Tơlơi phiăn lŏn mơnai thun 2013 hơmâo lu črăn pơplih phrâo kiăng ngă gêh gal pơtrut hăng djru ngă gêh gal brơi bruă yua lŏn mơnai dưi pơđĭ kyar anun lĕ: Pơgiong hơdră bruă brơi mă yua gưl gap ƀrô kơplah wah Kơnuk kơna hăng djop bơnạ bơdjơ̆ nao hluai tui tơlơi pơkă amăng akŏ bruă mă yua lŏn mơnai; tơlơi pơkă kơ bruă jao lŏn, brơi yua apah kiăng ruah hơdôm anom bruă tuh pơ alin, bruă jao lŏn mơnai tui tơlơi bơkơtưn; tơlơi pơkă tong ten nua lŏn mơnai lơ̆m Kơnuk kơna jao lŏn ăt hơmâo duh prăk mă yua lŏn, yua lŏn apah, brơi pơplih amăng lŏn glăk yua. Bruă ngă hră pơsit tơlơi dưi mă yua lŏn mơnai hơmâo pơtrut kơtang ngă gêh gal kiăng amuñ amăng bruă sĭ mơdrô lŏn mơnai.

Samơ̆, sa amăng hơdôm tơlơi ba truh anun lĕ đĭ nua kơtang đơ lĕ yua tơlơi pơhing mơng hơdôm akŏ bruă, ring bruă man pơdong plơi prong lăi phara hăng bruă sĭ mơdrô lŏn mơnai lăi hrŏm aka ƀu tong ten, tơpă sit. Kơ bruă anai, mơnuih rơgơi kơhnâo bơwih ƀong huă, nai prin tha Nguyễn Trí Hiếu brơi thâo:

“Kiăng pơđĭ kyar lăp djơ̆ hăng rơnoh sĭ mơdrô lŏn mơnai hrŏm, nua lŏn mơnai kiăng pơkă tui tơlơi kiăng. Kiăng bơkơtưn blơi lŏn tơpă sit, tong ten. Anai lĕ sa amăng hơdôm bruă akŏ phun yua amăng thun blan laih rơgao, bruă sĭ mơdrô lŏn mơnai ƀu pơhlôm lăp djơ̆. Tal sa lĕ hơmâo tơlơi tek rơwek nao mơng gong gai ƀon lan hăng dua dong lĕ tơlơi dưi mơng lu mơnuih amăng anun”.

Sit biă ñu, bruă ngă đang hmua amăng dêh čar ta ăt tui hơbô̆ bruă bơwih ƀong anet raih daih tui rĭm boh sang anŏ; bruă pơlir kơplah wah ngă hmua, pơkra pơjing, blơi pơhrui gơnam dŏ lu tơlơi gun găn; bruă mut hrŏm hăng tuh pơ alin mơng anom bơwih ƀong sĭ mơdrô amăng ngă hmua, ƀon lan dŏ aset. Tơlơi rơkâo ba tơbiă ră anai hăng bruă čih pơkra tơlơi phiăn lŏn mơnai lĕ kiăng hơmâo tơlơi pơkă tong ten kiăng pơsur hăng ngă gêh gal pơgom glăi lŏn ngă đang hmua; pơđĭ kyar kơtang bruă mă yua lŏn mơnai. Bruă čih pơkra tơlơi phiăn tal anai kiăng ngă rơđah bruă kah pha gưl, tơlơi dưi, tơlơi glăm ba mơng anom bruă wai lăng kơnuk kơna mơng gơnong glông truh pơ ƀon lan amăng bruă dưm dăp man pơdong, brơi pơplih mă yua lŏn mơni, pơhrui glăi lŏn, jao lŏn, brơi yua apah, ngă brơi hră pơ-ar pơsit dưi mă yua lŏn mơnai, pơkă tong ten nua lŏn mơnai brơi gap ƀrô. Kơ-iăng nai tha pri, nai prin tha Đinh Trọng Thịnh, nai pơtô ƀơi Sang hră wai lăng prăk kak lăi rơđah:

“Pơsur bruă pơkă nua tui hăng bruă sĭ mơdrô kiăng ba glăi sa hơnong pơkă lĕ pơhlôm bruă sĭ mơdrô lŏn mơnai tong ten. Pơhlôm đing nao bruă mă yua lŏn mơnai kiăng tuh pơ alin pơđĭ kyar, djơ̆ hăng tơlơi rơkâo pơđĭ kyar bơwih ƀong huă amăng djop rơwang. Sui pơ anăp, kiăng pơsur bruă pơplih mă yua lŏn mơnai kiăng pơjing kual lŏn tum pơƀut kiăng ngă tui bruă tuh tia pơkra pơjing kah hăng amăng pơđĭ kyar ngă hmua”.

