Rơđah biă ñu lĕ tơlơi pơtrun pơsit kơ pơplih hơdră phun pla hlô rông pơtrut kơtang ngă đang hmua hăng bôh thâo phrâo măi mok amăng bruă đang hmua dưi pok pơhai rơđah truh rim plơi pla.

Tân Hòa lĕ să lu mơnuih ngă đang hmua, dưi pơsit jơlan gah pơđĭ kyar bơwih ƀong phun lĕ pla phun kơ phê, tiu, kơ su, ngă đang hmua pơdai kơtor rơtă pơkĕ pla plah phun bôh troh. Truh ră anai, pơsit jơlan gah anai dưi pơplih phrâo hăng hơdôm blah đang ƀlok pla bôh kam, bôh kuit, bôh kruăi dung kơđuh mơtah, bôh pơ-ô̆ tui jơlan gah VietGAP, djop tơhnal pơkă pioh sĭ kơ dêh čar arăng; hrŏm hăng anun pơtrut kơtang mă yua bôh thâo phrâo amăng bruă tơjŭ pla. Hơdôm thun hlâo adih, bôh yua pla phun bôh troh ƀơi să hmâo hơdư̆ hĭ yua kơƀah ia amăng bơyan phang, samơ̆ tơlơi anai dưi pơsir laih. Ơi Ngô Xuân Nam, Kơ-iăng Khua Jơnum min mơnuih ƀôn sang să Tân Hòa, tơring glông Buôn Đôn brơi thâo:

 “Bruă ngă đang hmua dưi hmâo tơlơi lăng ba mơng hơdôm gưl hơdôm hrơi rơgao pơhlôm ia pruih, anun gơnam pơhrui glăi, kual lŏn pla hăng djop mơta phun pla ba glăi lu hloh”.

Ăt tui hăng khua să Tân Hòa mơn, gơnang kơ bruă pơplih hơdră phun pla, yak blung a ba glăi bôh tơhnal klă anun prăk pơhrui glăi hơđong biă ñu lơm sa akô̆ mơnuih mơng să đĭ tui tañ mơn, hmâo 36 klăk prăk thun 2022 yak rơgao kơčăo bruă ba tơbiă 11%, đĭ 13,8% bơhmu hăng thun 2021. Anai ăt lĕ gru than pioh Ping gah, gong gai, mơnuih ƀôn sang să Tân Hòa pơtrut kơtang pơđĭ kyar bơwih ƀong pơ̆ anăp anai.

Hrom hăng să Tân Hòa, hơdôm thun giăm anai bruă bơwih ƀong ƀơi să Ea Wer, tơring glông Buôn Đôn ăt jai hrơi jai pơplih phrâo mơn, Kiăng tơlơi hơdip mơnuih ƀôn sang ƀơi să đĭ kyar, ping gah gong gai să djru laih mơnuih ƀôn sang, biă ñu djru sang anô̆ ƀun rin, ƀun rin ƀơƀiă, sang anô̆ tơnap tap čan prăk mơng sang prăk gah hơdră bruă mơnuih mơnam hăng ngăn rơnoh pơhrua hrŏm mơ̆ng hơdôm jơlan hơdră pơkă mơ̆ng lŏn ia. Amăng anun hmâo ngăn rơnoh mơ̆ng jơlan hơdră hrŏ trun ƀun rin kơjăp pioh tuh pơplai pơplih jơlan gah ngă đang hmua, pơlar djop djuai phun pla hlô rông lăp djơ̆ kiăng hmâo lu prăk hloh, amăng ƀrư̆ tơtlaih mơ̆ng ƀun rin. Amai H’ In Dy Niê, ƀơi să Ea Wer, tơring glông Buôn Đôn brơi thâo:

 “Kâo mơ̆ng hrơi čan prăk sang anô̆ ƀun rin lĕ kâo yua mrô prăk anun amăng bruă pla kơ phê, blơi kơmok pruai, blơi rơmô pioh rông ră anai tơlơi hơdip mơda plai ƀiă laih glêh glar hăng hơđong hloh kơ hlâo”.

Tui hăng ơi Y A Toan Êñuôl, Khua git gai Ping gah tơring glông Buôn Đôn, kiăng pơtrut bruă bơwih ƀong mơnuih mơnam ƀơi să đĭ kyar, pơđĭ tui tơlơi hơdip mơda kơ mơnuih ƀôn sang. Ping gah, gong gai tơring glông dô̆ đing nao iâu pơhrui hơdôm ngăn rơnoh tuh pơplai pioh pơđĭ kyar anom mă bruă, hnoh ia, apui lơtrik, sang hră. Ră anai jơlan nao rai ƀơi tơring glông Buôn Đôn phun ñu klă hăng bruă nao rai, bơwih ƀong huă hăng sĭ mơdrô laih. Tơlơi anai djru pơđĭ kyar hrŏm mơng tơring glông. Thun 2022, rơnoh đĭ kyar bơwih ƀong mơng tơring glông hmâo laih 8%, pơhrui ngăn drăp djơ̆ hăng hloh kơ tơhnal ba tơbiă. Jơlan hơdră pơdŏng plơi pla phrâo dưi đing nao git gai, đơ đam tơring glông hmâo laih 90 tơhnal pơkă, mrô sang anô̆ ƀun rin hrŏ trun dô̆ 34%. Pơ̆ anăp anai, Ping gah, gong gai tơring glông Buôn Đôn ngă tui dong bruă git gai, črâo ba amăng pơdŏng hơdôm hơdră pơđĭ kyar bơwih ƀong lăp djơ̆, mă yua tơhnal gal, pran kơtang hơđăp ƀơi tơring glông pioh pơdŏng kual guai dêh čar kơjăp kơtang. Ơi Y A Toan Êñuôl brơi thâo:

 “Pơsur mơnuih ƀôn sang ngă tui hơdôm hơdră pơtrun jơlan gah mơng ping gah, hơdră bruă tơlơi phiăn mơng kơnuk kơna. Hrom hăng gum hrŏm hơdôm grŭp gơnong bruă ăt kah hăng jơnum min abih bang khul tơpul pioh pơtrut tañ pơđĭ kyar bơwih ƀong mơnuih mơnam hơđong pơgang lŏn ia rơnuk rơnua plơi pla ƀơi tơring glông ăt kah hăng ƀơi kual guai dêh čar mơn”.

Amra lăng ƀuh ngă tui klă bruă git gai mơng Ping gah hăng iâu pơhrui hơdôm ngăn rơnoh tuh pơplai, ngă tui pran kơtang gum hrŏm hơbit, gưl ping gah, gong gai hăng neh wa djop djuai ania ƀiă tơring glông Buôn Đôn glăk gum hrŏm pran jua, sa jua yak rơgao djop tơlơi tơnap, tơlơi lông, pran pơsit pơdŏng kual guai dêh čar tơring čar Dak Lak jai hrơi jai pơdrŏng asah klă hiam./.