Hơmâo 2 čô mơnuih apăn bruă ngă khua gơnong bruă gưl tơring čar Dak Nông pơdjơ̆ nao bruă git gai khul mă gai ƀong prăk ĕp lăng čưng boh lông.

Lơ 6/12, Khua mua tơhan kông an tơring čar Dak Nông hơmâo pơtrut pran jua, apah bơni hmao kru kơ ƀing khua mua, tơhan kông an pơgang tơlơi rơnuk rơnua hơđong amăng internet hăng pơhlôm, pơgang tơlơi soh sat mă yua tơlơi pơhing ia rơgơi, apah bơni dua boh anom bruă kông an tơring glông Dak Rlâp hăng Dak Glong, sa boh tơring glông rơnoh prăk apah 5 klăk, yua kơ hơmâo pơgăn tañ 3 wơ̆t arăng mă gai ƀong prăk ĕp lăng čưng boh lông. Hlâo kơ anun, hơdôm anom bruă kông an tơring čar, dưi hơmâo Khua git gai ping gah tơring čar Dak Nông apah bơni mơ̆n 120 klăk tơdơi kơ hơmâo ƀuh hăng pơrai hĭ jơlan hơdră mă gai ƀong prăk ĕp čưng boh lông hăng rơnoh prăk giam 600 klai.

Ngă tui tal kơsung mă, pơgăn ƀing soh sat, pơhlôm rơnuk rơnua hơđong hlâo kơ truh bơyan ngă yang thun phrâo Quý Mão 2023, biă mă ñu amăng bơyan ĕp lăng čưng boh lông World Cup, kông an tơring čar Dak Nông hơmâo kơsung nao, pơgăn tơlơi mă gai, wăn ƀai ƀong prăk ĕp lăng čưng boh lông tui tơlơi pơhing amăng internet lu hloh rơnoh prăk aka ƀu hơmâo djơ̆ ôh mơ̆ng hlâo truh ră anai. Kông an Dak Nông mă pơkong 17 čô mơnuih, djă pioh 4 boh măi komputer djă hyu, lu mrô rơnoh prăk, măi telephôn, rơdêh ôtô….ngă anŏ pơkôl mă gai ƀong prăk ĕp lăng čưng boh lông hăng rơnoh prăk abih tih 600 klai.

Lăp đing nao lĕ, amăng mrô anun, hơmâo mă Lương Ngọc Thành, mơnuih apăn bruă Gơnong bruă Kông ngăn lŏn glai hăng ayuh hyiăng tơring čar Dak Nông hăng Nguyễn Ngọc Trung mơnuih apăn bruă Gơnong bruă Boh thâo ia rơgơi phrâo tơring čar Dak Nông. Lương Ngọc Thành thun tơkeng 1993 yơh pô git gai bruă mă, yŏng gai ƀong prăk lăng čưng boh lông truh 600 klai prăk.