Ngă tui jơlan hơdră pơkă mơng lŏn ia pơđĭ kyar bơwih ƀong mơnuih mơnam kual neh wa djuai ania ƀiă hăng kual čư̆ siăng rơwang mơng thun 2021-2025, hơdôm hrơi rơgao, hrŏm hăng pơhrua hrŏm hơdôm hơdră bruă Kơnuk kơna, mơ̆ng tơring čar pioh pơđĭ kyar bơwih ƀong – mơnuih mơnam, Yên Bái dô̆ mă yua lu tơlơi pơtrun pơsit, hơdră bruă, ăt kah hăng lăi pơhing, pơsur djru neh wa djuai ania ƀiă pơđĭ tui tơlơi pơmin, pơplih bruă mă, ngă tui klă hơdôm hơdră pơtrun, hơdră bruă tơlơi phiăn mơ̆ng Ping gah hăng kơnuk kơna, mơ̆ng anun tơlơi hơdip mơda mơ̆ng neh wa djuai ania ƀiă ƀơi kual asuek, ataih hmâo laih lu tơlơi pơplih phrâo.

Giang Pằng lĕ plơi tơnap tap, ataih mơ̆ng kual krah să Sùng Đô, tơring glông Văn Chấn năng ai ñu 30 km. Dŏng ƀơi čư̆ dlông, ƀu hmâo apui lơtrik mă yua, ƀu hmâo glông pôr telephone, jơlan nao rai tơnap tap, anun mơnuih ƀôn sang ƀơi anai ƀiă thâo tơlơi pơhing mơ̆ng gah rơngiao, biă ñu hơdôm tơlơi pơhing bơdjơ̆ nao hơdră bruă hăng tơlơi phiăn. Yua anun, mơnuih apăn bruă să khom na nao rô hyu tơl plơi pla, sang anô̆ mơnuih ƀôn sang lăi pơhing hơdôm hơdră pơtrun, hơdră bruă mơ̆ng Ping gah, tơlơi phiăn mơ̆ng Kơnuk kơna, hrŏm hăng anun hơduah ĕp hơdôm tơlơi kiăng sit mơ̆ng neh wa, hmao tlôn rơkâo đĭ, ba tơbiă hăng gưl dlông pioh hmâo hơdôm hơdră bruă djơ̆, djru neh wa pơplih tơlơi hơdip mơda.

Truh rơnuč thun 2022 phrâo rơgao, hluai tui hơdră bruă mơ̆ng Jơlan hơdră pơkă pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng, neh wa ƀơi plơi Giàng Pằng dưi gum djru laih ia yua, măi mă yua kơ bruă đang hmua. Ayong Giàng A Trư, mơnuih ƀôn sang ƀơi plơi Giàng Pằng, să Sùng Đô mơ-ak ruai glăi:

 “Ră anai téc ia djop yua kơ sang anô̆ laih, ƀu kơƀah ia kah hăng hlâo adih dong tah. Hlâo adih akă hmâo téc ia dưm ia lĕ juăt kơƀah ia biă amăng bơyan pơ-iă anai, ia yua kơ sang anô̆ leng kơ mă mơ̆ng čroh hnoh".

Ơi Giàng A Lứ, Kơ-iăng Khua Jơnum min mơnuih ƀôn sang să Sùng Đô, tơring glông Văn Chấn brơi thâo dong:

 “Hơdôm jơlan hơdră pơkă mơng lŏn ia ba glăi bôh tơhnal biă, rơngiao kơ téc ia dô̆ djru măi mă yua kơ bruă đang hmua, đing nao hơdôm bôh sang anô̆ ƀun rin tơnap tap, lom ngă đang hmua amra gêh gal hloh”.

Lăi pơhing, pơsur neh wa djuai ania ƀiă kual čư̆ siăng hơdư̆ tơlơi pơdô̆ rơkơi bơnai mơ̆ng muai hăng pơdô̆ rơkơi bơnai giăm drah kơtăk lĕ sa amăng hơdôm bôh yôm dưi hmâo gong gai hơdôm plơi pla ƀơi kual čư̆ siăng Yên Bái đing nao. Yă Sùng Thị Xía, Kơ-iăng Khua Jơnum min mơnuih ƀôn sang să Suối Bu, tơring glông Văn Chấn, tơring čar Yên Bái brơi thâo, anai lĕ bruă mă ƀu amuñ ôh yua kơ tơlơi pơmin mơ̆ng mơnuih ƀôn sang kơ tơlơi phiăn dô̆ akă tum djop:

 “Tơdah kơnong kơ lăi pơhing hăng pa nô, áp phích yôl gah rơngiao đôč ăt tơnap mơn, yua anun lom prăp lui jơlan hơdră lăi pơhing, ƀing gơmơi khom hmâo hơdôm gong jơlan rơđah pioh lăi pơhing. Lom lăi pơhing tơdah mă yua tơlơi Yuan thơ mơnuih ƀôn sang ta ăt ƀu thâo hluh mơn anun amra lăi pơhing hăng tơlơi djuai ania ƀiă”.

