Pơ ala kơ khua mua pơ ala mơnuih ƀon sang dêh čar, pơhiăp ƀơi mông ngă lơphet, Kơ-iăng khua git gai pơ ala mơnuih ƀon sang dêh čar ơi Trần Thanh Mẫn lăi, Ping gah hơmâo pơsit laih: “Ƀing khua jing pô pơsit tơlơi dưi hă ƀŭ mơng bruă hơkrŭ, pơlir hăng tơlơi dŏ dong mơng Ping gah, mơng lŏn ia, laih anun tơlơi phiăn đĭ kyar lŏn ia, jing pô yôm hloh amăng bruă akŏ pơdong Ping gah”. Kơ tơlơi pơkă mơng khua pơ ala mơnuih ƀon sang, Khua mir sir Hồ Chí Minh hơmâo lăi tum teč samơ̆ djŏp anun lĕ: “Khua git gai pơ ala mơnuih ƀon sang khŏm hơmâo ƀing khua mă bruă rơgơi djơ̆ hăng tơlơi đăo gơnang, ƀing khua ha pran jua bơwih brơi Lŏn ia, bơwih brơi mơnuih ƀon sang hăng bơwih brơi jơlan chủ nghĩa xã hội”.

Yua hnun, ƀơi anăp tơlơi kiăng pơplih phrâo bruă mă mơng Ƀirô khua pơ ala mơnuih ƀon sang dêh čar, Kơ-iăng khua pơ ala mơnuih ƀon sang dêh čar ơi Trần Thanh Mẫn kiăng Anom djru bruă khua pơ ala mơnuih ƀon sang 5 mơta tơlơi yôm phun. Amăng anun pơƀut kơsem min hơdôm bruă phrâo, lăi pơthâo, pơphô brơi, tañ ƀuh hơdôm tơlơi pơplih phrâo, rơkâo đĭ tañ hăng Ping gah khul khua pơ ala mơnuih ƀon sang dêh čar, Jơnum min khua apăn bruă pơ ala mơnuih ƀon sang dêh čar amăng bruă ruah mơnuih ngă bruă djŏp, pơdah tơlơi gơgrong bruă mơng ƀing khua pơ ala mơnuih ƀon sang.

Lăi pơthâo, pơphô brơi bruă, rơkâo pơplih phrâo anom bruă, mơnuih mă bruă, pơđĭ tui bruă mă mơng Khul wai lăng djuai ania, hơdôm Jơnum min mơng Ƀirô khua pơ ala mơnuih ƀon sang dêh čar, hơdôm anom bruă gah Jơnum min apăn bruă pơ ala mơnuih ƀon sang, hơdră mă bruă mơng Ƀirô khua pơ ala mơnuih ƀon sang laih anun rơkâo đĭ bruă mă amăng kơčăo bruă ruah khua pơ ala mơnuih ƀon sang dêh čar tal 16, khua pơ ala Jơnum min pơ ala mơnuih ƀon sang djŏp gưl rơwang thun 2026-2031. Kơ-iăng khua git gai pơ ala mơnuih ƀon sang ơi Trần Thanh Mẫn lăi:

“Gơñăm nao bruă ruah mơnuih ngă khua pơ ala mơnuih ƀon sang dêh čar kiăng pơƀuh anăn mơnuih rơgơi mơbruă, hơmâo pran jua klă, djơ̆ tui tơlơi kiăng mơng Ping gah hăng tơlơi phiăn, gum ngă khua pơ ala mơnuih ƀon sang; pơplih phrâo bruă pơhrăm brơi kơjăp bruă kơ ƀing khua pơ ala mơnuih ƀon sang, sit nik, tŭ yua, djru pơđĭ tui anŏ klă hơdôm bruă mă mơng ƀing khua. Pơphô brơi klă hloh hơdôm bruă bơdjơ̆ nao čih pơkra tơlơi phiăn krăp hăng mơng ƀing kư tri laih anun hơnong pơkă pơtŏng lăng ƀing khua pơ ala mơnuih ƀon sang dêh čar; pơhlôm djŏp tơlơi hơmâo kiăng khua pơ ala mơnuih ƀon sang ngă klă bruă kơnuk kơna jao kơ ƀing gơñu. Prăp lui bruă ruah khua pơ ala mơnuih ƀon sang dêh čar tal 16, khua pơ ala Jơnum min pơ ala mơnuih ƀon sang djŏp gưl rơwang thun 2026-2031 tui tơlơi pơmin hơmâo tañ, mơng taih”.

Kơ-iăng khua git gai pơ ala mơnuih ƀon sang dêh čar ơi Trần Thanh Mẫn kiăng, Anom djru bruă khua pơ ala mơnuih ƀon sang lăp đing nao hloh hơdôm tơlơi kiăng ngă mơng Khua git gai pơ ala mơnuih ƀon sang dêh čar ơi Vương Đình Huệ, khŏm hmư̆ hing na nao, sem lăng tong ten tơlơi pơkă mơng Ping gah, Kơnuk kơna kơ bruă djru ruah khua pơ ala mơnuih ƀon sang đah mơng thâo pơphô brơi kơjăp, brơi djơ̆, kiăng hmao tlôn. Rơngiao kơ anun, Grup djru bruă khua pơ ala mơnuih ƀon sang kiăng nao hlâo ngă bruă, hơduah tơña tơlơi pơgôp hiăp mơng anom bruă akŏ pơdong Ping gah, hơdôm Ding jum, anom bruă, ngă hrŏm kơjăp hăng hơdôm anom bruă bơdjơ̆ nao, biă ñu lĕ Khul khua wai lăng djuai ania, hơdôm Jơnum min, hơdôm anom bruă gah Jơnum min apăn bruă pơ ala mơnuih ƀon sang dêh čar, Jơnum min pơ ala mơnuih ƀon sang tơring čar, ƀon prong.