Tui tơlơi pơgôp hiăp mơng ƀing rơgơi kơhnâo, tơlơi phiăn lŏn mơnai (čih pơkra glăi) tal anai pơsir hĭ hơdôm tơlơi dŏ gun găn, aka ƀu klă amăng pơđĭ kyar bruă sĭ mơdrô, pơplih mă yua lŏn mơnai anun lĕ: dŏ lu mơnuih sĭ mơdrô samơ̆ aka ƀu ngă hră pơ-ar, nua sĭ mơdrô aka ƀu pơdah djơ̆ hăng tơlơi sit nik, dŏ lu mơnuih sĭ dŏp, sua mă lŏn mơnai, kaih mă yua lŏn mơnai. Sa, dua bruă akŏ phun hơmâo ba tơbiă lĕ kiăng pơkă tơlơi gơgrong mơng anom bruă pôr pơhing kơ bruă dưm dăp man pơdong, pơphun pok pơhai hơdôm akŏ bruă pơđĭ kyar anih anom, hơdôm akŏ bruă man pơdong sang, sit biă ñu hơdôm akŏ bruă pơprong, akŏ phun amăng ƀon lan kiăng pơdah tơpă sit tơlơi pơhing, pơgăn hĭ bruă pơđĭ mă nua kiăng ba glăi tơlơi dưi ƀing gơñu pô. Ơi Trần Văn Lê, Khua kông ti TNHH bơwih ƀong hăng sĭ mơdrô Phương Linh brơi thâo:

“Bruă ră anai bơdjơ̆ nao lŏn man pơdong sang. Lŏn sang amra ba glăi pơhrui lu hloh amăng ngăn drăp, smaơ̆ kiăng hơmâo lu lŏn man pơdong sang lĕ tơnap tap biă mă. Tơdah Kơnuk kơna pơsit anai lĕ rơnoh prăk pơhrui ba glăi tơlơi dưi, lăng anai lĕ kông ngăn pioh pơkrem. Tui tơlơi gơgrong mơng sa boh anom bơwih ƀong sĭ mơdrô, mut hrŏm amăng bruă sĭ mơdrô lŏn mơnai ƀơi hơdôm anih, kâo pơmĭn kiăng sem lăng mơng djop mơta, samơ̆ hơnong pơkă anăp nao kual lŏn anun amra ba glăi pơhrui amăng prăn jia hăng ba glăi tơlơi dưi kơ 3 bơnah anun lĕ pô sang, mơnuih mă yua hăng kơnuk kơna, kiăng ngă bơkơnar kiăng ba glăi tơlơi dưi brơi kơ djop bơnah”.

Sa bruă pơkŏn dong lĕ kiăng pơplih hơdră bruă pơplih mă yua lŏn mơnai, lŏn ngă hmua, hơdôm blah lŏn ƀơi plơi prong kiăng lu dong pơhrui amăng ngăn drăp kơnuk kơna, laih dong đing nao ƀing mơnuih arăng mă pơhrui glăi lŏn dŏ hơmâo jao lŏn laih ƀudah blơi sang ƀơi kual lŏn mă pơhrui. Pơgiong hơdră bruă pơjing kual lŏn, hluai tui hơbô̆ bruă pơjing kual lŏn mơnai, jak iâu tuh pơ alin man pơdong hơdôm kual dŏ hơdip kiăng man pơdong plơi pla phrâo brơi mơnuih arăng mă glăi lŏn hlâo kơ hrơi mă glăi kiăng pơhlôm hơđong tơlơi hơdip mơda kơ mơnuih ƀon sang./.