Truh kih mơng Grŭp pơdŏng ƀuôn Tuôr B pơdah brơi hơdôm hơdră ngă phrâo amăng pơtô bruă mă, pơsir bruă mă ƀơi hơdôm bôh plơi pla, kual neh djuai ania ƀiă ƀơi tơring čar Daklak.

Lăng sang glăk pơkra giăm giong, yă H’ Vin Byă (anăn juăt iâu lĕ Amĭ Ƀŏ), ƀơi să Dray Sáp, tơring glông Krông Ana, tơring čar Daklak, brơi thâo, sang pơdŏng abih rơbêh kơ 700 klăk prăk. Mrô prăk lĕ tơlơi pơkrem pioh lu thun mơng rơkơi bơnai anun gơñu kơđiăng biă amăng bruă ruah mă gru sang, gơnam pioh pơdŏng sang. Bruă pơdŏng sang dưi hmâo sang anô̆ đăi gơnang jao kơ Grŭp man pơdŏng ƀuôn Tuôr B, leng kơ hơdôm mơnuih juăt amăng plơi. Amĭ Bŏ lăi:

 “Blung hlâo, kâo bơni kơ mơnuih apăn bruă ƀơi tơring glông hmâo pơtô bruă kơ ană tơčô kâo. Ană tơčô kâo hmâo rai laih pơ̆ anai pơdŏng sang kâo. Kâo mơ-ak biă yua kơ ană tơčô amăng ƀuôn hmâo pơdŏng brơi gơmơi sa bôh sang hiam biă”.

Ayong Y Kun Kƀuôr, Khua Grŭp man pơdŏng sang ƀuôn Tuôr B, să Dray Sáp brơi thâo, pơdŏng mơng thun 2020, ră anai grŭp hmâo 12 čô mơnuih, leng kơ hơdôm mơnuih hmâo pơhrăm bruă man pơdŏng sang. Hơdôm hrơi rơgao, ƀing gơñu hmâo pơdŏng laih 7 bôh sang phrâo hăng lu ring bruă anet kơ neh wa amăng ƀuôn. Ră anai pơhrui glăi hơnong ñu mơng pô apăn akô̆ mơng 9 truh 10 klăk prăk sa blan hăng pô djru bruă năng ai ñu mơng 6-7 klăk prăk sa blan. Hrom hăng bruă pơjing brơi bruă mă pơhrui glăi prăk kơ grŭp, rim thun grŭp amra mă yua ƀơƀiă kơmlai kiăng blơi dong măi mok pioh kơ bruă man pơdŏng. Ayong Y Kun Kƀuôr lăi:

 “Adơi ayong hyu mă bruă lu laih, ră anai hrăm bruă man pơdŏng adơi ayong gir nao man pơdŏng, pơ ala kơ hyu ataih ta pơdŏng grŭp kiăng ngă brơi plơi pla pô pioh bơwih ƀong pô pơđĭ kyar. Mă rah bruă ƀơi sang laih anun ĕp hmâo hmăi prăk kơ sang anô̆ pô”.

Ayong Y Riêng Niê, mơnuih amăng Grŭp man pơdŏng sang ƀuôr Tuôr B brơi thâo, ñu hmâo prăk pơhrui glăi 300 rơbâo prăk sa hrơi:

 “Mă bruă anai amuñ mă, laih anun hmâo prăk pơhrui glăi, ƀuh sang pơdŏng yua kơ grŭp man pơdŏng dưi hmâo neh wa đăo gơnang ƀuh mơ-ak, ư-ang biă”.

Grŭp man pơdŏng ƀuôn Tuôr B lĕ hơdră phrâo biă hăng neh wa djuai ania Êđê, dưi pơdŏng tơdơi kơ hơdôm anih pơtô pơhrăm bruă kơ mơnuih mă bruă plơi pla. Tui hăng ơi Y Phen Niê, Khua Khul mơnuih ngă đang hmua să DRay Sáp, gong gai să hmâo djru sa dua mơta gơnam tam, măi mok, lăi pơthâo ring bruă... djru neh wa pơđĭ kyar bruă man pơdŏng, pok jơlan gah hrŏ trun ƀun rin klă kơjăp.

