Ară jơlan anai dưi pơpha 3 anung prăk tuh pơ alin čuk pơkra; amăng anun tơring čar Khánh Hòa tuh pơ alin čuk 32 km, rơnoh prăk 5.632 klai, jing anung prăk mrô 1; Ding jum jơlan glông hăng pơdŭ pơgiăng ngă pô tuh pơ alin lĕ, 37,5 km, rơnoh prăk 9.818 klai anung prăk mrô 2; dŏ glăi tơring čar Dak Lak pô tuh pơ alin anung prăk mrô 3. Kơčăo bruă anai pơphun mă bruă lơ̆m plah wah blan 6/2023, samơ̆ truh ră anai aka ƀu hơmâo anih čuk jơlan ƀudah či ngă bruă ôh, bruă pơklaih ala lŏn, duh glăi djơ̆ lŏn atông sang, đang hmua mơnuih ƀôn sang bưp lu tơlơi tơnap tap, gun hĭ kiăng pơsir.

Črăn jơlan prong rơdêh đuăi hmar Khánh Hòa-Ƀuôn Ma Thuôt găn nao pơ tơring glông Mdrak glông ataih 17 km, yua Jơnum min mơnuih ƀôn sang tơring čar Khánh Hòa tuh pơ alin. Đơ đam lŏn čuk djơ̆ anih duh glăi kơ mơnuih ƀôn sang abih črăn anun lĕ rơbêh 127,1 ha mơ̆ng 143 boh sang anŏ mơnuih ƀôn sang. Amăng anun, lŏn khom čuk abih djru duh glăi lŏn laih pla kyâo keo, ta juăt kyâo mi, lŏn 3 mơta djuai glai hăng lŏn ngă hmua. Ơi Nguyễn Đức Thảo-Kơ-iăng Khua Jơnum min mơnuih ƀôn sang tơring glông Mdrak lăi pơthâo, truh ră anai, bruă duh glăi pơklaih ala lŏn kiah ngă giong amăng bruă pơkă lăng rek ling, dăp akŏ bruă pơ anăn bruă yua lŏn, pơčrâo anăp djơ̆ jơlan, abih bang gơnam pơkra jơlan, anih dưm djah, pơđoh đuăi ia djah, ngă giong bruă pơkă hăng čih pơkra mrô amăng hră ling lơkak, pơsit tong, bruă sem lăng jŭ yap dram gơnam phun kyâo, boh troh, phun pla hăng pok pơhai lăi pơthâo duh glăi lŏn kơ mơnuih ƀôn sang, anom bruă djơ̆ hĭ anih čuk jơlan. Ră anai, tơring glông aka ƀu jao glăi đơ đam lŏn mă glăi pioh kơ anom bruă čuk jơlan ngă bruă ôh. Ơi Nguyễn Đức Thảo lăi nao kơ bruă pơklaih ala lŏn mơ̆ng kơčăo bruă anai:

“Akŏ bruă pơdah thâo brơi ngă lĕ truh lơ 30/6 khom jao glăi abih 70% đơ đam lŏn pơklaih ala pioh čuk jơlan, samơ̆ truh mông anai bruă pok pơhai jao glăi anih čuk jơlan aka ngă djơ̆ tơhnal pơkă ôh. Ră anai, tơring glông hlăk pơtum pơkra hơdră, pok pơhai bruă mă lăi pơthâo kơ hơdôm sang bruă, djop pô hơmâo lŏn hmua bơbeč djơ̆ kiăng lăi pơthâo duh prăk djru kơ bruă pơklaih ala lŏn jao glăi čuk jơlan”.

