Dưi hmâo tơlơi lăng ba mơng Ping gah, kơnuk kơna mơng hơdôm jơlan hơdră, rơwang bruă, ră anai ƀô̆ mơta puih kơđông ngă hơkrŭ ƀuôn H'Ngô A, să Hòa Phong, tơring glông Krông Bông, tơring čar Dak Lak bă kơ pran hơdip phrâo hăng jơlan nao rai pơkra klă, apui lơtrik truh rim sang, sang hră dưi tuh pơplai pơdŏng klă hiam... Yă H' Ngan Ƀuôn Yă (70 thun, djuai ania Êđê) pơ̆ ƀuôn H'Ngô A brơi thâo, ră anai rơngiao kơ prăk pơhrui glăi mơng tơjŭ pla, rông hlô, ñu pơ̆ anai dô̆ gum hrom pơgang dlai anun hmâo dong prăk pơhrui glăi. Ñu pơhmu kơ tơlơi pơplih ƀơi plơi pla hơkrŭ Krông Bông.

 “Tơlơi hơdip ră anai hmâo pơplih lu laih. Đưm hlâo tơnap tap biă, ƀing gơmơi hơdip amăng dlai ƀong hơbơi pơtơi dlai, wok rơbung pioh ƀong. Tơnap tap biă. Bơ̆ ră anai ƀing gơmơi trơi pơđao, hmâo asơi huă, ao buh. Kơnuk kơna đing nao hlâo, lăng ba neh wa mơng braih huă, hra, măn… dưi djru brơi rim thun. Kơnuk kơna gum hrom na nao hăng neh wa yak rơgao djop tơlơi tơnap”.

Amăng jơlan tuh ƀêtông phrâo man pơkra mơng jơlan hơdră tui hơnong pơkă dêh čar man pơdong plơi pla phrâo laih rơgao, ơi Hlưk, thun tơkeng 1957, plơi Dơk Rơng, să G’Lar, tơring glông Đăk Đoa, tơring čar Gia Lai brơi thâo, hlâo kơ thun 1975, tơlơi hơdip kơ neh met wa ƀơi să G’lar rin rơpa biă mă hăng ƀu hơmâo tơlơi rơngai, yua kơ hơmâo tơlơi guang dar, wai lăng mơng ayăt. Tơdơi kơ lŏn ia pơklaih rơngai, neh met wa djuai ania Bahnar hơdip rơnuk rơnua, ngă pô amăng tơlơi hơdip mơda. Hrŏm hăng tơlơi gum djru, pơtô pơblang hăng čar ba mơng gong gai, khul grup, neh met wa thâo pla kơphê, ngă hmua pơdai ia. Mơng rin rơpa, kơ ƀah asơi huă añăm ƀong, ră anai, lu sang anŏ hrưn đĭ pơdrông asah man pơdong sang prong rơhaih. Ơi Hlưk brơi thâo:

‘’Amăng rơnuk blah wa tơlơi hơdip kơ neh met wa tơnap tap biă mă, Mơng bruă nao pơ đang hmua, tơdah kiăng nao tañ hăng glăi kaih ăt ƀu dưi lơi, yua kơ hơmâo arăng pơgăn, mă pơkŏng. Bơ ră anai lŏn ia ta rơngai laih, tơlơi hơdip rơnuk rơnua yua anun bruă bowih ƀong ta gơgrong mă pô, ngă hơget tui hluai pô yơh. Kơ jơlan glông hlâo anun lĕ jơlan lŏn soh, ƀu hơmâo tuh kơsu kar hăng anai ôh, ră anai hơmâo jơlan tuh kơsu hiam hruaih, jơlan amăng plơi pla hơmâo tuh ƀêtông bruă găn nao rai gêh gal yơh. Kâo bơni biă mă Kơnuk kơna hơmâo đing nao tuh pơ alin’’. 

Rơgao rơbêh kơ 35 thun pơdŏng hăng pơđĭ kyar, 10 thun ngă tui Jơlan hơdră pơkă mơng Lŏn ia pơdŏng plơi pla phrâo, tơring glông Lâm Hà – kual bơwih ƀong phrâo mơng mơnuih Hà Nội ƀơi lŏn Lâm Đồng ră anai hmâo laih ia yua pơđĭ kyar kah hăng abih bang amăng hơdôm bruă. Hăng tơring glông tal 5 mơng tơring čar Lâm Đồng dưi hmâo Khua dêh čar tŭ yap lĕ tơring glông djơ̆ hăng plơi pla phrâo rơwang 2016-2020; hăng ư-ang dưi hmâo Khua mir sir ƀơk pri bơni Miđai mă bruă dăp tal 3. Ƀơi anăp tơlơi pơplih mơng plơi pla pô, tha plơi Krăjan K’ Nhang, pơ̆ ƀôn Đam Pao, să Đạ Đờn, tơring glông Lâm Hà brơi thâo:

 “Gơnang kơ tơlơi pơsur, pơtă pơtăn mơng tha plơi, khua ƀôn, ăt kah hăng mơnuih apăn bruă kơnuk kơna, neh wa ƀing gơmơi ngă tui na nao bruă djă pioh gru grua bôh thâo mơng djuai ania, gum hrom hrưn đĭ bơwih ƀong huă pơđĭ kyar kiăng hmâo asơi huă trơi pơđao. Pơ̆ anăp anai, neh wa ƀing gơmơi ngă tui dong pran jua gum hrom hơbit djuai ania, pơčrông sai hrom bơwih ƀong huă, rông ană bă hrăm hră tâ̆o klă hăng gum hrom pơdŏng plơi pla pô jai hrơi jai đĭ kyar hloh dong”.