Amai Lầu Thị Mỷ, ƀơi plơi Bu Cao, să Suối Bu brơi thâo, adơi ñu thun anai phrâo hmâo 14 thun đôč. Tơlơi hơdip mơda sang anô̆ tơnap tap, ama rơngiă mơ̆ng muai, amĭ lĕ duam ruă na nao, ăt kah hăng lu ƀing dra muai djuai ania Mông pơkon, ñu ăt hmâo tơlơi pơmin dô̆ rơkơi tañ mơn. Thâo kơ tơlơi hơdip sang anô̆ pô, ƀing hyu lăi pơhing, lăi pơthâo mơ̆ng să Suối Bu hmao ƀuh ƀô̆ laih pioh pơblang, lăi pơthâo brơi:

"Tơdơi kơ hmư̆ mơnuih apăn bruă nao tơl sang lăi pơthâo kơ anô̆ bơdjơ̆ nao tơlơi pơdô̆ rơkơi bơnai mơng muai, đa lĕ bơtơhmal hăng prăk, sang anô̆ kâo ăt pơsur mơn adơi đah kơmơi kâo pơwot glăi sang hră hrăm, pơkôl ƀu pioh adơi kâo dô̆ rơkơi tañ đơi ƀiă hloh kơ 18 thun”.

Ngă tui Jơlan hơdră pơkă mơ̆ng lŏn ia pơđĭ kyar bơwih ƀong, mơnuih mơnam kual neh wa djuai ania ƀiă hăng kual čư̆ siăng rơwang mơng thun 2021-2025, tơring čar Yên Bái ră anai hmâo 10 rơwang bruă, 14 rơwang bruă anet hăng 36 bôh yôm glăk pok pơhai hăng abih bang prăk mă yua giăm truh 1.200 klai prăk. Rơngiao kơ tuh pơplai hơdôm rơtuh klăk prăk ring bruă man pơdŏng, hơdôm rơwang bruă hmâo djru măi mok mă yua, anah phun pla hlô rông, pơtô bruă mă, pơsir bruă mă, djru pơtrut kơtang pơđĭ kyar bơwih ƀong, hrŏ trun ƀun rin tañ, kơjăp kơ kual neh wa djuai ania ƀiă. Amai Mùa Thị Máy ƀơi plơi Háng Sung, să Mồ Dề, tơring glông Mù Cang Chải brơi thâo: Hơdôm rơwang bruă glăk ngă tui ƀu djơ̆ kơnong kơ ba truh hơdôm tơlơi pơplih amăng hơdră ngă, pơđĭ kyar bơwih ƀong sang anô̆ ôh mơ̆ dô̆ pơplih tơlơi pơmin, bruă mă mơng neh wa kual čư̆ siăng dong:

 “Neh wa mơnuih ƀôn sang, biă ñu ƀing adơi amai amăng plơi rông hlô pơjing jơlan pơhrui prăk kak kơ sang anô̆, djru hrŏ trun rin rơpa”.

Ơi Đỗ Quang Vịnh, Kơ-iăng Khua Jơnum min djuai ania tơring čar Yên Bái brơi thâo: Hơdôm hrơi rơgao, Jơnum min ăt hmâo gum hrŏm mơn hơdôm bôh tơring glông, plơi prong amăng tơring čar pơphun hơdôm anih pơhrăm “Pơđĭ tui bôh thâo kơ plơi pla hăng mơnuih apăn bruă pok pơhai jơlan hơdră ƀơi hơdôm gưl gah Jơlan hơdră pơkă mơng lŏn ia pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng” brơi khua git gai ping gah, ƀing khua plơi, hơdôm grŭp ping gah hăng plơi pla mơnuih ƀôn sang dô̆, kiăng mơnuih apăn bruă hăng mơnuih ƀôn sang thâo hluh, ngă tui, tŭ mă djơ̆ hơdră bruă:

 “Jơnum min gum hrŏm hăng hơdôm gơnong bruă iâo pơhrui hơdôm ngăn rơnoh, pơhrua hrŏm hơdôm jơlan hơdră pơkă mơng lŏn ia pioh ngă hiưm hơpă bĕ bơrơkua lom pok pơhai ngă tui. Hăng anom bruă, biă ñu hơdôm anom bruă ƀơi anăp čơkă mă hơdôm hơdră bruă lĕ lom pok pơhai ngă tui amra khom sit nik rơđah, tơpă, djơ̆ pô, plơi pla kiăng hơdră bruă truh hăng mơnuih ƀôn sang”.

Ba hơdră bruă mut amăng tơlơi hơdip mơda, pơđĭ tui tơlơi pơmin mơng mơnuih ƀôn sang, pơjing pran djơ̆ hrŏm prong amăng mơnuih mơnam, biă ñu ƀơi hơdôm plơi pla neh wa djuai ania ƀiă dô̆, tơring čar Yên Bái glăk gir run ngă giong tơhnal pơkă pơđĭ kyar kơjăp phik, “mơtah, lê̆ nao hrom, gru grua hăng yâo mơ-ak”./.