Dua boh sang hơmâo pơkra brơi tal anai hơmâo sang anŏ yă Lê Thị Hồng - dŏ ƀơi ƀut pơi 8, tơring kual Krông Năng tơring glông Krông Năng; hăng yă Nguyễn Thị Thảo - dŏ ƀơi Thôn 9, să Ea Kly, tơring glông Krông Pač.

Wơ̆t dua boh sang anai lêng kơ rin soh, dŏ hơjăn păn. Amăng anun, yă Nguyễn Thị Thảo hơmâo rơkơi lĕ tơhan djai pơsăn drơi. Hrŏm hăng bruă djru ba rim boh sang lĕ 60 klăk prăk man pơkra sang dŏ, anom bruă apui lơtrik ăt djru ba bruă pơkra apui lơtrik amăng sang dong kiăng pơhlôm hơmâo apui yua rơnuk rơnua. Amăng hrơi jao glăi sang dŏ, Anom bruă apui lơtrik Dak Lăk hơmâo brơi tivi pioh pĕ lăng amăng sang dŏ phrâo. Hơmâo thâo tơdơi kơ tal anai, Kông ti apui lơtrik Dak Lăk glăk ngă hrŏm hăng hơdôm anom bruă, plơi pla pok pơhai man pơkra brơi 3 boh sang pơkŏn dong či brơi kơ hơdôm boh sang anŏ tơnap tap.