 “Pơtŏng sit hơdră anai hmâo hrŏ trun laih ƀun rin kơjăp hloh ƀơi plơi pla ƀing gơmơi. Hlâo adih khom jak iâu hơdôm mơnuih dăp hơdră man pơdŏng mơng anih anom pơkon lĕ, ră anai ƀing gơmơi hmâo Grŭp mă bruă hrom anai. Ƀing gơmơi hmâo pơlir laih ăt kah hăng tô nao rai abih bang sang anô̆ mơnuih ƀôn sang amăng plơi pla ƀu kiăng hyu jak iâu arăng mơng anih pơkon dong tah mơ̆, mơnuih ƀôn sang mơng plơi pla pô pơdŏng hăng man pơkra brơi kơ să”.

Rơngiao kơ Grŭp man pơdŏng ƀuôr Tuôr B, să Dray Sáp, ƀơi sa dua bôh să pơkon amăng tơring glông Krông Ana, mơnuih ƀôn sang djuai ania ƀiă ăt hmâo hrăm laih bruă man pơkra sang hăng ngă tui ba glăi bôh tơhnal. Bơhmutu ñu kah hăng ơi Y Sao Mlô, ƀơi ƀuôn Tơ Lơ, să Ea Ana mơng sa čô mơnuih kơnong kơ man pơkra đôč, ñu tui hrăm bruă hăng jing pô man pơkra phun. Ñu lăi pơthâo: Amăng anun ñu kơnong kiăo tui hơdôm grŭp man pơkra, mă hơdôm bruă mă ƀơi plơi pla, ñu hmâo pơsit rơkâo nao hrăm. Gir hrăm tui hăng nao hrăm tum djop rim hrơi, tơdơi kơ hrăm giong, ñu dưi jing pô apăn bruă man pơkra, hăng prăk pơhrui glăi mơng 300.000 – 350.000 thun sa hrơi.

Bơ̆ ơi Y Xiếp Byă, ƀơi ƀuôn Kruê̆, să Ea Bông, khă jing laih pô apăn bruă, samơ̆ yua kơ hmâo tơlơi kiăng kơjăp bruă anun hmâo rơkâo nao hrăm bruă man pơdŏng. Hluai tui anih hrăm, ƀu djơ̆ kơnong kơ thâo jŭ yap hmâo akô̆ tlôn dăp hơdră hăng gơnam man pơdŏng kơ ring bruă ôh mơ̆, ñu dô̆ tŭ mă bôh thâo pơhlôm hơdjă agaih lom mă bruă.

Tui hăng Anom bruă pơtô pơhrăm abih anih 12 – Pơtô bruă mă tơring glông Krông Ana, tơring čar Daklak, hơnong ñu rim thun kiăng hrăm bruă mơng mơnuih mă bruă ƀơi anai năng ai  ñu 400 čô mơnuih. Amăng anun, đing nao hơdôm grŭp man pơdong kah hăng: Pơdŏng anih anom mă yua; pla hăng mă yua bơmao; tơčôh mơñam. Rơgao kơ pơtô bruă hmâo djru laih mơnuih amăng khul grŭp thâo kơjăp phiăn phun hloh mơng rim gơnong bruă mơ̆ gơñu hmâo rơkâo anun ba glăi bôh tơhnal bruă dưi pơđĭ tui kơjăp hloh, hmâo bruă mă hơđong hăng prăk pơhrui glăi đĭ lu lăp yap ba.

Dong mơng truh kih mơng Grŭp man pơdŏng sang ƀuôn Tuôr B pơdah brơi jơlan gah phrâo, hơdră ngă phrâo amăng bruă pơtô bruă mă, pơsir bruă mă ƀơi hơdôm kual plơi pla, kual djuai ania ƀiă ƀơi tơring čar Daklak pơ̆ anăp anai; anun lĕ pơkĕ hăng hơdôm bruă mă sit nik, hơdôm bruă mă kiăng hloh amăng tơlơi hơdip mơng mơnuih ƀôn sang./.