Ơi Trương Thanh Tâm-Kơ-iăng khua anom bruă pơđĭ kyar lŏn mơnai tơring glông Mdrak brơi thâo, phun ñu yua kaih bruă anai lĕ duh glăi lŏn, pơklaih ala lŏn pioh jao glăi kơ bruă čuk pơkra gun tui hăng Hră pơtrun mrô 10/2023 mơ̆ng Jơnum min mơnuih ƀôn sang tơring čar Dak Lak. Hră pơtrun anai čih pơtrun rơđah, phun kyâo glai pla sa anih pơtum amăng lŏn hmua yua mơnuih ƀôn sang ngă pô khom mă glăi pioh juă nua. Bruă ngă hră pơtrun pơkă nua lŏn duh glăi kiah ngă tui lơ 30/6, aka ƀu hơmâo hră pơčrâo brơi tong ten ôh, kiăng pơtong sit phun ñu mơ̆ng pơpă hơmâo lŏn hmua, kơsing mă lŏn glai sui thun mơ̆ng ană plơi, anom bruă....Kiăng pơtrut tañ bruă duh glăi lŏn, pơklaih ala lŏn pioh jao glăi čuk jơlan, tui hăng ơi Tâm lăi lĕ, Jơnum min mơnuih ƀôn sang tơring čar Dak Lak kiăng tañ čih pơkra glăi tơlơi pơtrun ngă hiư̆m pă djơ̆ găl hloh. Ơi Tâm brơi thâo:

“Tơring glông hơmâo rơkâo tơring čar čih pơkra glăi Hră pơtrun mrô 10 tui hăng hơdră mă glăi lŏn duh brơi kyâo pơtâo, dram gơnam mơnuih ƀôn sang ƀơi lŏn đang anun pioh pơkă nua. Rơnoh prăk duh glăi jŭ yap rơnoh tuh pơ alin pla kyâo, bruă mă, hrơi bruă, ƀu jŭ yap rơnoh prăk či pơhrui glăi ôh. Pơtô brơi rơđah, hơdră ngă, pơtong glăi hrơi blan phun ñu hơmâo gơnam lŏn đang anun pioh ngă kơnôl duh glăi kơ mơnuih ƀôn sang pô lŏn, hnun kah dưi pơklaih ala lŏn jao glăi čuk pơkra jơlan”.

Ƀơi tơring glông Ea Kar, kơčăo bruă čuk pơkra jơlan rơdêh đuăi hmar Khánh Hòa-Ƀuôn Ma Thuôt găn nao abih bang anŏ glông ataih ñu lĕ rơbêh 13,5 km. Ară jơlan anai gah kơčăo bruă anung mrô 2 hăng mrô 3. Đơ đam lŏn khom pơklaih ala hăng duh glăi lĕ 104,4 ha. Truh ră anai, brua mă jŭ yap dưi ngă djop 100% akŏ bruă, pơsit hăng mă glăi 13 hơdră duh prăk hăng 69,2 ha, hơmâo jao glăi 50,2 ha dưi ngă giong 48%, pơkă hăng akŏ bruă samơ̆ ăt yap kaih mơ̆n. Ơi Chu Vĩnh Cường-Khua gơnong bruă pơđĭ kyar lŏn mơnai tơring glông Ea Kar rơkâo:

“Mơta sa hăng bruă mă duh glăi lŏn pơklaih ala jao bruă čuk jơlan gơmơi rơkâo Jơnum min mơnuih ƀôn sang tơring čar tañ pơsit rơnoh lŏn phrâo mơ̆ng khul pơsit nua hơdôm anih duh glăi. Dua lĕ rơkâo tơring čar sem lăng brơi mơnuih ƀôn sang jŭ yap phun kyâo pla tơdơi kơ duh glăi djru kơ bruă jao glăi čuk jơlan. Jak iâu mơnuih ƀôn sang tơdơi kơ tŭ mă prăk duh glăi khom jao glăi tañ, pioh arăng jao glăi kơ pô tuh pơ alin čuk pơkra jơlan”.

Hơdôm tơlơi tơnap tap dŏ gun lêng kơ hơmâo sa tơlơi djơ̆ hrŏm lĕ Hră pơtrun mrô 10/2023 mơ̆ng Jơnum min mơnuih ƀôn sang tơring čar Dak Lak, bruă jao glăi rơnoh prăk duh lŏn, pơklaih ala kaih. Aka ƀu hơmâo tơlơi pơtô brơi tong ten rơđah rơđong ôh, hrơi blan, phun tơdŭ mă yua lŏn, djru phun kyâo boh troh pô lŏn hơmâo pla....Bruă pơblih glăi hră pơtrun, pơsir tơlơi dŏ gun kiăng ngă tañ, pioh kơ bruă pơklaih ala lŏn jao glăi kơ khul ngă bruă čuk jơlan djơ̆ anŏ pơkă.